Iverson með 60 stig

Allen Iverson, leikmaður Philadelphia 76ers í NBA-deildinni, setti persónulegt met í nótt er hann skoraði heil 60 stig í sigurleik gegn Orlando Magic. Iverson, sem er stigahæsti leikmaður NBA í ár, átti áður 58 stig best en hann gaf einnig 6 stoðsendingar og stal 6 boltum í leiknum. 76ers unnu leikinn 112-99 og hafði Iverson náð meðaltali sínu í stigaskorun strax eftir fyrri hálfleik, eða 29 stigum. Iverson skoraði úr 17 af 36 skotum sínum í leiknum og setti niður 24 af 27 vítaskotum sínum. "Ég setti persónulegt met og við unnum leikinn. Þannig dreymir mann um hlutina", sagði Iverson en þetta var í fyrsta sinn sem leikmaður í NBA skorar 60 stig eða meira síðan Tracy McGrady skoraði 62 stig tíunda mars 2004.