Reggie Miller hættir í sumar

Reggie Miller, leikmaður Indiana Pacers í NBA-körfuboltanum, hyggst leggja skóna á hilluna eftir þetta tímabil, ef marka má orð systur hans, Cheryl Miller sem starfar sem íþróttaþulur hjá sjónvarpsstöðinni TNT. "Það hafa margir velt þessu fyrir sér upp á síðkastið," sagði Cheryl. "Ég spjallaði við Reggie í gær og eftir 18 tímabil með Pacers er óhætt að fullyrða að þetta verði síðasta tímabil hans í NBA." Reggie Miller hefur skorað 24,685 stig á ferlinum og er með flestar þriggja stiga körfur á ferlinum. Miller lofaði sjálfum sér að leika ekki fram yfir fertugt en hann nær þeim merka áfanga í ágúst.