Spilavíti og líkamsrækt í Airbus?

Hún er bæði of þung og of dýr en hún á samt að komast í loftið, risaþotan A380 sem var frumsýnd í dag. Um borð í henni verða í boði lystisemdir og líkamsrækt, að minnsta kosti svo lengi sem flugfélögin kjósa ekki að nota allt rýmið undir farþega og troða átta hundruð manns um borð. Það var mikið um dýrðir þegar hulunni var svipt af stærstu farþegaþotu heims, Airbus A380, í Toulouse í Frakklandi í morgun. Vélin er enda engin smásmíð. Á vængjunum er nógu mikið pláss til að leggja sjötíu bifreiðum en alls eru tæpir áttatíu metrar á milli vængendanna sem þýðir að ráðast þarf í töluverðar framkvæmdir á helstu flugvöllum heims til að koma vélinni fyrir. A380 er um 118 tonnum þyngri en Boeign 747 júmbóþotan og er þess vegna kölluð hinum rembingslega nafni súperjúmbó. Það var ekki laust við að rembingur fælist einnig í orðum þeirra þjóðarleiðtoga sem mættir voru til að hampa evrópskri smíð. Tony Blair, forsætisráðherra Bretlands, sagði að flugvélin væri sú mest spennandi um þessar mundir. Hún væri tákn efnahagslegs styrks, nýsköpunar á tæknisviðinu og færni og trúmennsku þeirra sem sköpuðu hana og umfram allt sannfæringarinnar um að Evrópa gæti keppt til sigurs á alþjóðamarkaði. Hann sagði enn fremur að vélin bæri vott um gæði bresks iðnaðar og evrópskrar samvinnu. Gerhard Schröder, kanslari Þýskalands, sagðist stoltur af því að Airbus hefði náð forystu á sviði flugvélasmíði í heiminum. Þeir sem spyrðu hvernig slíkt skyldi hafa gerst skyldu minntir á að góðar og gildar evrópskar hefðir hefðu gert smíði vélarinnar mögulega. Barir, biljarðstofur, sturtur, bókasöfn, svefnaðstaða, spilavíti og líkamsrækt eru meðal þess sem fræðilega er hægt að koma fyrir um borð í þessari tveggja hæða risavél, sem rúmar 555 farþega sé henni skipt upp í þrjú farrými. Þau flugfélög sem vilja flytja fleiri geta það líka léttilega. Með því að bjóða bara upp á ódýrustu sæti og troða inn í vélina er pláss fyrir átta hundruð farþega. Sextán farþegadyr þarf til að koma fólki inn og út með hraði. Þó að vélin hafi verið frumsýnd í dag er þó enn eftir stórt skref áður en farþegaflug hefst. Það þarf að koma henni í loftið og að því er stefnt í apríl á þessu ári. Eitt flugfélaganna sem keypt hefur þessa risavél er Virgin Atlantic. Eigandi þess, Richard Branson, segist meðal annars ætla að bjóða farþegum að freista gæfunnar í spilavíti um borð og fá sér blund í tvíbreiðum rúmum. Þannig verði nóg að gera í háloftunum lóðrétt og lárétt.