Mesic kjörinn forseti Króatíu

Stipe Mesic var endurkjörinn sem forseti Króatíu í gær. Hann hafði hlotið um 66 prósent atkvæða þegar nærri öll atkvæði höfðu verið talin. Jadranka Kosor, leiðtogi íhaldsmanna í Króatíu og keppinautur Mesic, hlaut 34 prósent atkvæða. Viðræður um Evrópusambandsaðild eru stærsta verkefnið sem bíður Mesic. Hann nýtti tækifærið í sigurræðunni í gær til þess að lýsa því yfir að Króatía væri nú komin að þröskuldi Evrópusambandsins. Stefnt er að því að Króatía gangi í ESB áður en kjörtímabil Mesic er á enda og því bíður hins nýkjörna forseta ærið verkefni.