Löng bið á dekkjaverkstæðum

Mikið var að gera á dekkjaverkstæðum á höfuðborgarsvæðinu í dag enda áttu margir erfitt með að komast leiðar sinnar í morgun vegna umferðarteppu sem skapaðist sökum mikillar hálku.

Hvít föl og kuldalegt veður mættu þeim höfuðborgarbúum sem vöknuðu til að fara til vinnu í morgun. Hálkublettir voru víða á götum borgarinnar og tók það marga langan tíma að komast á áfangastað vegna umferðaröngþveitis. Mikið var að gera á dekkjaverkstæðum í dag enda greinilega orðin þörf á að hafa góð vetrardekk undir bílum.

Eiður Ármannsson, verkstjóri hjá hjólbarðarverkstæðinu Sólningu, segir daginn í dag vera þann annamesta það sem af er þessum vetri. Hann segir það ekkert nýtt að biðraðir myndist um leið og fyrsta hálkan láti á sér kræla - þannig sé það bara. Dagurinn í dag sé sá annamesti til þessa.

Vegfarendur sem biðu afgreiðslu á dekkjaverkstæðum í dag - og höfðu sumir beðið í upp undir þrjú korter - sögðust ekki vera pirraðir þrátt fyrir biðina. Um ástæður þess að rokið var í dekkjaskiptin nú, sögðust menn ýmist vera á nýkeyptum bílum eða ekki þora annað í snjónum.