ÍA 1993 gegn FH 2005

Það er margt líkt með árangri FH-inga í Landsbankadeildinni í sumar og Skagaliðsins fyrir tólf árum. En standast FH-ingar samanburð við það lið sem flestir spekingar telja eitt það allra sterkasta sem hefur leikið hér á landi? Vignir Guðjónsson fór nánar yfir þennan samanburð í Fréttablaðinu í dag. Magnaður árangur FH í Landsbankadeildinni í sumar minnir um margt á hliðstæðan árangur ÍA árið 1993, sem þá stillti upp einhverju alsterkasta félagsliði sem um getur í sögu efstu deildar á Íslandi. Liðið vann tvöfalt það ár, vann 16 leiki af 18 á Íslandsmótinu og tapaði aðeins einum, skoraði 3-4 mörk að meðaltali í hverjum leik og hafði fádæma yfirburði í flestum leikja sinna, líkt og FH í ár. Hafnfirðingar eru reyndar fallnir úr bikarkeppninni en í deildinni hafa þeir borið ægishjálm yfir mótherja sína, skorað rúm þrjú mörk að meðaltali í þeim 14 leikjum sem búnir eru í sumar og aðeins fengið á sig sex í heildina. Þá hefur töluvert verið rætt og skrifað um að viðlíka leikmannahópur og sá sem þjálfarinn Ólafur Jóhannsson hefur haft úr að ráða hjá FH í sumar hvað varðar getu og breidd hafi ekki sést á Íslandi síðustu ár. Margt sameiginlegt Þessi tvö firnasterku lið eiga ýmislegt sameiginlegt; Skagamenn voru með tvo afburða erlenda leikmenn árið 1993, þá Lúkas Kostic og Mihjalo Bibercic, rétt eins og FH er með nú í þeim Tommy Nielsen og Allan Borgvardt. Í báðum tilvikum er um að ræða miðvörð annars vegar og sóknarmann hins vegar. Skagaliðið 1993 var byggt á sama kjarna leikmanna og sumarið áður en þá varð liðið einnig Íslandsmeistari, þó ekki á jafn afgerandi hátt og það átti eftir að gera ári síðar, og var það í fyrsta sinn sem ÍA varð meistari í átta ár. Það sama á við um FH-liðið nú og síðasta sumar – í fyrra varð liðið meistari í fyrsta skipti í sögunni en í sumar geislar sjálfstraustið af liðinu, líklega að hluta til vegna velgengninnar í fyrra. Í ár fær liðið hreinlega ekkert stöðvað – alveg eins og ÍA árið 1993. ÍA 1993 og FH 2005 endurheimtu bæði gamla jaxla sem höfðu verið í atvinnumennsku og áttu eftir að styrkja liðin mikið; ÍA fékk Ólaf Þórðarson og FH fékk Auðun Helgason og Tryggva Guðmundsson. Samlíkingarnar liggja víða. En þegar liðin eru borin saman á alþjóðlegum vettvangi skilur stórt á milli. Skagamenn höfðu yfir að ráða 6-7 leikmönnum sem ýmist voru eða áttu eftir að verða fastamenn í íslenska landsliðinu á þessum árum. Hjá FH er aðeins um að ræða tvo leikmenn, þá Auðun og Tryggva, sem hvorugur getur talist til fastamanna landsliðsins þótt þeir hafi gegnt mikilvægu hluverki þar í undanförnum leikjum. Íslenska landsliðið á þessum tíma var mun sterkara en það er nú samkvæmt styrkleikalista FIFA, eina marktæka listanum sem segir til um getu landsliða. Í árslok 1993 var íslenska landsliðið í 46. sæti þessa lista, með fjölda Skagamanna innanborðs. Í dag er landsliðið í 94. sæti, með tvo FH-inga innanborðs. Aukinheldur er samanburður á árangri liðana í Evrópukeppninni athyglisverður. Lið FH féll úr keppni í 1. umferð forkeppni Meistaradeildarinnar og átti aldrei möguleika gegn Neftchi Baku frá Aserbaídsjan á meðan ÍA vann tiltölulega auðveldan 3-0 samanlagðan sigur gegn Partizani Tirana frá Albanínu árið 1993. Í næstu umferð náðu Skagamenn einhverjum mögnuðustu úrslitum í sögu íslenskrar knattspyrnu þegar þeir skelltu Feyenoord 1-0 á Laugardalsvellinum, sem þá var langbesta liðið í Hollandi. Liðið tapaði reyndar í Hollandi 3-0, en mótþróinn og hin erfiða hindrun sem íslensku víkingarnir reyndust hollensku risunum var eitthvað sem vakti athygli meðal fótboltaáhugamanna út um allan heim. Í 2. umferð forkeppninar í ár steinlá Neftchi Baku 5-1 samanlagt fyrir belgísku meisturunum í Anderlecht. Einstaklega samstillt lið FH Tilgangurinn með þessum pistli er ekki að draga úr mögnuðum árangri FH í ár – síður en svo. Liðið er einstaklega samstillt og býr líklega yfir einni bestu liðsheild sem sést hefur í efstu deild á Íslandi. FH hefur spilað frábæra knattspyrnu í allt sumar og er á góðri leið með að toppa þann árangur sem ÍA náði árið 1993. Hér er aðeins verið að velta fyrir sér skemmtilegum samanburði sem gefur í skyn að það þurfi minna til að vera yfirburðalið á Íslandi nú en fyrir 12 árum síðan. Tímarnir eru vissulega breyttir og ljóst er að sitt sýnist hverjum um hversu öflug þessi tvö lið raunverulega eru. En á pappírunum sem og ef mið er tekið af frammistöðu fyrir utan landssteinana var Skagaliðið 1993 talsvert sterkara en FH 2005. Þar af leiðandi gefur sambærilegur árangur í deild villandi mynd af raunverulegri getu liðanna. En hvort liðið er betra? Svarið við þeirri spurningu er líklega matsatriði hvers og eins. Allavega tel ég að Skagaliðið 1993 færi tiltölulega létt með FH-liðið 2005 á eðlilegum degi. En það er bara ég.