Skoðanakannanir ráði ákvörðun

Danska ríkisstjórnin hefur boðað til þingkosninga, mörgum mánuðum áður en kjörtímabilinu lýkur. Forsætisráðherrann segist vilja ljúka kosningum fyrir sveitarstjórnarkosningar í haust, en stjórnmálaskýrendur segja hagstæðar skoðanakannanir hafa sitt að segja. Danskir fjölmiðlar hafa undanfarið boðað að kosningar væru í vændum. Klukkan eitt í dag tilkynnti Anders Fogh Rasmussen, forsætisráðherra og formaður Venstre-flokksins, úr ræðustól á danska þinginu að kosið yrði eftir 3 vikur. Skoðanakannanir undanfarið hafa verið hagstæðar fyrir forsætisráðherrann og flokk hans. En Rasmussen sagði sjálfur í dag að nauðsynlegt væri að ljúka þingkosningum fyrir sveitarstjórnarkosningar í haust. Þeim fylgi mikil forvinna við sameiningu sveitarfélaga, sem verði að ljúka á vordögum. Til stóð að kjósa í janúar en því var frestað vegna náttúruhamfaranna í Asíu. Jost Lytje Hansen námsmaður segir að sér lítist vel á að kosningar séu fram undan og hann voni að Danir kjósi stjórnarandstöðuna. Anders Fogh Rasmussen viti hvað hann sé að gera og hafi valið tíma sem henti honum. Á blaðamannafundi kl. 14 kynnti Rasmussen stefnumál Venstre og lagði áherslu á vísindarannsóknir, barnafjölskyldur og skattastoppið svokallaða, þ.e. að heildarskattprósenta hækki ekki. Kosningabaráttan hefur rúllað af stað og notuðu höfuðandstæðingar Venstre, Sósíaldemókratar, helgina til að kynna nýjar tillögur í atvinumálum sem miða að því að fjölga störfum í Danmörku um 50.000. Kosningabaráttan mun ekki síður snúast um menn en málefni, ekki síst frammistöðu Rasmussens á fyrsta kjörtímabili sínu sem forsætirsáðherra. Lars Gruhn deildarstjóri telur að Rasmussen hafi verið skynsamur forsætisráðherra en segir að hann sé ekki sammála stjórnmálastefnu hans. Hvað sem öllu líður er búið að gefa grænt ljós á kosningar í Danmörku, 8. febrúar.