Nýtt hryðjuverkatímarit

Samtök jórdanska hryðjuverkamannsins Abu Musab al-Zarqawi hafa hafið útgáfu tímarits á netinu til að afla sér fleiri fylgismanna svo að hreinsa megi Írak af "trúleysingjum og fráfellingum." Tímaritið kom út tveimur dögum eftir að samtök Zarqawis lýstu yfir ábyrgð á sprengjutilræðinu í Hillah þar sem 127 manns fórust. Mikið er mikið lagt í hönnun þess og útlit og gefur þar að líta ýmiss konar greinar og ávörp, meðal annars eftir Osama bin Laden, leiðtoga Al Kaída. Þar eru súnní-múslimar hvattir til að taka höndum saman og heyja heilagt stríð gegn "trúleysingjum og fráfellingum sem leggja lönd múslima undir sig." Bandarískur sérfræðingur í vörnum gegn hryðjuverkum segir að ritinu sé meðal annars ætlað að gefa þá ímynd að samtök al-Zarqawi séu enn þá öflug. Ekki er þó talið víst að nettímaritið sé ósvikið. Uppreisnarmenn í landinu halda uppteknum hætti og fórust sex lögreglumenn í árásum þeirra í gær.