Nítján látnir í árásum í Írak

Ekkert lát er á ofbeldisverkum uppreisnarmanna í Írak sem þó er svarað af fullri hörku af herflota bandamanna í landinu. Á fáeinum mínútum létust að minnsta kosti nítján í fjórum árásum uppreisnarmanna í norðurhluta landsins í morgun. Sjálfsmorðssprengjuárás var gerð við herstöð Bandaríkjamanna, við írakska herstöð, við markað og við landamærastöð. Þá slösuðust níu manneskjur, þar á meðal tveir lögregluþjónar, þegar bílsprengja sprakk við lögreglustöð í Bagdad. Fjögur þúsund hermenn hafa verið fluttir til Norður-Íraks á síðustu vikum til að bregðast við ofbeldinu sem sífellt færist í aukana. Í morgun sýndi her bandamanna einnig mátt sinn og megin er hann handtók sextán grunaða uppreisnarmenn og fór með tugi skriðdreka og Apache-þyrlur um svæðið.