Vörubílstjórar taka ekki þátt

Landssamband vörubifreiðastjóra tekur ekki þátt í mótmælum gegn breytingum á þungaskattinum sem áformuð eru fyrir verslunarmannahelgina. Formaður sambandsins segir þungaskattinn einungis hafa veruleg áhrif á ákveðna félagsaðila. Atvinnubílstjórar ætla að mótmæla breytingum á þungaskattinum með því að valda umferðaröngþveiti á mótum Suðurlandsvegar og Vesturlandsvegar í nokkrar klukkustundir næstkomandi fimmtudag eða föstudag. Þeir gefa ekki upp nákvæmari tímasetningu en þetta til að koma í veg fyrir að ferðalangar hagi ferðum sínum eftir henni. Þeir hafa einnig hótað að loka Reykjanesbrautinni og trufla þannig millilandaflug en með þessu krefjast þeir þess að verð á dísilolíu verði lækkað og þungaskatturinn afnuminn. Sturla Jónsson atvinnubílstjóri er meðal forsprakka mótmælanna og segir fyrirhugaðar aðgerðir hafa hlotið miklar undirtektir meðal atvinnubílstjóra. Landssamband vörubifreiðastjóra tekur ekki þátt í mótmælunum og segir formaður þess, Jón M. Pálsson, þungaskattinn einungis hafa veruleg áhrif á ákveðna félagsaðila. Hann segir mjög breytilegt hvernig bílar komi almennt út úr breytingunni, meðal annars vegna breytilegrar eyðslu bílanna. Til að einfalda málið líkir hann mismunandi vörubílum við jeppa sem eyðir 20 lítrum á hundraði og Yaris sem eyðir fimm lítrum á hundraði en þannig geta vörubílarnir verið mismunandi, bæði eftir tegundum og þeirri vinnu sem þeir sinna. Þeir bílar sem keyra minnst, t.d. kranabílar sem eru mikið kyrrstæðir eða í staðbundinni vinnu, koma verst út úr breytingunni. Olíuverðshækkunin sem hefur orðið á síðasta eina og hálfa árinu frá því lögin voru sett, ásamt breytingunni sjálfri 1. júlí, vinna saman að óánægju vörubifreiðastjóra. Misjafnt er hversu mikil áhrif breytingin hefur á vörubifreiðastjóra; það fer meðal annars eftir bílategundum en hækkunin á gjöldum þeirra getur orðið allt upp í 18%.