Vinsældir hreindýraveiða aukast

Nítján hreindýrstarfar hafa verið veiddir á síðustu tíu dögum. 800 leyfi voru gefin út í ár en tvöfalt fleiri umsóknir bárust, eða um 1600, og verða vinsældir þessa áhugamáls sífellt meiri. Síðustu tíu daga hefur verið leyfilegt að veiða tarfa og hafa nú þegar 19 tarfar verið veiddir. Veiðitímabil kúnna hefst ekki fyrr en 1. ágúst og standa veiðarnar til 15. september. Jóhann G. Gunnarsson hjá Umhverfisstofnun á Egilsstöðum segir veiðileyfaumsóknir hafa tekið kipp þegar rjúpnaveiðin var bönnuð fyrir þremur árum en umsóknafrestur um veiðileyfi hreindýra þetta árið rann út áður en ákvörðun var tekin um að leyfa rjúpnaveiði aftur í haust. Hverjum veiðimanni fylgir leiðsögumaður sem aðstoðar hann við val á dýri. Í þessum töluðu orðum eru fjórir leiðsögumenn á ferð fyrir austan, hver þeirra með 1-2 veiðimenn með sér. Veður hefur verið heldur óhagstætt veiðimönnunum, töluverð þoka inn af Eskifirði og Norðfirði sem liggur ofan í fjöllunum og byrgir mönnum sjón. Svæði 2, sem er Fljótsdalsheiðin og svæðið sem margir þekkja betur sem Kárahnjúkasvæði, er vinsælasta veiðisvæðið. Þar má skjóta flest dýr og kostar meðaltarfur þar 110 þúsund krónur en kýrin 55 þúsund. Hún er ódýrari þar sem hún getur verið allt að helmingi léttari en tarfurinn og svo eru horn tarfsins einnig eftirsóknaverð. Jóhann segir veiðina ná hámarki um og eftir 20. ágúst og allt til enda tímabilsins, þann 1. september. Eftir því sem á líður sumarið þyngjast dýrin, tarfarnir stækka og hornin verða hvít og allt saman er þetta mjög eftirsóknavert. Nokkuð vinsælt er að láta stoppa upp höfuð dýrsins og eftir veiðitímabilið í fyrra tók einn hamskerinn fyrir austan að sér að stoppa upp 20 hreindýrshausa. Útlendingar sækja nokkuð í veiðina en fjöldi umsókna þeirra í ár var þó sambærilegur við árið í fyrra. 23 útlendingar fengu leyfi í ár og hefur einn þeirra nú þegar fellt sinn tarf.