Gæti orðið ónæmt fyrir sýklalyfjum

Tríklosan, efni sem finnst í mörgum snyrti- og hreinlætisvörum og varað hefur verið við, stuðlar að uppbyggingu mun harðgerðari bakteríustofna og getur valdið því að fólk verði ónæmt fyrir sýklalyfjum. Tríklosan er bakteríudrepandi sem mætti ef til vill ætla að væri jákvætt en það hefur þvert á móti slæm áhrif bæði á líkama og umhverfi. Með því að nota sífellt bakteríudrepandi efni ræktar fólk upp harðgerari bakteríustofna og það getur jafnvel leitt til þess að þeir verði ónæmir fyrir lyfjum. Níels Br. Jónsson, sérfræðingur hjá Umhverfisstofnun, bendir á til samanburðar að ef fólk skeri sig þá sé notað sótthreinsandi á sárið meðan það er að loka sér. Það sé hins vegar ekki verið að sulla í sótthreinsandi efnum alla daga. Tríklósan er flokkað sem eiturefni í Bandaríkjunum og Evrópusambandið hefur nýverið hert reglur um vörur sem innihalda efnið svo þeir sem vilja forðast það eiga að geta séð það í innihaldslýsingunni, á snyrtivörum að minnsta kosti. Níels segir að það sem honum finnist svolítið athyglisvert sé það að strax við styrkinn 0,25%, sem sé mjög lágt, þá er þetta merki farið að fá umhverfismerki. Það er, efnavörur sem innihalda jafnvel lægra hlutfall en tríklósan en til dæmis tannkrem þarf að merkja sem umhverfisskaðvald, en ekki snyrtivöruna. Níels segir að enn sem komið er sé ekki alveg ljóst hvaða afleiðingar það hafi að efnið safnist upp í líkamsvef og umhverfi en í ljósi sögunnar, þar sem efni sem brotni ekki niður hafa til dæmis reynst leiða til þess að dýr verði tvíkynja, hringi allar viðvörunarbjöllur hjá efnafræðingum þegar efni hagi sér með þessum hætti. Það séu því fyrst og fremst öryggissjónarmið sem ráði því að svo hart sé brugðist við.