Fjör í Skeiðaréttum í dag

Menn og fé undu sér vel í Skeiðaréttum í dag. Landbúnaðarráðherrann lét ekki sitt eftir liggja. Margt var um manninn í Skeiðaréttum enda að jafnaði mikil gleði þegar réttað er. Á meðal þeirra sem sóttu réttirnar var sjálfur landbúnaðarráðherra, Guðni Ágústsson. Um langan aldur hafa Skeiðaréttir verið einar fjárflestu réttir á Suðurlandi en nú hefur fé heldur fækkað. Fjallkóngurinn Aðalsteinn Guðmundsson var þó ánægður með daginn. Hann sagði daginn hafi gengið vel, veður hafi verið frábæt og um tíma hafi fólkið verið fleira en féð. Það hafi verið erfitt að koma fénu inn í almenninginn þar sem fólkið hafi verið svo margt. Dagurinn hafi engu að síður verið dásamlegur og það sé sauðkindinni að þakka. Dagurinn er mikilvægur fyrir bændur og margir hafa sótt réttirnar oft. Helga Guðjónsdótti er þeirra á meðal. Hún segist hafa sótt réttirnar að minnsta kosti 52 sinnum og alltaf hafi verið jafngaman. Hún hafi boðið upp á kjötsúpu á bænum Bollastöðum fyrir gesti og gangandi, allt upp í 20 manns. Þá vonist hún til þess að réttirnar haldist á meðan hún endist til að fara. Réttað var víða um land í dag og voru heimtur á fé bara nokkuð góðar.