Svikafyrirtæki eykur umsvifin hér

Svikafyrirtækið European City Guide er enn starfrækt af fullum krafti hér á landi, að sögn Sigurðar Jónssonar, framkvæmdastjóra Samtaka verslunar og þjónustu. European City Guide fær forráðamenn fyrirtækja til að samþykkja skráningu í gagnabanka án endurgjalds. Síðan fá þeir sendar upplýsingar til að yfirfara og leiðrétta sem þeir staðfesta að lokum með undirskrift sinni. Með smáu letri stendur hins vegar að undirskriftin jafngildi pöntun á skráningu í þrjú ár og hún kosti allt að 90 þúsund krónur á ári. Sumir hafa glapist á að borga einu sinni og talið þar með að málið væri úr sögunni. "En það er síður en svo, því þá magnast þeir um allan helming og ganga harðar að fólki heldur en nokkru sinni fyrr, jafnvel með hótunum,"segir Sigurður og bætir við að svo virðist sem umsvif svikafyrirtækisins hér á landi séu enn að aukast ef marka megi þær hringingar sem komi til SVÞ. "Þeir virðast hafa tekið Ísland fyrir," segir Sigurður. "Reynsla okkar hefur verið sú að þessara svikara hefur orðið mest vart á vorin og sumrin. En ennþá eru fyrirtæki að hringja í mig vegna þeirra. Um er að ræða ríkisfyrirtæki, bæjarfyrirtæki, hótel úti á landi og ýmsa smærri aðila sem eru að lenda í þeim. Við höfum fengið símtöl í hverri viku síðastliðna tvo mánuðina, þar sem fólk er að spyrja hvernig það eigi að bregðast við rukkunum og hótunum frá þessu svikafyrirtæki." Sigurður segir að öllum sé ráðlagt það sama; að hafna í upphafi kröfunni þar sem undirritun þeirra hafi verið fengin með sviksamlegum hætti. Þeir eigi jafnframt að hundsa allar innheimtuaðgerðir svikafyrirtækisins og innheimtufyrirtækja þess. "Íslenskir lögmenn og innheimtufyrirtæki hafa verið vöruð við þessum aðila og beðnir um að taka ekki kröfur hans til innheimtu," segir Sigurður enn fremur. "Samtök í atvinnulífinu munu ef þörf krefur aðstoða aðildarfyrirtæki sem í slíku lenda, en ekki eru enn þekkt slík dæmi."