Mótmælendur verða kærðir

Þrír Bretar voru handteknir við Kárahnjúka í fyrrinótt eftir að til átaka kom milli lögreglu og á þriðja tug mótmælenda á vinnusvæði virkjunarinnar. Mótmælendurnir höfðu hlekkjað sig við vinnuvélar auk þess að vinna skemmdarverk á vinnuvélum að sögn Helga Jenssonar, fulltrúa sýslumannsins á Seyðisfirði. "Mótmælendur voru með æsing og læti og veittust að lögreglu þegar handtökur fóru fram," segir Helgi. Átökin hófust upp úr miðnætti í gærkvöld þegar mótmælendur urðu ekki við beiðni lögreglu um að yfirgefa vinnusvæðið að sögn Helga. Tveir lögregluþjónar hafi þegar verið staddir á Kárahnjúkum en barst á næstu klukkustundum liðsauki frá Egilsstöðum og Eskifirði, auk lögregluþjóna frá Ríkislögreglustjóra. Flestir voru lögregluþjónarnir tólf á svæðinu. "Það gekk ekki auðveldlega að eiga við svo stóran hóp af fólki," segir Helgi. Þó hafi lögreglu að lokum tekist að koma fólkinu út af vinnusvæðinu þar sem þau hafi verið völd að truflunum og skemmdum. Ekki liggur fyrir hversu mikið tjón hlaust af að sögn Helga. Ítalska verktakafyrirtækið Impregilo hyggst kæra mótmælendurna og verður farið í undirbúning þess strax á næstu dögum að sögn Ómars R. Valdimarssonar, upplýsingafulltrúa fyrirtæksins. Ómar segir umtalsverðar skemmdir hafa verið unnar á vinnuvélum fyrirtækisins, bæði rúður og ljósluktir hafi verið sprautaðar með málningu auk þess sem dýr vinnuvél sé óstarfhæf vegna þess að lyklum að henni hafi verið kastað út í móa og þeir ekki fundist. "Við hljótum í kjölfar þessara atburða að fara fram á aukna löggæslu við Kárahnjúka," segir Ómar. "Það er ekki í verkahring okkar að stöðva lögbrot á Íslandi." Sigurður Arnalds, kynningarstjóri Kárahnjúkavirkjunar hjá Landsvirkjun, segir Landsvirkjun hafa hvatt undirverktaka til þess að kæra skemmdir á vinnutækjum og skúrum. Skemmdarverkin hafi bitnað á fleiri verktökum en Impregilo.