Dómarar lífs og dauða

Vandamenn Terri Schiavo bíða nú milli vonar og ótta eftir að alríkisdómari skeri úr um hvort fjarlægja megi næringarslöngur sem halda lífinu í þessari 41 árs heilaskemmdu konu. Málið er orðið stórpólitískt eftir að Bandaríkjaþing samþykkti lagafrumvarp sem felur alríkisdómara úrskurðarvald í málinu. Á sunnudag kom Bush forseti skyndilega úr fríi sínu til að undirrita lögin. Terri Schiavo hefur verið án meðvitundar í 15 ár en getur þó andað hjálparlaust. Eiginmaður hennar vill að hætt verði að veita henni næringu í æð svo hún fái að deyja en hann segir konu sína hafa látið í ljós óskir þar að lútandi áður en hún veiktist. Foreldrar hennar eru því hins vegar algerlega andsnúnir. Á föstudaginn voru slöngurnar teknar úr sambandi eftir úrskurð dómara í Flórída og mun hún geta lifað í tvær vikur án þeirra. Málið hefur vakið mikla athygli um allan heim og sýnist sitt hverjum. Í gær gagnrýndi málgagn Páfagarðs harðlega að hætt hefði verið að næra Schiavo og sagði að enginn hefði rétt til að ákveða hvort önnur manneskja lifði eða dæi.