Íslandspósti seld skeytaþjónusta

Síminn og Íslandspóstur hafa gert með sér samning um kaup hins síðarnefnda á skeytaþjónustu Símans en hún hefur verið hluti af þjónustu Símans frá aðskilnaði fyrirtækjanna árið 1998. Í tilkynningu frá félögunum kemur fram að skeytaþjónustan hafi tekið breytingum á undanförnum árum. Það verði t.d. æ algengara að pantanir á símskeytum berist í gegnum Netið og muni sú þróun væntanlega halda áfram. Íslandspóstur telur að skeytaþjónusta falli vel að núverandi starfsemi fyrirtækisins og stefnir að því að efla hana og bæta enn frekar.