Júlíus Vífill vill annað sætið

Júlíus Vífill Ingvarsson, lögmaður og fyrrverandi borgarfulltrúi, sækist eftir öðru sæti á lista Sjálfstæðisflokksins í Reykjavík vegna borgarstjórnarkosninganna í vor. Hann segist hafa íhugað vandlega að sækjast eftir fyrsta sætinu. "Það er að mjög vel athuguðu máli sem ég gef kost á mér í annað sæti en hvort tveggja kom mjög sterklega til greina," segir Júlíus Vífill. Hann segist hafa orðið fyrir mikilli hvatningu og örvun frá æði mörgum og orðið við óskum fólks um að bjóða sig fram. Júlíus Vífill vill ekki greina frá hvort hann styðji Gísla Martein Baldursson eða Vilhjálm Þ. Vilhjálmsson í fyrsta sæti, hann segist hugsa fyrst og fremst um eigið framboð. "Ég vona að kraftar mínir og reynsla á sviði menningarmála, atvinnulífs og stjórnmála komi til með að nýtast lista Sjálfstæðisflokksins í kosningum í vor." Júlíus Vífill hyggst opna kosningaskrifstofu á næstu dögum.