Björk Vilhelms í fyrsta sætinu

Þrátt fyrir svolitla rigningu sýndu borgarfulltrúar Reykvíkinga góða takta á árlegu golfmóti borgarstjórnar sem haldið var á Grafarholtsvellinum á föstudag. Einbeitingin skein úr andlitum og keppnisharkan var mikil þó gleðin væri ekki langt undan. Hver og einn borgarfulltrúi lék í liði með vönum kylfingi úr forystu Golfklúbbs Reykjavíkur og völdust Björk Vilhelmsdóttir og Sigurjón Ólafsson, fyrrverandi stjórnarmaður í klúbbnum, saman. Þau byrjuðu mjög vel og náðu góðri forystu og um tíma stefndi í öruggan sigur þeirra. Þegar nokkrar holur voru eftir komust Kjartan Magnússon og Margeir Vilhjálmsson, framkvæmdastjóri GR, á mikið skrið og keppnin varð afar tvísýn. "Við vorum andandi ofan í hálsmálið á þeim undir lokin," segir Margeir og hrósar um leið Björk sigurvegara fyrir fagmannlega tilburði á flötunum. "Hún var eins og þaulvanur kylfingur." "Ég stóð mig ágætlega, svona af nýgræðingi að vera," segir Björk sem af miklu lítillæti eignar Sigurjóni meðspilara sínum heiðurinn af sigrinum. "Reyndar unnum við mjög vel saman," bætir hún við. Þetta var í þriðja sinn sem Björk leikur golf og má því árangur hennar í mótinu heita undraverður. Og það er aldrei að vita nema afrek hennar á golfvellinum verði fleiri í framtíðinni því samkvæmt öllum pólitískum teiknum lætur hún af starfi borgarfulltrúa í vor. "Ég útiloka ekki að taka golfið fastari tökum. Það gæti alveg komið til greina sem hobbý þegar maður hættir að hafa fundi sem hobbý." Steinunn Valdís Óskarsdóttir borgarstjóri hafnaði í þriðja sæti en félagi hennar var Viggó H. Viggósson, stjórnarmaður í GR. Steinunn er í GR og hefur notið leiðsagnar Ragnhildar Sigurðardóttur við æfingar. Vilhjálmur Þ. Vilhjálmsson er einnig í klúbbnum og að sögn Margeirs framkvæmdastjóra er hann afskaplega illa haldinn af golfbakteríunni.