Megrun ekki lausnin við offitusýki

Megrun er ekki lausnin við sjúklegri offitu. Þetta var meðal þess sem kom fram á blaðamannfundi sem haldinn var á Landspítala - háskólasjúkrahúsi í gær. Hér á landi eru staddir tólf norskir offitusjúklingar. "Við höfum sent hingað suma af okkar erfiðustu sjúklingum. Aðgerðir þeirra eru áhættusamar og við höfum valið að senda sjúklingana hingað á meðan við erum að ná fullum tökum á þessari tegund aðgerða," segir Rune Sandbu, yfirlæknir frá Tönsberg í Noregi. Hann kemur hingað með sjúklingum sínum og kynnir sér aðgerðartækni og árangur teymisins á Landspítalanum sem annast hefur offitusjúklinga. Það sem meðal annars greinir aðgerðirnar á Íslandi frá svipuðum aðgerðum í öðrum löndum er svokölluð atferlismeðferð sem er undanfari aðgerðarinnar og fer fram á Reykjalundi. Þar er áherslan lögð á lífsstíl og viðhorf sjúklinganna, en þessi formeðferð hefur gefið góða raun, bætt lífsgæði sjúklinga og aukið lífslíkur þeirra um allt að tíu ár.