Norðmenn kynna sér offituaðgerðir

Tólf norskir offitusjúklingar eru staddir hér á landi til að leggjast undir hnífinn. Hópur norskra heilbrigðisstarfsmanna fylgir hópnum til landsins en hann ætlar að reyna að læra af góðum árangri Íslendinga. Íslendingar standa framarlega á sviði offituaðgerða en langtímaárangur aðgerðanna hér á landi er mun betri en gengur og gerist. Samningur hefur því verið gerður á milli Landsspítala - háskólasjúkrahúss og noskra heilbrigðisyfirvalda um að senda sjúklinga hingað til lands. Reynslan af offituaðgerðum hér á landi er orðinn tölvuverð en eitt er það sem tryggir góðan árangur. Hjörtur G. Gíslason skurðlæknir segir það svokallaða formeðferð þar sem sjúklingar séu undirbúnir betur en annars staðar. Reykjalundur hafi séð að miklu leyti um þann hluta og í honum felist svokölluð atferlismeðferð þannig að aðgerðin nýtist sem best. Hjörtur segir aðgerðina hjálpartæki og ef vel sé að málum staðið og sjúklingar vel undirbúnir andlega og líkamlega þá séu meiri líkur á að vel takist til. Gerðar hafa verið vel á fjórða hundrað aðgerðir og talið er að svipað margir eigi við alvarlegt vandamál að stríða og eigi hugsanlega eftir að koma í aðgerð. Tölur um offitu hér á landi sýna að hún sé að verða mjög mikið vandamál. Hjörtur segir tölur benda til þess að allt að fjórða hvert barn á aldrinum 13-19 ára eigi við offitu að stríða. Þau séu með þyngdarstuðul yfir 30 sem sé mjög alvarlegt og með því versta sem gerist. Þá bendi tölur einnig til að fimmti hver fullorðinn Íslendingur sé skilgreindur sem of feitur. Ávinningur af samstarfinu er mikill fyrir báða aðila og ánægja er með aðgerðirnar hingað til. Rune Sandbu, yfirllæknir á Tönsberg í Noregi, segir t.d. að gerðar hafi verið aðgerðir á þremur Norðmönnum í dag og þeim líði öllum mjög vel.