Guttormur allur

Ástsælasti boli landsmanna, Guttormur í Húsdýragarðinum, var felldur í morgun og borinn til grafar í dýragrafreitnum að bænum Hurðarbaki í Kjós. Hann var orðinn þrettán ára og því fjörgamall af nauti að vera. Guttormur kom í heiminn á Eystri Sólheimum haustið 1992 og var fluttur í Húsdýragarðinn tveimur árum síðar. Þar átti hann góða ævi með kúnum þar og áhyggjulaus af meðlagsgreiðslum eignaðist hann með þeim 24 afkvæmi. Kýrinn Búkolla gengur með 25 kálfinn undan honum og mun bera á næstunni. Heilsu Guttorms fór hrakandi upp á síðkastið og var því ákveðið á lóga honum svo að hann þyrfti ekki að kveljast. Að sögn starfsfólks í Húsdýragarðinum var Guttormur mikill kostagripur, bæði fallegur og vel skapi farinn. Það er því mikil eftirsjá af honum og ljóst að erfitt verður að fylla hans skarð. Líklega er ekki ofáætlað að um það bil hálf þjóðin hafi séð Guttorm í heimkynnum sínum í Húsdýragarðinum og í fjölmörgum tilvikum er Guttormur eina nautið sem fólk hefur séð, í návígi að minnstakosti.