Heildarlaun VR-félaga hækka um 10%

Heildarlaun félagsmanna í VR hafa hækkað um tíu prósent frá því í fyrra, þremur prósentum meira en almennt á vinnumarkaði. Launakönnunin í ár er umfangsmesta könnun Verslunarmannafélags Reykjavíkur til þessa. Í henni má sjá að heildarlaun félagsmanna VR hafa hækkað um tíu prósent frá því í fyrra sem er nokkuð meira en almennt gerðist á vinnumarkaðinum eða rúmum þremur prósentum. Í könnunni má einnig sjá að launamunur kynjanna er langt því frá að vera horfinn. Konur á vinnumarkaðnum búa við það að fá 14 prósentum lægri laun en karlmenn í sömu stöðu. Staðan er því lítið breytt frá því í fyrra en þá var kynbundinn launamunur 15 prósent. Það er því kannski ekki að furða að karlar eru ánægðari með laun sín en konur samkvæmt könnuninni og telja hæfni sína á vinnumarkaði hafa aukist. Fleiri karlar vinna fjarvinnu en konur og virðast þannig búa við meiri sveigjanleika í starfi. Það að fara í launaviðtal er hins vegar góð leið þegar bæta á kjör sín því að í könnunni má sjá að 70 prósent þeirra sem fóru í launaviðtöl fengu jákvæða breytingu á kjörum sínum.