Nýta tölvuleikjatækni í aðgerðum

Tölvuleikjatæknin mun nýtast læknum í auknum mæli til að gera hvers konar aðgerðir í framtíðinni. Heilbirigðistæknisvið Landspítala - háskólasjúkrahúss hefur að undanförnu kannað með hvaða hætti þrívíddarlíkön, sem gerð eru úr kalki eða plasti, gætu nýst við undirbúning skurðaðgerða og annarra meðferðarúrræða á Landspítalanum. Útkoman er góð. Þorgeir Pálsson, sviðsstjóri heilbrigðistæknisviðs LSH, segir að með þessu sé hægt að láta skurðlækninn fá hlut af því líffæri eða því sem hann er að fást við í aðgerð og þannig geti hann undirbúiið aðgerðina betur og gert sér betur grein fyrir aðstæðum, hvernig líffæri liggja saman eða tengjast eða hvernig bein líti nákvæmlega út. Hann geti með þessu stytt aðgerðartímann og gert vinnuna þægilegri og hugsanlega auðvelda sjúklingnum aðgerðina eitthvað. Notaðar eru tölvusneiðmyndir og segulómmyndir af sjúklingum, þrívíddarlíkön eru þá búin til í tölvum og síðan er smíðað líkan af viðkomandi líffæri með nýrri tækni, sem stundum er kölluð þrívíddarprentun. Nákvæmt líkan sýnir ástandið fyrir aðgerð og er notað til skipulagningar og undirbúings á aðgerðinni. Þannig má til dæmis smíða eða stilla alla málmhluti í rétta stærð og lögun áður en aðgerðin hefst. Nokkur líkön hafa þegar verið smíðuð á Landspítalanum, meðal annars fyrir aðgerðir í munn- og kjálkaskurðækningum og fyrir endurhæfingu. Þórður Helgason heilbrigðisverkfræðingur segir um nýjung að ræða hérlendis en þetta hafi verið notað um nokkurra ára skeið erlendis. Verið sé að beita þessu á nýjum sviðum og fylgjast með vexti vöðva sem séu meðhöndlaðir með raförvun en það hafi ekki verið gert áður.