Sjálfstæðismenn fengju meirihluta

Sjálfstæðismenn fengju hreinan meirihluta í borginni, eða níu menn kjörna, ef kosið yrði til borgarstjórnar nú, samkvæmt nýrri skoðanakönnun Fréttablaðsins. Hvorki Framsóknarflokkurinn né Frjálslyndir næðu manni inn í borgarstjórn. Af þeim sem tóku afstöðu í könnun Fréttablaðsins, sem gerð var um helgina, sögðust 53,5 prósent kjósa Sjálfstæðisflokkinn, en í borgarstjórnarkosningunum árið 2002 fékk flokkurinn rúm 40 prósent atkvæða og sex borgarfulltrúa kjörna. Samkvæmt könnuninni nú, fengi Samfylkingin 29,7 prósent, eða fimm kjörna fulltrúa. Vinstri - grænir fengju einn borgarfulltrúa, en hvorki Framsóknarflokkurinn né Frjálslyndir næðu manni inn í borgarstjórn, því tæplega fimm prósent sögðust kjósa Framsókn og aðeins ríflega tvö prósent sögðust kjósa Frjálslynda flokkinn. Vilhjálmur Þ. Vilhjálmsson, oddviti sjálfstæðismanna í borgarstjórn, er ánægður með niðurstöðuna. Hann segist fyrst og fremst þakklátur borgarbúum fyrir það traust sem þeir sýni sjálfstæðismönnium og hann lýsi því hér með yfir að þeir muni ekki bregðast þeim væntingum sem til þeirra séu gerðar. Vilhjálmur fagnar samkeppni um fyrsta sæti lista sjálfstæðismanna fyrir kosningarnar næsta vor og segir samstarfið við Gísla Martein Baldursson hafa verið gott hingað til. Hann á von á skemmtilegri prófkjörsbaráttu. Hann vonist auðvitað til þess að hann fái traust til að leiða listann áfram og honum sýnist að árangur af starfi sjálfstæðismanna undir hans forystu sé nokkuð góður. Fylgi við flokkinn aukist í hverri könnuninni á fætur annarri. Þegar hann hafi tekið við sem oddviti hafi fylgið verið 41 prósent en nú sé það samkvæmt könnuninni 53,5 prósent og það verði að teljast nokkuð góður árangur. Alfreð Þorsteinsson, oddviti framsóknarmanna í Reykjavík, segir lítið að marka skoðanakannanir, enda sé baráttan um borgina varla byrjuð. Það sé hins vegar ekkert nýtt að framsóknarmenn hafi komið illa út úr skoðanakönnunum. Fyrir síðustu þingkosningar hafi því verið spáð að Framsóknarflokkurinn fengi ekki einn einasta þingmann í Reykjavík en hann hafi fengið þrjá þegar upp hafi verið staðið. Það sama sé uppi á tengingnum varðandi borgarstjórnarkosningarnar. Fylgi flokksins nú slagi hátt upp í einn mann en hann spái því að flokkurinn eigi eftir að auka fylgi sitt mjög verulega fram að kosningum í maí á næsta ári.