Fleiri fá að dreifa enska boltanum

Samkeppniseftirlitið hefur úrskurðað til bráðabirgða að Síminn hafi ekki einkarétt til að dreifa enska boltanum á netinu og Breiðbandinu. Magnús Ragnarsson sjónvarpsstjóri stöðva Íslenska sjónvarpsfélagsins segir fyrirtæki svikið. Samkeppnisstofnun, fyrirrennari Samkeppniseftirlitsins, hafi leyft samrunna Skjás eins og Símans. Í kjölfarið hafi það farið í milljarða fjárfestingu að áskriftarsjónvarpi í gegnum fjarskiptakerfin sem nú sé til einskis. Í bráðabirgðaúrskurði Samkeppniseftirlitsins segir hins vegar að Íslenska sjónvarpsfélaginu hafi verið veitt tækifæri til að festa rætur á áskriftarsjónvarpsmarkaði með því að áskriftastöð þeirra yrði einungis dreift með myndlykli frá fyrirtækinu til næstu tveggja ára. Sú ákvörðun veiti Símanum hins vegar ekki einkarétt á að dreifa Enska boltanum um dreifikerfi sín; Breiðbandið og um ADSL kerfi. Á það hafi verið bent í bréfaskriftum. Símanum sé skylt að leyfa öðrum fyrirtækjum að dreifa efninu í gegnum sín kerfi uppfylli þau málefnalegar kröfur, til að mynda gæðakröfur. Magnús segir úrskurðurinn virðast vera dauðadóm yfir áskriftarsjónvarpi Íslenska sjónvarpsfélagsins: "Samkeppniseftirlitið einblínir á fjarskiptamarkað en lætur sér engu varða hver staðan er á áskriftarsjónvarpsmarkaði," segir Magnús. Úrskurðurinn tryggi 365 ljósvakamiðlum stórkoslega yfirburði á því sviði. "Ég sé þetta ekkert öðruvísi en svik við félagið í vor þegar samið var samhliða um sameinigu félaganna 365 og OgVodafone annars vegar og Símans og Íslenska sjónvarpsfélagsins hins vegar. Þá hafði samkeppnisstofnun skilning á því að við værum dvergar á áskriftarsjónvarpsmarkaði en það sjónarmið virðist algerlega gleymt." Magnús segir nýja eigendur Símans hafa keypt hann í trú um að Enska boltanum yrði aðeins dreift hjá fyrirtækinu til ársins 2007: "Ég get ekki ímyndað mér annað en eigendurnir óski eftir skaðabótum í þessu máli." Erlendur Hjaltason fer fyrir nýjum eigendum Símans: "Engin ákvörðun verður tekin fyrr en ný stjórn hefur komið saman." Stjórnin verður kosin á laugardaginn.