Bjóða út næsta áfanga í mánuðinum

Næsti áfangi tvöföldunar Reykjanesbrautar, kaflinn milli Strandarheiðar og Njarðvíkur, verður boðinn út síðar í þessum mánuði. Miðað er við að framkvæmdir hefjist í vetur. Baráttumönnum fyrir bættri Reykjanesbraut þótti það stór dagur þegar Sturla Böðvarsson samgönguráðherra tók fyrstu skóflustungu að fyrsta áfanga að breikkun brautarinnar í janúarmánuði árið 2003. Vinnuvélar verktakafyrirtækisins Háfells hófu þegar að grafa en verksamningar gerðu ráð fyrir að níu kílómetrar yrðu tvöfaldaðir. Vinnan gekk framar vonum og svo hratt að Vegagerðin samdi við Háfell um að bæta við þremur kílómetrum og það var svo í júlímánuði í fyrrasumar sem samgönguráðherrann gat ekið um nýjan tólf kílómetra kafla og þar með opnað hann formlega, átján mánuðum eftir fyrstu skóflustungu. Ákvörðun ríkisstjórnarinnar í síðustu viku um ráðstöfun 1.600 milljóna króna af söluandvirði Símans til Reykjanesbrautar tryggir fjármögnun næsta áfanga, að sögn Jóns Rögnvaldssonar vegamálastjóra, en hann sagði í dag að stefnt væri að því að hann yrði boðinn út síðar í þessum mánuði. Það er 12 kílómetra langur kafli frá Strandarheiði, þar sem hætt var síðast, og alla leið að Njarðvík. Á þessum kafla verða gerð þrenn mislæg gatnamót, við Vogaafleggjara, Grindavíkurafleggjara og að nýju hverfi í Innri-Njarðvík. Jafnframt verða tvenn undirgöng fyrir gangandi vegfarendur og hestamenn. Tilboð verða væntanlega opnuð í nóvember og gætu framkvæmdir því hafist í kringum áramótin. Verklok verða miðuð við haustið 2007 en verktökum boðið upp á flýtifé takist að opna veginn fyrr. Eftir það verður aðeins einum kafla ólokið, sex kílómetra löngum frá Hafnarfirði og suður fyrir Straumsvík.