Brúðarkjólar keyptir á Netinu

Tilvonandi brúðir eru farnar að nýta sér Netið í auknum mæli til að kaupa ódýrari brúðarkjóla. Algengt leiguverð er 25 til 40 þúsund krónur en hægt er að kaupa kjóla á Netinu fyrir 10 til 15 þúsund krónur hingað komna. Eigendur kjólaleiga óttast þó ekki samkeppnina. Eins og fram hefur komið í ýmsum úttektum á brúðkaupum og kostnaðinum við þau er það langt í frá ókeypis að láta pússa sig saman - ekki síst að líta sæmilega út á meðan. Tilvonandi brúðir leita nú ýmissa leiða til að lækka kostnaðinn, og ein þeirra er að kaupa brúðarkjóla í gegnum Netið. Á uppboðssíðunni E-bay eru til dæmis hundruð brúðarkjóla til sölu, af öllum stærðum og gerðum, notaðir og ónotaðir. Verðið er allt frá nokkur þúsund krónum upp í um hundrað þúsund. Það er því hæglega mögulegt að fá kjól fyrir 10 til 15 þúsund krónur, með sendingarkostnaði. Hérlendis er algengt að borga 25 til 40 þúsund krónur fyrir leigu á kjól og stundum fylgihlutum. Svo er hægt að kaupa kjóla fyrir allt frá sextíu þúsund krónum og upp í hálfa milljón. Þrátt fyrir þetta virðast eigendur kjólaleiga ekki hafa miklar áhyggjur af samkeppninni við Netið. Sigurdís Ólafsdóttir, kjólameistari í Tveimur hjörtum, segist hafa sinnt þessum stúlkum, t.d. með því að leigja þeim undirpils og gera einhverjar breytingar ef kjólarnir passi ekki alveg. Svo þurfi einnig að hreinsa kjólana. Samkeppnin við Netið sé því ekki hættuleg. En ef hver kjóll borgar sig upp með því að leigja hann tvisvar þrisvar út, er þetta þá ekki gullnáma? Aðspurð hversu oft sé hægt að leigja hvern kjól út segist Sigurdís þurfa að meta það í hverju tilviki fyrir sig. Það fari t.d. eftir því í hvaða ástandi þeir komi aftur og úr hvaða efni þeir séu en ekki sé óalgengt að þeir fari fjórum sinnum í leigu.