Ógerlegt að taka RÚV af markaðinum

Markús Örn Antonsson telur nær ógerlegt að Ríkisútvarpið verði tekið af auglýsingamarkaði. Páll Magnússon, verðandi útvarpsstjóri, sagði í Íslandi í dag í gær og Kastljósi Ríkissjónvarpsins að hann teldi eðlilegt að skoða að stofnunin yrði ekki á þeim markaði. Markús hefur undirbúið áramótaávarpið fyrir arftaka sinn. Páll rætti vítt og breitt um starfsemi RÚV í Íslandi í dag í gær. Hann benti á að í Bretlandi sé BBC hlíft við að vera á auglýsingamarkaði því ef það sé þar geti það ekki alveg sinnt því hlutverki sem það eigi að vera. „Það er tekin menningarpólitísk ákvörðun um að reka hérna ríkisútvarp með sama hætti og menn ákveða að reka sinfóníuhljómsveit, en ekki þungarokkshljómssveit af því að markaðurinn sér um það. Það er til nóg af þungarokki án þess að ríkið sé að blanda sér þar inn í,“ sagði Páll. Og Páll kvað enn fastar að orði í Kastljósi Ríkissjónvarpsins þegar hann sagðist vilja sjá Ríkisútvarpið hverfa af auglýsingamarkaði.- Markús Örn Antonsson útvarpsstjóri er ekki sammála Páli. Hann segir þessa hugmynd oft hafa verið rædda í 75 ára sögu RÚV en raunsæissýn hans segi honum að afskaplega litlar eða engar líkur séu á að RÚV fengi bætt upp það sem það yrði af ef það hætti sölu auglýsinga sem nemi um 900 milljónum króna árlega. „Það hefur frekar verið tilhneiging hjá hinu opinbera til þess að svipta Ríkisútvarpið lögbundnum tekjustofnum,“ segir Markús.  Og verðandi útvarpsstjóri er ekki viss um að hann haldi áramótaávarp. Páll sagðist í þættinum í gær stundum hrifinn af gömlum hefðum hefðanna vegna, en hann geti ekki séð að það sé sérstök eftirspurn eftir því að hann tali á gamlárskvöld. Markús segist í seinni tíð hafa gert þetta með allt öðrum hætti en áður fyrr þar sem menn fluttu hugvekjur í útvarpi og sjónvarpi. Þetta sé orðið meira dagskrárefni með tónlistarívafi. Nú sé fólk út um allt land sem taki þátt í dagskrárgerðinni og reyndar sé undirbúningur þegar hafinn fyrir næsta áramótaávarp því þurft hefur að nota sumarið undir myndatökur, og hvetur Markús arftaka sinn til þess að hugsa sinn gang hvað þetta varði. „Sjónvarpið vonast ég náttúrlega til þess að sýni þetta alla vega, hvort sem það verði með útvarpsstjóra eða ekki,“ segir Markús.