Konur leggi niður störf 24. okt.

Aðstandendur baráttuhátíðar kvenna, sem haldin verður í tilefni að því að 30 ár eru liðin frá kvennafríinu, hvetja konur til leggja niður störf á kvennafrídeginum 24. október. Í tilkynningu frá aðstandendum hátíðarinnar eru konur eru hvattar til að leggja niður störf klukkan 14:08 en þá hafi þær unnið fyrir launum sínum ef litið sé til munar á atvinnutekjum karla og kvenna sem séu 64,15% af launum karla. Samkvæmt þessu séu konur búnar að vinna fyrir sínum launum eftir fimm tíma og átta mínútur ef miðað sé við vinnudag frá klukkan 9 til 17. Kröfuganga verður farin frá Skólavörðuholti klukkan 15 þennan dag, niður Skólavörðustíg og að Ingólfstorgi. Yfirskrift göngunnar er „Konur höfum hátt“ og eru konur hvattar til að taka með sér eldhúsáhöld, svo sem potta og járnsleifar til að framkalla hávaða. Hugmyndin er sú að konur hafa verið hljóðar of lengi og nú sé kominn tími til að þær láti í sér heyra og krefjist jafnréttis núna, eins og segir í tilkynningunni. Á Ingólfstorgi verður svo baráttufundur þar sem haldnar verða stuttar ræður og flutt menningardagskrá. Markmið kvennafrísins er það sama og fyrir 30 árum, að sýna fram á verðmæti vinnuframlags kvenna fyrir íslenskt efnahagslíf, en hvergi í heiminum er atvinnuþátttaka kvenna jafnmikil og hér á landi. Kvennafrídagurinn var fyrst haldinn á afmælisdegi Sameinuðu þjóðanna, 24. október 1975. Kvennaárið 1975 var upphafsár kvennaáratugar SÞ. Talið er að um 25.000 konur hafi safnast saman á baráttufundi á Lækjartorgi og var þetta líklega einn stærsti útifundur Íslandssögunnar. Langflestar konur lögðu niður störf þennan dag og atvinnulífið lamaðist, en aðgerðin vakti athygli víða um heim. Tugþúsundir kvenna eru félagar í þeim samtökum sem eiga aðild að því að undirbúa viðburði til að minnast merkisviðburða í sögu íslenskra kvenna á þessu ári. Félögin eru: Femínistafélag Íslands, Kvenfélagasamband Íslands, Kvennakirkjan, Kvenréttindafélag Íslands, Kvennasögusafn Íslands, Rannsóknastofa í kvenna- og kynjafræðum við Háskóla Íslands, Samtök um kvennaathvarf, Stígamót og UNIFEM á Íslandi. Kvennafundurinn á Þingvöllum 19. júní var afrakstur þessa samstarfs.