150 manns hafa leitað í dag

Nærri hundrað og fimmtíu manna lið björgunarsveita hefur í dag leitað þrjátíu og fjögurra ára gamals manns sem er enn saknað eftir sjóslysið á Viðeyjarsundi í gær. Orsök slyssins er enn ókunn. Þegar kvölda tók í gær var ákveðið að gera hlé á leitinni en mannsins hafði þá verið leitað frá því eldsnemma morguns. Laust fyrir klukkan níu í morgun hófu kafarar svo leitina að nýju. Fimmtán kafarar í fimm hópum fóru þá út með bátum og meðferðis var meðal annars nákvæm neðansjávarmyndavél, sem einnig er ómskoðunartæki. Upp úr hádegi voru svo fleiri bátar sendir á vettvang til að kemba sjóinn í námunda við slysstað. Fljótlega eftir það var svo haldinn fundur með fjölmennu liði leitarmanna við Sundahöfn þar sem nærri hundrað manns var skipt niður í rösklega tuttugu hópa. Leitin í dag náði eftir allri strandlengjunni, allt frá Gróttu að Kjalarnestánni. Þorvaldur sagðist um miðjan daginn reikna með að leitin stæði þangað til rökkva tæki en kafararnir gætu jafnvel haldið áfram lengur þar sem þeir væru ekki jafnháðir birtunni. Laust fyrir hálfsjö hafði leitin enn ekki skilað árangri. Kona um fimmtugt, sem fannst látin fljótlega eftir að tilkynnt var um slysið, var eiginkona mannsins sem er leitað. Hinum þremur sem voru í bátnum var bjargað af kili. Hjón, sem voru flutt alvarlega slösuð á gjörgæslu eftir slysið, eru bæði á batavegi og voru útskrifuð þaðan síðdegis í dag og liggja nú á almennri deild. Það varð þeim til happs að tíu ára sonur þeirra, sem slapp lítið meiddur, var með farsíma og hringdi eftir hjálp. Ekki er enn vitað hvað olli slysinu en báturinn virðist hafa siglt á fullri ferð utan í Skarfasker og sokkið strax í kjölfarið. Af ummerkjum að dæma hefur skipstjórinn ekki fylgt réttri siglingaleið sem mörkuð er með tveimur baujum á svæðinu og því aldrei átt að vera nærri skerinu. Reyndir skipstjórar á smærri bátum stytta sér reyndar stundum leið og fara inn fyrir skerið en strangt til tekið á aldrei að gera það. Rannsóknardeild lögreglunnar hefur hafið rannsókn á aðdraganda slyssins en þeir sem voru um borð hafa ekki verið ítarlega yfirheyrðir enn sem komið er.