Bush berst gegn staðreyndum

Síhækkandi eldsneytisverð og lítil fjölgun starfa eru horn í síðu George W. Bush forseta Bandaríkjanna þegar tæpir þrír mánuðir eru til forsetakosninga. Forsetinn verður að gera upp við sig hvort hann ætlar að viðurkenna hin efnahagslegu vandamál eða hvort hann ætlar að halda því streitu að efnhagurinn sé að batna þegar þess sjást engin merki. Þegar faðir forsetans, George Bush eldri, tapaði fyrir Bill Clinton í forsetakosningunum 1992 var það að stórum hluta vegna þess hann þótt ekki bera skynbragð á aðstæður hins venjulega launþega. Bush yngri hefur lagt mikið á sig til að sýnast betur heima í þessum efnum. En versnandi horfur í efnahagsmálum hafa gert að engu þá viðleitni Bush. Skoðanakannanir vestan hafs benda til að kjósendur hafi mun meiri trú á því John Kerry muni bæta efnahagsástandið. Hafa forystumenn demókrata lýst því yfir að Bush sé farinn að líkjas nátttrölli með tali sínu um batnandi horfur í efnahagsmálum. "Efnahagurinn stendur vel og fer batnandi," sagði Bush á fundi með fréttamönnum í Hvíta húsinu í fyrradag. "Í þessari kosningabaráttu ætlum við að leggja á áherslu á framtíðarsýn og hvernig efnahagurinn mun halda áfram að batna." Bush á hins vegar við vanda að etja því hagtölur sýna hið gagnstæða. Í fjóra mánuði í röð hefur hægt á fjölgun starfa, olíuverð hefur náð hverju hámarkinu á fætur öðru og einkaneysla er að dragast saman. Ef fram heldur sem horfir verður forsetatíð Bush yngri sú fyrsta frá því að Herbert Hoover var í Hvíta húsinu þar sem störfum fækkar í raun á kjörtímabilinu. Störf í Bandaríkjunum er nú 1,2 milljónum færri en þau voru þegar Bush tók við, þrátt fyrir um milljón ný störf hafi skapast. Þessu til viðbótar segja hagfræðingar á Bush eigi enga ása upp í erminni til að snúa taflinu sér í hag. Áhrif skattalækkana í upphafi kjörtímabilsnis eru að fjara út og bandaríski seðlabankinn undir forystu Alans Greenspans hefur notað öll þá ráð sem í hans valdi eru til að blása lífi í glæður bandarísks efnahags. Það sem gerir málið enn verra fyrir Bush er að efnahagsástandið er sýnu verst í þeim ríkjum sem gæti ráðið úrslitum í komandi forsetakosningum.