Meistaramót Íslands í frjálsum

77. Meistaramót Íslands í frjálsum íþróttum fer fram á Laugardalsvelli um helgina. Stutt er í ólympíuleikana í Aþenu og þetta mót er einn síðasti möguleiki fyrir keppendur að ná ólympíulágmarkinu. Samkvæmt skráningu í gær mæta 192 keppendur frá 17 félögum til leiks en flestir þátttakendur koma frá FH eða 50 og næstflestir koma frá ÍR eða 34. Dagskrá mótsins hefst á laugardag kl. 11:00 með forkeppni í langstökki kvenna. Mótssetning er síðan kl. 13:50 og síðasta keppnisgreinin er kl. 15:45 á sunnudag í 4 x 400 metra boðhlaupi kvenna. Það er Ungmennafélagið Fjölnir í Grafarvogi sem er framkvæmdaraðili að Meistaramóti Íslands að þessu sinni. Fréttablaðið hitti að máli þá Guðmund Karlsson, þjálfara frjálsíþróttalandsliðsins, og Jón Arnar Magnússon, tugþrautarkappa en hann ásamt Þóreyju Eddu Elísdóttur hafa tryggt sér þátttökurétt á ólympíuleikunum. Guðmundur Karlsson er bjartsýnn á góðan árangur á Meistaramótinu: "Það væri mjög gaman að sjá fólk skila toppárangri núna um helgina og sjá að það sé stígandi hjá þeim keppendum sem komnir eru á ólympíuleikana eða eru nálægt því - maður vill auðvitað sjá toppárangur á Meistaramóti Íslands. Ég vildi gjarnan sjá fleiri en Jón Arnar og Þóreyju Eddu ná inn á ólympíuleikana og vonast eftir því að 2-3 keppendur bætist í ólympíuhópinn og það gæti gerst um helgina. Það blása ferskir vindar um þessar mundir og ég tel að það sé góð innistæða fyrir frekari bætingum," sagði Guðmundur Karlsson. Jón Arnar Magnússon er í fínu formi og hlakkar til komandi átaka: "Staðan á mér núna er hörkugóð og mér hefur gengið mjög vel að undanförnu. Ég stefni að sjálfsögðu að góðum árangri á Meistaramótinu en stefnan er auðvitað sett á að toppa á ólympíuleikunum." Hvert er markmið Jóns fyrir ólympíuleikana? "Ég vonast til að vera á meðal átta efstu og það tel ég alveg vera raunhæft markmið og það væri ekki verra ef maður næði kannski að gera góða atlögu að íslandsmetinu," sagði Jón Arnar Magnússon.