Fyrsti titill Ólafs Arnar

Ólafur Örn Bjarnason og félagar hans í Brann tryggðu sér í gær norska bikarmeistaratitilinn í fótbolta þegar liðið bar sigurorð af Lyn, 4-1, í úrslitaleik á Ulleval-leikvanginum í Osló. Brann gerði út um leikinn á fyrstu 34 mínútum leiksins en þá voru öll mörk leiksins skoruð. Framherjinn Bengt Sæternes skoraði þrennu fyrir Brann og Skotinn Robbie Winters eitt mark. Ólafur Örn stóð vaktina vel í vörninni hjá Brann og fékk sex í einkunn hjá norska netmiðlinum Nettavisen. Þetta er fyrsti titill Ólafs Arnar en hann hefur áður leikið með Grindavík og sænska liðinu Malmö.