Frakkar senda herlið til Súdan

Þjóðir heims virðast smám saman vera að byrja að bregðast við neyðarástandinu í Darfur héraði, í Súdan. Frakkar eru að senda bæði hermenn og hjálpargögn til Darfur héraðs, til þess að vernda íbúana fyrir árásum arabískra vígasveita, en Súdan er fyrrverandi frönsk nýlenda. Hollendingar hafa samþykkt að taka að sér að flytja hermenn frá Afríkubandalaginu, til héraðsins. Arabísku vígasveitirnar hafa, til þessa að minnsta kosti, notið stuðnings stjórnvalda í Súdan, við sína illu iðju. Undanfarið eitt og hálft ár hafa þær myrt um 30 þúsund manns, og hrakið meira en milljón frá heimilum sínum. Skelfilegar fregnir hafa borist af skipulegum hópnauðgunum og pyntingum. Yfirgnæfandi meirihluti íbúanna í Súdan eru svartir afríkubúar, en arabískur minnihluti hefur lengi farið með völd í landinu. Sameinuðu þjóðirnar hafa samþykkt ályktun um að ríkisstjórnin skuli afvopna arabísku vígasveitirnar innanm þrjátíu daga. Stjórnvöld, sem neita öllum tengslum við sveitirnar, segja það vera óraunhæfar kröfur.