FH-ingar á toppinn

FH-ingar komust á topp Landsbankadeildarinnar í fyrsta sinn í sumar þegar þeir lögðu Fylkismenn, 1-0, í Kaplakrika í gærkvöld í uppgjöri toppliða deildarinnar. Þetta var jafnframt fyrsti sigur FH-inga á Fylki í deildinni í sex leikjum og fjórði leikurinn í röð sem Fylkis spilar án sigurs. Fylkismenn hófu leikinn af miklum krafti og Björgólfur Takefusa var hársbreidd frá því að koma þeim yfir tvívegis á fyrstu fjórum mínútum leiksins. Fyrst varði Daði Lárusson, markvörður FH, frá honum úr dauðafæri og síðan átti hann skot beint úr aukaspyrnu rétt yfir. Eftir snarpa byrjun fór allur kraftur úr leikmönnum liðanna og erfitt var að sjá að tvö af bestu liðum landsins væru að etja kappi saman. Fylkismenn voru meira með boltann en þeim gekk illa að skapa sér færi. Að sama skapi áttu FH-ingar erfitt með að finna taktinn sóknarlega fyrsta hálftímann. Þeir fengu sitt fyrsta almennilega færi eftir 36 mínútur en þá skallaði Emil Hallfreðsson yfir úr góðu færi eftir fallega sendingu frá Heimi Guðjónssyni. Jónas Grani Garðarsson fékk síðan dauðafæri til að koma FH-ingum yfir á 40. mínútu en hann skaut beint í fang Bjarna Þórðar Halldórssonar, markvarðar Fylkis, af stuttu færi eftir góðan undirbúning Atla Viðars Björnssonar. Staðan var því markalaus í hálfleik, hálfleik sem tvískiptur því Fylkismenn réðu ferðinni fyrri hlutann í hálfleiknum en FH-ingar seinni hlutann. FH-ingar hófu seinni hálfleikinn af miklum krafti og á 54. mínútu átti danski framherjinn Allan Borgvardt þrumuskot sem Bjarni Þórður Halldórsson varði vel. Hinn ungi og efnilegi Emil Hallfreðsson kom FH-ingum síðan yfir á 63 .mínútu með þrumuskoti frá vítateig sem Bjarni í marki Fylkis réð ekki við. Þetta mark reyndist vera eina mark leiksins, FH-ingar réðu ferðinni mest allan síðari hálfleikinn og þótt Fylkismenn hefðu pressað nokkuð undir lokin þá tókst þeim aldrei að ógna marki FH-inga að neinu ráði. FH-Fylkir 1-0 1–0 Emil Hallfreðsson 63. Dómarinn Jóhannes Valgeirsson góður Bestur á vellinum Emil Hallfreðsson FH Tölfræðin Skot (á mark)  9–14 (5–6) Horn 8–3 Aukaspyrnur fengnar 14–20 Rangstöður 6–0 Mjög góðir Emil Hallfreðsson FH Sverrir Garðarsson FH Góðir Tommy Nielsen FH Freyr Bjarnason FH Guðmundur Sævarsson FH Ólafur Stígsson Fylki Þórhallur Dan Jóhannsson Fylki Guðni Rúnar Helgason Fylki