Nær samkomulagi en fyrr

Minnu munar á kröfum kaþólikka og mótmælenda en nokkru sinni fyrr í langvinnum og erfiðum viðræðum um myndun nýrrar sjálfstjórnar á Norður-Írlandi. Þetta sagði Ian Paisley, leiðtogi mótmælendaflokksins DUP, í gær. Hann sagði að áður en af samkomulagi gæti orðið yrði Írski lýðveldisherinn að sýna fram á að hann hefði afvopnast. "Ef þú syndgar opinberlega verðurðu að iðrast opinberlega," sagði Paisley og krafðist þess að Írski lýðveldisherinn framvísaði myndum sem sýndu afvopnunina og eyðileggingu vopnabúra.