Ætlar að verða Herra Skandinavía

Garðar Gunnlaugsson, 21 árs málari, er Herra Ísland. Hann fer til Helsinki í næsta mánuði til að taka þátt í keppninni Herra Skandinavía.

"Ég er orðinn mjög spenntur og er búinn að vera að æfa að kappi síðustu vikurnar," segir Garðar Gunnlaugsson, 21 árs málari sem ber titilinn Herra Ísland. Garðar fer til Helsinki í næsta mánuði til að taka þátt í keppninni Herra Skandinavía. Nú segist hann hamast á fullu í Betrunarhúsinu undir stjórn Unnars Karlssonar einkaþjálfara til að fá skarpari líkamslínur og lifir á fæðubótarefni frá EAS sem hann segir hjálpa mikið til.

Garðar er kærasti Ásdísar Ránar Gunnarsdóttur sem hefur þjálfar margar íslenskar fyrirsætur. "Ásdís hefur hjálpað mér mikið. Hún leiðbeinir mér og gefur mér góð ráð enda veit hún alveg um hvað hún er að tala," segir Garðar og bætir við að Ásdís Rán muni að sjálfsögðu mæta á keppnina til að hvetja hann til dáða.

Garðar segir síðasta ár hafa verið frábært og hann mælir eindregið með þessari keppni fyrir aðra stráka. "Þetta er góð reynsla, maður kynnist fullt af frábærum strákum og þetta hjálpar vel upp á sjálfstraustið. Nú er bara um að gera að hugsa jákvætt og hafa trú á sjálfum sér. Ég stefni að sjálfsögðu á fyrsta sætið enda er ég mikill keppnismaður."

Garðar veit lítið um hvernig keppnin verður, hvort hann eigi að spranga um á sundskýlunni enda skipti það hann litlu máli. "Ég veit að verðlaunin eru glæsileg. Sigling á skemmtiferðaskipi og ársamningur við alþjóðlega módelskrifstofu og margt fleira svo nú er bara að standa sig vel."

Garðar viðurkennir að fallið verði dálítið hátt ef honum gangi ekkert í keppninni. Síðasta ár hafi verið frábært og hann hafi engan áhuga á að hversdagsleikinn taki strax við. "Þess vegna stefni ég á að vinna þennan titil, til að halda áfram að vera eitthvað. Ekki bara Garðar Gunnlaugsson málari. Annars er aldrei að vita hvað gerist. Þótt maður sé ekki akkúrat týpan fyrir dómnefndina verða þarna fullt af útsendurum frá fyrirsætuskrifstofum og ég væri alveg til í að prófa það. Enda er maður bara ungur einu sinni."