Erlent

Hetja frönsku andspyrnunnar látin

Ein hetja frönsku andspyrnunnar, Lucie Aubrac er látin 94 ára gömul. Aubrac varð fræg fyrir að aðstoða eiginmann sinn Raymond, sem var leiðtogi andspyrnuhreyfingarinnar og slapp úr þýsku fangelsi sumarið 1943. Aubracfjölskyldan flúði eftir það til London þaðan sem þau skipulögðu andspyrnu með útlagastjórn Charles de Gaulle. Tvær bíómyndir hafa verið gerðar um sögu Aubrac. Hún starfaði síðar sem sögu- og landafræðikennari.

Þessi íbúð er ekki nógu stór fyrir okkur bæði

Rússnesk kona borgaði fyrrverandi afbrotamanni fyrir að myrða 17 ára gamlan son sinn vegna þess að hún var þreytt á að deila eins herbergis íbúðarkytru með honum og kærustu hans. Sjálf átti konan kærasta þannig að þau voru fjögur í plássinu.

Stungu pilt til bana

Fimm ungmenni eru nú yfirheyrð af lögreglu í London grunuð um aðild að því að stinga 16 ára pilt til bana í Hammersmith-hverfi borgarinnar í gærkvöld. Pilturinn lést á sjúkrahúsi í nótt. Lögregla hvetur vitni að árásinni til að hafa samband. Í síðasta mánuði voru þrír táningar skotnir til bana í London í þremur aðskildum tilvikum og alvarlegar árásir hafa verið algengar upp á síðkastið.

Íranir auðga úran ótrauðir

Ahmadinejad Íransforseti segir að ályktun Öryggisráðs Sameinuðu þjóðanna um refsiaðgerðir gegn Íransstjórn verði ekkert annað en marklaust plagg og að Íranir muni halda kjarnorkuáætlunum sínum til streitu eins og ekkert hefði í skorist.

Ný hlébarðategund

Erfðavísindamenn hafa úrskurðað að hlébarðar sem finnast á eyjunum Súmötru og Borneó séu sérstök tegund. Þar til nú hafa hlébarðarnir verið taldir til annarar tegundar sem heldur til á meginlandi Suðaustur-Asíu. Nú segja vísindamenn að leiðir þessara tveggja tegunda hafi skilist fyrir meira en milljón árum síðan og hafi síðan þróast aðskilið. Hlébarðarnir eru stærstu rándýrin á Borneó og geta orðið álíka stórir og smávaxin pardusdýr. Það sem fyrst gaf vísbendingu um að sennilega væri um aðskildar tegundir að ræða var að munstrið á feldi þeirra er töluvert ólíkt því sem klæðir frændur þeirra á meginlandinu.

Skutu 50 lögreglumenn til bana

Uppreisnarmenn réðust að varðstöð lögreglu á Mið-Indlandi í dag og skutu 50 lögreglumenn til bana. Árásirnar urðu í Chhattisgarh-héraði Indlands en þar eru uppreisnarmenn Maóista fjölmennir. Þeir hafa í 30 ár barist, að því að þeir segja fyrir réttindum bænda sem ekki eiga jarðir og afskiptra ættbálka. Þúsundir hafa farist í árásum þeirra undanfarna áratugi á Mið- og Suður-Indlandi.

Vilja harðar aðgerðir gegn stjórnvöldum í Simbabve

Vesturveldin kalla eftir frekari viðskiptaþvingunum gegn stjórnvöldum í Simbabve eftir að þau leystu upp friðsamlegan fjöldafund stjórnarandstöðunnar um síðustu helgi. Bandarískir erindrekar hafa sagst vilja framlengja ferðabann og eignafrystingu og Bretar hvetja stjórnvöld í Evrópu til að ráðast í svipaðar aðgerðir.

Að ná samkomulagi um viðskiptaþvinganir á Íran

Sendiherrar stórveldanna Bandaríkjanna, Bretlands, Rússlands, Kína, Frakklands og Þýskalands hafa komist að samkomulagi um grundvallaratriði í nýjum viðskiptaþvingunum á hendur Írönum. Búist er við því að uppkast að ályktun þessa efnis verði lagt fyrir öryggisráð Sameinuðu þjóðanna á fundi í dag. Samkvæmt heimildum BBC innihalda þvinganirnar bann á vopnaútflutning frá Íran og að eignir helstu embættismanna landsins verði frystar. Íranir hafa haldið því statt og stöðugt fram að kjarnorkuáætlanir þeirra séu friðsamlegar en vesturveldin gruna þá um að reyna að þróa kjarnavopn.

Viðurkennir að skipuleggja árásir 11. september

Khalid Sheikh Mohammed, sá er sakaður hefur verið um að skipuleggja árásirnar 11. september 2001 viðurkenndi allar sakir í yfirheyrslum í Guantanamo-búðunum um helgina. Samkvæmt endurriti af yfirheyrslunum sem CIA, leyniþjónusta Bandaríkjanna hefur gefið út viðurkennir Mohammed að hafa skipulagt árásirnar á Tvíburaturnana og Pentagon auk þess sem hann sagðist hafa skipulagt árásir á Big Ben og Heathrow flugvöllinn í London.

Mótmæli settu svip á ferðina

George W. Bush, forseti Bandaríkjanna, lauk í gær sjö daga heimsókn sinni í Suður-Ameríku. Ofbeldisfull mótmæli einkenndu ferðina sem virðist aðallega hafa verið táknræn og til þess að bæta tengsl við álfuna þar sem engir nýir samningar voru gerðir.

Tengsl við offitu og sykursýki

Þalöt nefnast efnasambönd sem algeng eru í plastefni hvers konar, sápum og fleiri algengum hlutum í daglegu umhverfi okkar. Áður hafa vísindamenn fundið tengsl þalata við ófrjósemi, en nú hafa einnig fundist tengsl við offitu og insúlínþol í fullorðnum karlmönnum.

Þingflokkurinn andmælir Blair

Fjölmargir þingmenn breska Verkamannaflokksins gerðu uppreisn gegn formanni sínum, Tony Blair forsætisráðherra, vegna áforma hans um nýjar kjarnorkuflaugavarnir. Gagnrýnendur segja áformin grafa undan kröfum um að Íranar og fleiri þjóðir komi sér upp nýjum vopnum.

Byltingarkennt skref í loftslagsmálum

Árið 2050 mun Bretland hafa dregið úr útblæstri koldíoxíðs um 60 prósent og um 26 til 32 prósent árið 2020 miðað við stöðuna árið 1990 samkvæmt frumvarpsdrögum sem bresk stjórnvöld kynntu á þriðjudag.

Bjargaði 2.500 gyðingabörnum

Pólska þingið heiðraði í gær 97 ára gamla konu, Irenu Sendler, fyrir að hafa bjargað 2.500 gyðingum meðan á helförinni stóð.

Mohammed viðurkennir að hafa skipulagt árásirnar 11. september

Khalid Sheikh Mohammed, al-Qaida liði sem er í haldi Bandaríkjamanna í fangabúðunum við Guantánamo-flóa, viðurkenndi við yfirheyrslur í búðunum að hafa staðið á bak við árásirnar í Bandaríkjunum 11. september 2001.

Tíu ára stúlka í Egyptalandi greinist með fuglaflensu

Alþjóðaheilbrigðismálastofnunin greindi frá því í dag að tíu ára stúlka hefði greinst með fuglaflensu í Egyptalandi, en hún er 25. manneskjan þar í landi sem greinist með sjúkdóminn. Haft er eftir egypskum fjölmiðlum að komið hafi verið með stúlkuna á sjúkahús í gær þar sem hún þjáðist af hita og verkjum í vöðvum.

Hækkanir á mörkuðum í Bandaríkjunum í dag

Hlutabréfamarkaðir í Bandaríkjunum réttu sig af í dag eftir nokkuð skarpa lækkun í gær upp á tvö prósent sem hafði áhrif víða um heim. Dow Jones fór á tímabili niður fyrir 12 þúsund stig í dag í fyrsta sinn í fjóra mánuði en endaði 12.133 stigum í lok dags og hækkaði því um nærri hálft prósent frá því í gær.

Írar drykkfelldastir ESB-þjóða

Írar eru drykkfelldastir Evrópusambandsþjóða ef marka má niðurstöður nýrrar könnunar sem gerð var á drykkjuvenjum innan sambandsins. Rúmlega þriðjungur Íra drekkur áfengi í óhófi þegar hann fær sér í glas en með óhófi er miðað við fimm drykki eða meira í hvert skipti sem menn blóta Bakkusi.

Tillaga um endurnýjun kjarnorkukafbátaflota samþykkt

Þingmenn í neðri deild breska þingsins samþykktu í kvöld með yfirgnæfandi meirihluta tillögur Tonys Blairs, forsætisráðherra Bretlands, um að endurnýja kjarnorkuvopnabúr Bretlands.

Reka 300 starfsmenn

Danska ríkisútvarpið ætlar að segja upp 10% starfsmanna sinna á þessu ári vegna kostnaðar við byggingu nýrra höfuðstöðva sem hefur farið fram úr áætlun. Fjölmargir starfsmenn lögðu niður vinnu í dag til að mótmæla aðgerðunum.

Vaknaði og féll svo aftur í dá

Læknar í Bandaríkjunum standa ráðþrota frammi fyrir ráðgátunni um konuna sem vaknaði úr 6 ára dái, vakti í 3 daga og féll síðan aftur í dá. Þeir kunna engar skýringar á því hvað hafi vakið hana og síðan valdið því að hún féll aftur í dá.

Írak vill afnema dauðarefsingu

Ríkisstjórn Íraks, sem hlaut mikla gagnrýni fyrir hvernig staðið var að aftöku Saddams Hussein, vill afnema dauðarefsingu, að sögn mannréttindaráðherra landsins. Wijdan Michael segir að það verði gert í áföngum. Fyrsta skrefið verði að afnema dauðarefsingar fyrir brot önnur en þau allra verstu, svosem þjóðarmorð og glæpi gegn mannkyninu.

Bretar vilja ekki opna Heathrow

Bretar vilja fresta gildistöku samnings um frjálst flug milli Evrópu og Bandaríkjanna, um eitt ár. Samningurinn á að taka gildi í október á þessu ári, og kemur í staðin fyrir gamlan samning sem rekja má allt aftur til síðari heimsstyrjaldarinnar. Bretar veigra sér við því að létta hömlum af Heathrow flugvelli sem er stærsta flugmiðstöð í Evrópu.

Svartir sjónvarpsskjáir í Danmörku

Tsvangirai á gjörgæslu

Morgan Tsvangirai, leiðtogi stjórnarandstöðunnar í Zimbabwe hefur verið lagður inn á gjörgæsludeild á sjúkrahúsi vegna gruns um höfuðkúpubrot. Á myndum má sjá að hann er með svöðusár á höfði, sem hann hlaut meðan hann var í vörslu lögreglunnar. Talsmaður hans segir að Tsvangirai muni fara í heilaskönnun og einnig þurfi hann að fá blóðgjöf vegna mikils blóðmissis af sárum sínum.

Kosið um þjóðstjórn á laugardag

Kosið verður um hvort þjóðstjórn Palestínumanna nýtur trausts í þinginu nú á laugardag. Þetta samþykktu þeir Mahmoud Abbas forseti og Ismail Haniyeh forsætisráðherra í dag. Þetta hefur Reuters-fréttastofan eftir heimildamönnum sínum. Fatah- og Hamas hreyfingarnar samþykktu á fundi í Mekka fyrir um mánuði síðan að mynda þjóðstjórn Palestínumanna til að binda endi á skærur á milli stuðningsmanna fylkinganna.

Tilbreyting í kynlífinu

Lestarstjórar í Þrándheimi, í Noregi, horfa nokkuð áhyggjufullir til sumarsins sem brátt fer í hönd. Þá þurfa þeir að takast á við nýja hættu í starfi sínu. Nýjasta sportið hjá ungum spennufíklum í Norður-Noregi er nefnilega að stunda ástaleiki á járnbrautarteinum. Vandamálið er orðið það alvarlegt að þegar lestarstjórar í Þrándheimi mæta á vakt um helgar, fá þeir aðvörun, ef vitað er til þess að verið sé að halda partí í almenningsgarðinum í Verdal.

El Baradei segir viðræður hafa tekist vel

Mohammad El Baradei yfirmaður Alþjóðakjarnorkumálastofnunarinnar segir Norður-Kóreumenn staðfasta í áætlunum sínum um að láta af allri notkun kjarnorku. El Baradei er nýkominn til Peking í Kína þar sem hann vitnar um árangur af fundum sínum með yfirvöldum í Pyongyang, höfuðborg Norður-Kóreu. Hann sagðist vonast til þess að brátt gætu kjarnorkueftirlitsmenn Sameinuðu þjóðanna snúið aftur til Norður-Kóreu en það er talið lykilinn að árangri. Fyrir rétt um mánuði síðan samþykktu Norður-Kóreumenn að láta af allri notkun kjarnorku í skiptum fyrir efnahagsaðstoð í viðræðum sex ríkja, Norður- og Suður-Kóreu, Kína, Japan, Rússlands og Bandaríkjanna.

Tsvangirai höfuðkúpubrotinn

Morgan Tsvangirai leiðtogi stjórnarandstöðunnar í Simbabve er höfuðkúpubrotinn eftir ofbeldi lögreglu og er á gjörgæslu á spítala. Þetta sagði talsmaður hans í morgun. „Hann hefur þurft að fá lítra af blóði vegna þess að læknar segja að hann hafi misst mikið blóð. Þá var höfuð hans sneiðmyndað vegna þess að höfuðkúpan er brotin", sagði William Bango talsmaður Tsvangirai. Tsvangirai, sem er 55 ára þarf að líkindum að liggja um nokkra hríð á spítala að segir talsmaðurinn við Reuters-fréttastofuna.

Táningar sem fara í megrun líklegri til að þyngjast til lengri tíma

Táningar sem fara í megrun til að missa nokkur kíló eru líklegri en aðrir að sleppa morgunverði og til að borða á milli mála. Það gæti verið hluti skýringar þess að þessir táningar eru líklegri til þess að þyngjast til lengri tíma en þeir jafnaldrar þeirra sem ekki fara í megrun.