Lífið

"Þetta sport er búið að blómstra og er aðalsportið í dag“

Lilja Katrín Gunnarsdóttir skrifar
Guðmundur Örn og Guðjón fara yfir bogfimina.
Guðmundur Örn og Guðjón fara yfir bogfimina. Myndir/úr einkasafni

„Þetta sport er búið að blómstra og er aðalsportið í dag. Ég held að fólk fíli kikkið þegar það dregur apparat að sér og sleppir því hratt frá sér í skotmarkið og hittir þann punkt sem það vildi hitta,“ segir Guðjón Einarsson, einn af stofnendum Bogfimisetursins. Guðjón opnaði setrið ásamt Guðmundi Erni Guðjónssyni í nóvember árið 2012. Þá var hann nýbyrjaður að æfa sportið en hann hætti í vinnu sinni sem bifreiðasmiður til að einbeita sér að Bogfimisetrinu.

„Ég byrjaði í apríl árið 2012 og fór á fyrsta Íslandsmeistaramótið utandyra í júlí sama ár. Áhuginn var svo mikill. Vinur minn átti verkstæði og það var akkúrat keppnisvegalengd á milli veggja þannig að við vorum oft að æfa okkur að skjóta til fjögur, fimm á nóttunni. Konan var ekki sátt,“ segir Guðjón hlæjandi. „Ég fékk þetta algjörlega á heilann. Þetta er algjör snilld.“

Guðjón segir að hver sem er geti kíkt í Bogfimisetrið, sem starfrækt er á Akureyri og í Kópavogi, og prófað íþróttina en mælir með að fólk hringi á undan sér um helgar þar sem hópar flykkist í sportið um þessar mundir.

Hér sést Guðjón æfa sig ásamt Guðmundi Erni og Krissa.

„Þetta er afþreying sem öll fjölskyldan getur stundað. Þetta er einstaklingssport líka og ekki háð liðum. Hér getur maður komið að skjóta og verið algjörlega í sínum eigin heimi. Þetta er tæknilegt en í raun og veru þarf enga sérstaka hæfni til að stunda íþróttina. Maður er mjög snöggur að ná þessu upp að vissu marki og síðan þarf maður að hugsa aðeins lengra. Þetta snýst að einhverju leyti um búnað en líka um manninn á bak við bogann,“ segir Guðjón. 

Áður en Bogfimisetrið var opnað gat almenningur ekki prófað íþróttina neins staðar.
„Þá voru skráð tíu manns í bogfimi á Íslandi. Fyrsta árið sem við vorum með opið fjölgaði þeim í 250 og er fjöldinn nú kominn langt yfir þrjú hundruð manns,“ segir Guðjón en Bogfimisetrið leitar nú að útiaðstöðu.

Keppnisandinn er það sem heillar Guðjón mest við íþróttina en hann segir jafnframt að hópurinn sem stundar bogfimi sé mjög náinn.

„Þetta er mjög jákvætt sport og þéttur hópur sem stundar það. Félagsmenn hjálpa almenningi og hér er ekki til fýla. Það ríkir náttúrulega keppnisandi en alls ekki á neikvæðum nótum.“

Í Kópavogi komast allt að 27 manns samtímis að til að æfa sig og 30 manns á Akureyri

Yngsti iðkandinn fjögurra ára

• Allir eru velkomnir til að æfa bogfimi í Bogfimisetrinu en fjórtán ára og yngri aðeins í fylgd með fullorðnum.
• Yngsta manneskjan sem stundar bogfimi reglulega í Bogfimisetrinu er fjögurra ára stelpa og sá elsti maður um nírætt.
• Skipulagðar æfingar í bogfimi hófust árið 1974 á Íslandi með stofnun Íþróttafélags fatlaðra í Reykjavík og Íþróttafélags fatlaðra á Akureyri.
• Staðalbogi í markbogfimi kallast sveigbogi.
• Svokallaður trissubogi er vinsæll sem veiðibogi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.