Forsætisráðherra ritaði nafn sitt í minningabók um Jeltsín

Minningabók um Boris Jeltsín er í bústað rússneska sendiherrans að Túngötu 9 í Reykjavík. Fyrstur til að skrifa nafn sitt í bókina var Geir H. Haarde forsætisráðherra sem kom í sendiherrabústaðinn klukkan tíu í morgun.

Ríkið styður sjúkraþjálfun á hestbaki

Tryggingastofnun ríkisins mun framvegis taka þátt í kostnaði við sjúkraþjálfun á hestbaki fyrir fólk sem er með skaða í miðtaugakerfi eftir að heilbrigðisráðherra undirritaði reglugerð þessa efnis.

Samið við Norðmenn án samráðs við þjóðina

Samningar við erlend ríki um varnaraðstoð er ekkert smámál sem ber að afgreiða á nokkrum dögum að mati formanns Samtaka herstöðvaandstæðinga. Hann segir nauðsynlegt að þjóðinni sé gefinn kostur að ræða innihald og efni varnarsamningsins við Noreg áður en hann er undirritaður.

Kirkjan ekki golfvöllur heldur íslenskur úthagi

Herra Karl Sigurbjörnsson, biskup Íslands, sagði í yfirlitsræðu sinni á Prestastefnu á Húsavík að kirkjan væri ekki golfvöllur heldur eins og íslenskur úthagi þar sem rými væri fyrir fjölbreyttar skoðanir. Lét hann þau orð falla í tengslum við umfjöllun um staðfesta samvist fyrir samkynhneigða.

Olíuhreinsistöð í Dýrafirði gæti skaðað ferðaþjónustu á Vestfjörðum

Ferðaþjónusta á Vestfjörðum gæti borið skaða af tilkomu olíuhreinsistöðvar í Dýrafirði. Þetta kemur fram í grein Stefáns Gíslasonar, umhverfisstjórnunarfræðings, á fréttavefnum strandir.is. Hann telur að sú mengun sem hlýst af starfssemi stöðvarinnar muni skaði hreina ímynd Vestfjarða.

Menntaðir leikskólakennarar aldrei fleiri

Menntaðir leikskólakennarar eru hlutfallslega fleiri nú en nokkru sinni áður síðan Hagstofan hóf að safna slíkum upplýsingum saman árið 1998. Þetta kemur fram á vef Hagstofunnar. Þriðjungur allra starfsmanna sem sinna uppeldi og menntun barna í leikskólum með leikskólakennarapróf.

Viðvera leikskólabarna stöðugt að lengjast

Viðvera barna í leikskólum er stöðugt að lengjast samkvæmt tölum Hagstofunnar. Hlutfall þeirra barna sem eru átta tíma eða lengur á leikskólum hefur aukist úr 40 prósentum árið 1998 í 75 prósent í fyrra.

Prestastefna sett á Húsavík í kvöld

Prestastefna var sett með formlegum hætti á Húsavík í kvöld. Gengu prestar hempuklæddir frá Fosshótelinu á Húsavík að Húsavíkurkirkju þar sem dr. Auður Eir Vilhjálmsdóttir predikaði.

Sammála um að einfalda þurfi almannatryggingakerfið

Fulltrúar allra stjórnmálaflokka voru sammála um það á fundi um velferðarmál í kvöld að einfalda þyrfti almannatryggingakerfið og gera það aðgengilegra notendum þess.

Eltu uppi bílþjóf í Ölfusi

Lögreglan á Selfossi veitti í morgun manni eftirför sem stolið hafði sendibíl í Keflavík í nótt. Eftir því sem segir í tilkynningu frá lögreglu var hún að svipast um eftir bílnum í sínu umdæmi og mættu lögreglumenn honum á Krísuvíkuvegir í Selvogi.

Þurfum að passa upp á sama heimilið, jörðina

Það er sama hvar við staðsetjum okkur á pólitíska litrófinu, á endanum þurfum við að passa upp á sama heimilið, jörðina. Þetta segir Orri Vigfússon sem í gærkvöldi tók við hinum virtu Goldman-verðlaunum fyrir baráttu sína til verndar villtum laxi í Atlantshafinu.

Kosningafundur um velferðarmál

Fulltrúar stjórnmálaflokkanna sátu fyrir svörum á opnum fundi um velferðarmál sem hófst klukkan 20 á Grand-hóteli. Bein útsending var frá fundinum á Vísi.

Segir fátt koma í veg fyrir álver í Helguvík

Fátt kemur í veg fyrir byggingu álvers í Helguvík eftir undirritun orkusamnings í gær segir bæjarstjórinn í Reykjanesbæ. En álversandstæðingar Sólar á Suðurnesjum eru á öðru máli.

Stóru flokkarnir einhuga í skólamálum

Starfs- og iðnnám verður hafið til vegs og virðingar og jafnréttiskennsla tekin upp í skólum á næstu árum, ef marka má afstöðu allra flokka, nema Frjálslynda flokksins, til skólamála. Flokkarnir eru flestir sammála um að sporna þurfi við brottfalli íslenskra og erlendra nemenda úr framhaldsskólum.

ABC berast milljónir eftir umfjöllun Kompáss

ABC bjarnahjálpinni hafa borist milljónir í fjárstuðning og aðstoð eftir að fréttaskýringaþátturinn Kompás á Stöð 2 fjallaði um starf samtakanna í Kenýa á sunnudagskvöld.

Misáberandi frambjóðendur í baráttunni

Það var setið í hverju sæti í Litlu kaffistofunni í hádeginu þegar Árni Johnsen, frambjóðandi Sjálfstæðisflokksins í Suðurkjördæmi, og Bjarni Harðarson, frambjóðandi Framsóknarflokksins í kjördæminu, héldu þar kosningafund.

Svíar gefa Íslendingum 800 fornmuni

Svíar hafa ákveðið að afhenda Íslendingum til eignar hunduð fornmuna sem nú eru í geymslu í Norræna safninu í Stokkhólmi. Munirnir verða í framtíðinni geymdir í Þjóðminjasafni Íslands.

Ósamræmi í þjóðhagsspám fjármálaráðuneytis og Seðlabanka

Töluvert ósamræmi er í nýrri þjóðhagsspá fjármálaráðuneytisins og í spám Seðlabanka Íslands um horfur í efnahagsmálum. Seðlabankinn er svartsýnni á efnahagshorfur en fjármálaráðuneytið, sem spáir því að verðbólga lækki hratt á næstu mánuðum og að verulega dragi úr viðskiptahalla.

Samið við Dani og Norðmenn, enn rætt við Breta og Kanadamenn

Samningar um samstarf Íslendinga við Dani og Norðmenn í varnar- og öryggismálum á friðartímum verða undirritaðir á fimmtudaginn á NATO fundi í Ósló. Ekki fæst gefið upp hvað felst í þeim fyrr en eftir undirritun. Utanríkisráðherra segir Breta og Kanadamenn einnig áhugasama um samstarf en einhverjar vikur eða mánuði taki að ljúka samningum við þá.

Skilorðsbundið fangelsi fyrir vörslu amfetamíns

Karlmaður var í Héraðsdómi Reykjaness í dag dæmdur í níu mánaða skilorðsbundið fangelsi fyrir vörslu rúmlega 40 gramma af amfetamíni, en efnið fannst í bíl hans við leit lögreglu í september í fyrra.

Lygi að matarskortur sé á Kárahnjúkum

Verkamennirnir fjörutíu á Kárahnjúkum sem fengu magakveisu fyrir helgi hafa náð sér, segir Ómar R. Valdimarsson, talsmaður Impregilos. Hann segir ummæli fyrrum starfsmanns um að mennirnir hafi unnið tólf tíma samfleytt neðanjarðar án matar eða drykkjar í besta falli ósönn en í versta falli hreinar lygar.

Kærir Ísland í dag vegna umfjöllunar um aðbúnað verkamanna

Fyrirtækið Húsaleiga ehf. fól í dag lögmanni sínum að leggja fram kæru á hendur forsvarsmönnum Íslands í dag vegna umfjöllunar þáttarins um aðbúnað erlendra verkamanna á Íslandi.

Fjögurra mánaða fangelsi fyrir gáleysislegan akstur

Héraðsdómur Reykjaness hefur dæmt Pólverja í fjögurra mánaða fangelsi, þar af þrjá skilorðsbundna, og svipt hann ökuleyfi í þrjú ár fyrir að aka bíl undir áhrifum áfengis en bíllinn endaði á steinblokkum skammt frá IKEA-versluninni í Garðabæ og lést farþegi í bílnum við það.

Færri umferðaróhöpp vegna umferðaröryggisviku?

Átján umferðaróhöpp voru tilkynnt til lögreglunnar á höfuðborgarsvæðinu á síðasta sólarhring og segir lögregla það með minnsta móti. Óhöppin voru nær öll minni háttar og ekki er vitað um nein teljandi meiðsli á fólki.

Nokkuð um innbrot í gær

Sex innbrot voru tilkynnt til lögreglunnar á höfuðborgarsvæðinu í gær. Að sögn lögreglu var farið inn á þrjú heimili í austurborginni og eitt í Breiðholti en mismiklu var stolið. Á síðastnefnda staðnum var lyfjum meðal annars stolið en í austurborginni hurfu ferðatölva og myndavél á einum stað og sparibaukur á öðrum

Hjóluðu 172 hringi í kringum landið

Fyrirtækjakeppnin „Hjólað í vinnuna“ fer fram um land allt dagana 2.-22. maí. Þetta er fimmta árið sem hvatningarverkefnið fer fram, en þáttakan hefur tífaldast á tímabilinu. Í fyrra voru farnir rúmlega 230 þúsund kílómetrar. Það samsvarar 172 hringjum í kringum landið eða tæplega sex hringjum í kringum hnöttinn.

Norðurlönd efst í samkeppnisfærni

Velferð fyrir alla í beinni á visir.is

Bein útsending verður á visir.is frá opnum fundi um velferðarmál sem haldinn verður í kvöld klukkan átta á Grand hótel. „Velferð fyrir alla“ er yfirskrift fundarins.

Dagur umhverfisins - hrein orka og loftslagsmál

Dagur umhverfisins verður haldinn hátíðlegur í níunda sinn á morgun. Að þessu sinni er hann tileinkaður hreinni orku og loftslagsmálum. Í tilefni dagsins verður samkoma á Kjarvalsstöðum í hádeginu. Þar verða meðal annars veittar viðukenningar í verkefnasamkeppni grunnskólanna, Varðliðum umhverfisins.

Vinnueftirlitið lokaði aðrennslisgöngum Kárahnjúka

Vinnueftirlitið hefur stöðvað vinnu í aðrennslisgöngum Kárahnjúkavirkjunar vegna loftmengunar í göngunum, og hefur þeim verið lokað. Í tvígang í síðustu viku komu menn úr göngunum með veruleg eitrunareinkenni vegna eiturefna í loftinu; fjórir menn í hvort skipti. Vegna ólofts glíma menn við andþyngsli og asma.

Amtsbókasafnið á Akureyri 180 ára

Amtsbókasafnið á Akureyri er 180 ára á morgun. Í tilefni þess verður boðið upp á ýmislegt góðgæti, útlán verða frí auk þess sem morgundagurinn verður sektarlaus dagur. Amtbókasafnið var stofnað árið 1827 af Grími Jónssyni amtmanni á Möðruvöllum. Hann fékk dyggan stuðning frá ýmsum aðilum bæði hérlendis og í Danmörku.

Löggan með blikkljós á völdum gatnamótum

Á miðvikudag, fimmtudag og föstudag verða lögreglubifreiðar áberandi og með kveikt á bláum og blikkandi forgangsljósum á þrennum gatnamótum í Reykjavík þar sem mikið er um umferðaróhöpp. Þetta er gert í tilefni alþjóðlegrar umferðaröryggisviku sem stendur yfir dagana 23. - 27. apríl en hún er haldin að frumkvæði Sameinuðu þjóðanna

Pétur Pétursson þulur látinn

Pétur Pétursson fyrrverandi þulur á Ríkisútvarpinu lést í gær. Hann varð 88 ára. Hann hóf störf sem þulur hjá Útvarpinu árið 1941 og starfaði þar samfleytt til ársins 1955. Eftir 15 ára hlé hóf hann aftur störf hjá RUV og starfaði þar meðan aldur leyfði. Á fréttavef RUV kemur fram að Pétur hafi stundað nám í Svíþjóð og á Bretlandi á fjórða áratugnum.

Ganga til viðræðna við borgina um Lækjargötu 2

Borgarstjóri getur ekki lofað þeim sem voru með rekstur í Lækjargötu 2 áður en húsið brann, að þeir geti haldið rekstrinum áfram eftir að húsið hefur verið endurbyggt. Það skýrist á næstu tveimur vikum eða svo, hvort borgin kaupir lóðir húsanna sem brunnu í miðborginni, en eigendur Lækjargötu 2 hafa samþykkt að ganga til viðræðna við borgina.

SAMAN hópurinn fær Íslensku lýðheilsuverðlaunin

Íslensku lýðheilsuverðlaunin 2007 voru veitt við hátíðlega athöfn í Ráðherrabústaðnum við Tjarnargötu í morgun. Handhafi verðlaunanna í ár er SAMAN hópurinn og veitti Siv Friðleifsdóttir heilbrigðis- og tryggingamálaráðherra hópnum verðlaunin fyrir að leiða saman ólíka aðila til stuðnings íslenskum foreldrum í vandasömu uppeldishlutverki þeirra.

Einmana börn frekar fórnarlömb kynferðisbrota

Á síðustu fimmtán mánuðunum hefur tuttugu og eitt kynferðisbrotamál verið kært þar sem gerandi komst í kynni við fórnarlambið í gegnum netið. Sérfræðingur Barnahúss telur einmana börn frekar verða fórnarlömb í slíkum málum þar sem þau hafi oft lága sjálfsmynd og eigi erfitt með að segja nei. Einmana börn voru umræðuefnið á morgunverðarfundi á Grand hóteli í morgun.

Svíar skila fornmunum til Íslands

Hundruð íslenskra fornmuna sem hafa verið geymslu í Det Nordiske Museum í Stokkhólmi verða fluttir hingað til lands á næstunni. Munirnir verða gefnir Þjóðminjasafni Íslands og er það samkvæmt samkomulagi íslenskra og sænskra stjórnvalda.

Háhýsi í stað gömlu húsanna í miðbænum

Lítið lát er á hugmyndum landsmanna um húsakost við Lækjartorg og sýnist sitt hverjum hvort varðveita eigi gömlu húsin á horni Lækjargötu og Austurstrætis eða byggja þar ný hús. Arkitektar og skipulagsfræðingar kasta nú á milli sín margskonar hugmyndum í þessu efni. Þær byggja meðal annars á hugmyndum Hrafns Gunnlaugssonar um stórhýsi á grunnum brunarústanna við Lækjartorg.

Árituð smásaga eftir Kjarval boðin upp

Á uppboðsvefnum ebay.com er nú til sölu hefti eftir Jóhannes S. Kjarval sem ber heitið „Hvalasagan frá átján hundruð nítíu og sjö,“ auk fleiri muna. Innan á kápu heftisins er áritun frá Kjarval til Ástu, sem eigandi heftisins, sem ekki vill láta nafns síns getið, telur að sé amma sín. Hann segir heftið einstakt, ekki síst vegna áritunarinnar, og opnunarboðið á ebay hljóðar upp á 58.500.00 dollara, eða tæpar 3,8 milljónir íslenskra króna.

Fólk tvírukkað fyrir skil á ónýtum dekkjum

Brögð eru að því að dekkjaverkstæði rukki fólk fyrir að skila inn ónýtum dekkjum þrátt að þau gjöld séu innifalin í kaupverði dekkjanna að sögn verkefnastjóra Úrvinnslusjóðs. Fólk er því í sumum tilvikum að tvígreiða úrvinnslugjaldið.

Of mikil skerðing á þjónustu Strætós

Fulltrúar minnihluta borgarstjórnar telja að skerðing á þjónustu Strætós næstkomandi sumar muni leiða til fækkunar farþega. Til stendur að lengja tíma milli ferða upp í 30 mínútur. Breytingarnar taka gildi 1. júní næstkomandi. Fulltrúar Samfylkingar og Vinstri grænna eru alfarið á móti breytingunum og telja of langt gengið.

Minnkandi verðbólga og vaxandi atvinnuleysi

Vaxandi atvinnuleysi og minnkandi verðbólga í kjölfar kólnun hagkerfisins mun einkenna íslenskt efnhagslíf á næstu árum. Þetta kemur fram í nýrri þjóðhagsspá fjármálaráðuneytisins sem birt var í dag. Gert er ráð fyrir miklum samdrætti í fjárfestingum á næsta ári.

Falsaðir peningaseðlar í umferð

Lögregla hvetur afgreiðslufólk að vera á varðbergi gagnvart fölsuðum peningaseðlum sem eru í umferð. Nokkur tilvik hafa verið tilkynnt að undanförnu þar sem starfsfólk verslana hefur tekið við heimagerðum seðlum. Lögregla beinir þeim tilmælum til afgreiðslufólks að það taki ekki við hugsanlega fölsuðum seðlum.

Framsóknarmenn útskýra Íslandskortið

Framsóknarráðherrarnir Jón Sigurðsson, iðnaðar- og viðskiptaráðherra og Jónína Bjartmarz, umhverfisráðherra, standa fyrir opnum fundi á Sólon Bankastræti, þar sem fjallað verður um auðlindanýtingu, náttúruvernd og loftslagsmál. Þar verður Íslandskort Framsóknar um sátt og nýtingar auðlinda útskýrt fyrir fundargestum. Á kortinu má sjá þá staði sem flokkurinn telur að mögulega megi virkja, þá sem Alþingi eigi að taka ákvörðun um og þá sem framsóknarmenn telja alla röskun óheimila. Fundurinn hefst klukkan tólf.

Norskar herþotur í Keflavík

Fjallað er ítarlega um væntanlegt varnar- og öryggissamstarf Íslands og Noregs í norska dagblaðinu Aftenposten í dag. Þar kemur fram að það verði meðal annars í verkahring norska flughersins að sjá um eftirlit í lofthelgi Ísland á friðartímum. Að mati greinarhöfunds eru Norðmenn þannig að koma Íslendingum til hjálpar svo þeir geti viðhaldið sjálfstæði sínu.