Aðgreining á nef- og munntóbaki liggur fyrir í haust

Aðgreining á nef- og munntóbaki mun ekki liggja fyrir fyrr en í haust. Þá er áætlað að leggja fram frumvarp til laga um breytingar á lögum um tóbaksvarnir. Meðal þeirra atriða sem tekið verður á í frumvarpinu er skilgreining á nef- og munntóbaki, að því er Margrét Erlendsdóttir, upplýsingafulltrúi velferðarráðuneytisins, greinir frá.

Öflugur jarðskjálfti skók miðhluta Chile

Öflugur jarðskjálfti sem mældist 7,1 á Richter skók miðhluta Chile í gærdag.

Tveir bílar eyðilögðust í eldi

Tveir mannlausir bílar eyðilögðust í eldi þar sem þeir stóðu fyrir utan iðnaðarhús við Bygggarða á Seltjarnarnesi.

Sumarbústaður brann til kaldra kola í nótt

Gamall sumarbústaður við Rauðavatn í Reykjavík brann til kaldra kola í nótt. Hann var mannlaus.

James Cameron komst niður á 11 kílómetra dýpi

Kanadíski kvikmyndaleikstjórinn James Cameron komst í gærkvöldi niður á botn í Maríana-gilinu í Kyrrahafi eða niður á 11 kílómetra dýpi en í gilinu er mesta hafdýpi heimsins.

Obama vill verulega fækkun kjarnorkuvopna í Bandaríkjunum

Barack Obama Bandaríkjaforseti vill draga verulega úr fjölda kjarnorkuvopna í Bandaríkjunum. Hann þarf þó að sannfæra Rússa um að gera slíkt einnig.

Vilja völl til að byggja upp rugby-íþróttina

„Við erum ekki að biðja um peninga heldur einungis svæði til að vinna með. Það er algjört lykilatriði að fá slíku svæði úthlutað, því þá skapast möguleiki til að sækja um styrki til Alþjóða rugbysambandsins, Rugbysambands Evrópu og víðar. Við fáum ekki styrki til að byggja upp aðstöðu ef við höfum ekki svæði til að byggja aðstöðu á,“ segir Kristinn Þór Sigurjónsson, formaður Rugby Ísland, félagasamtaka sem hafa það að markmiði að byggja upp rugby-íþróttina á Íslandi með ýmsum hætti.

Kallað á gjaldtöku vegna skipakomu

Hugmyndir eru uppi um að leggja sérstakt gjald á farþega skemmtiferðaskipa sem rynni til umbóta í umhverfismálum.

Falbauð fundi með ráðherrum

Peter Cruddas, einn af gjaldkerum breska íhaldsflokksins, hefur sagt af sér eftir að blaðamenn Sunday Times komu upp um tilraunir hans til að selja auðmönnum aðgengi að David Cameron og George Osbourne, forsætis- og fjármálaráðherrum landsins.

300 þúsund leituðu hælis í ESB-ríkjum

Hælisleitendum fjölgaði í Evrópusambandsríkjum í fyrra miðað við árið áður. 301 þúsund manns leituðu hælis í fyrra en 259 þúsund árið 2010. Þetta kemur fram í tölum Eurostat, hagstofu Evrópusambandsins.

Gæti bætt gæði stórra útsendinga á netinu

Lektor í tölvunarfræði við Háskólann í Reykjavík vinnur nú að lausn sem talin er geta dregið úr álagi á netþjóna og þar með bætt gæði stórra útsendinga á veraldarvefnum. Alþjóðlegu tæknirisarnir Intel og Netflix hafa þegar sýnt verkefninu áhuga.

Allt að átta milljóna munur á verðmati

Ásett verð íbúðar getur haft afgerandi áhrif á endanlegt söluverð hennar. Í nýrri íslenskri rannsókn voru fasteignasalar beðnir um að meta sömu íbúðina og var allt að átta milljóna munur á mati þeirra.

Kynna nýtt kvótafrumvarp á morgun

Jóhanna Sigurðardóttir, forsætisráðherra, og Steingrímur J. Sigfússon, sjávarútvegs- og landbúnaðarráðherra, ætla að kynna nýtt frumvarp um stjórn fiskveiða og veiðigjöld. Fundurinn verður haldinn í Víkinni - Sjóminjasafni klukkan 16 á morgun. Jóhanna og Steingrímur munu fara yfir efni frumvarpanna.

Ökumaður rútunnar handtekinn

Sextíu og fimm ára gamall ökumaður flutningabíls sem ók aftan á rútu á hraðbraut í miðhéruðum Englands í gærmorgun er látinn. Þar með eru fórnarlömb slyssins orðin tvö en þrjátíu og fimm ára gamall farþegi rútunnar var úrskurðaður látinn á slysstað. Fjölmargir slösuðust og þar af liggur einn þungt haldinn á sjúkrahúsi. Ökumaður rútunnar var handtekinn í gær grunaður um að hafa valdið slysinu með glæfralegrum akstri en honum hefur verið sleppt gegn tryggingu. Mikil þoka var á svæðinu þegar umferðarslysið varð en það er sagt eitt það versta í sögu Bretlands í um áratug.

Fjölskyldurnar fá skaðabætur

Fjölskyldur þeirra sem misstu ættingja í blóðbaðinu í Kandahar í Afganistan fyrr í þessum mánuði, þegar bandaríski hermaðurinn Robert Bales myrti sautján óbreytta borgara, hafa fengið greiddar skaðabætur frá Bandaríkjaher.

Búið að dæla olíunni úr Costa Concordia

Búið er að dæla allri olíu upp úr tönkum skemmtiferðaskipsins Costa Concordia sem strandaði undan ströndum Toskana á Ítalíu í byrjun árs.

Björn styður ekki Ólaf Ragnar í forsetakosningunum

Björn Bjarnason, fyrrum dómsmálaráðherra, vill að Ólafur Ragnar Grímsson, forseti Íslands, láti af embætti. Þetta segir Björn á Facebook-síðu sinni. Hann segir að það sé mikill misskilningur að hann styðji Ólaf Ragnar í komandi forsetakosningum. Hann telji þvert á móti að hann eigi að hverfa til annarra verkefna líkt og hann sagði í nýársávarpi sínu. Forsetakosningarnar fara fram í júní á þessu ári, en þrír hafa lýst yfir framboði. Þeir Ástþór Magnússon, Jón Lárusson, lögreglumaður og Ólafur Ragnar.

Hallgrímur í 8. sæti á Amazon

Bók Hallgríms Helgason, The Hitman's Guide to Housecleaning, eða 10 ráð til að hætta að drepa fólk og byrja að vaska upp, er í áttunda sæti á vinsældalista Amazon yfir bækur í Kindle-rafbókarformi. Bókin er gefin út af Amazon bæði í Kindle- og kiljuformi og kom inn á sölusíðuna á í lok janúar á þessu ári.

Tvær skærustu reikistjörnurnar sjást mjög vel í kvöld

Næstu tvö kvöld gefst landsmönnum tækifæri á að sjá tvær skærustu reikistjörnurnar og mánann dansa saman á himnum. Síðustu forvöð til að sjá þríeykið saman í langan tíma segir stjörnuáhugamaður.

Jón Bjarnason segir Dani ekki ráða við makríldeiluna

Nánast engar líkur eru taldar á því að Danir ráði við að opna á aðildarviðræður ESB við Íslendinga um sjávarútvegsmál. Þetta segir Jón Bjarnason, fyrrverandi sjávarútvegs- og landbúnaðarráðherra. Til stóð að opna umræðurnar í haust en þeim hefur ítrekað verið frestað og nú síðast vegna deilna um rétt Íslendinga til markrílveiða.

Tólf látist af völdum svínaflensu á Indlandi

Að minnsta kosti tólf hafa látist af völdum svínaflensu á Indlandi það sem af er þessum mánuði og yfir hundrað eru sýktir.

Þóra Arnórs íhugar forsetaframboð

Sjónvarpskonan Þóra Arnórsdóttir íhugar að bjóða sig fram gegn sitjandi forseta. Ný könnun sýnir að flestir þeirra sem vilja sjá nýjan forseta á Bessastöðum styðja Þóru.

Þvottavél brann yfir

Tilkynnt var um eld í húsi í Mosfellsbæ klukkan hálf ellefu í morgun. Í ljós kom að þvottavél hafði brunnið yfir og var mikill reykur í þvottahúsinu. Slökkviliðið sá um að reykræsta húsið. Engin slys urðu á fólki.

Neyddu stúlkur í vændi - strikamerki húðflúrað á úlnliðinn

Rannsókn spænsku lögreglunnar á umfangsmiklum vændisglæpahring leiddi meðal annars til þess að nítján ára stúlku var bjargað. Stúlkan var með strikamerki húðflúrað á úlnliðinn á sér, en lögreglan segir að höfuðpaurarnir hafi gert það eftir að hún reyndi að flýja fyrir nokkrum mánuðum.

Bróðir Merah líklega ákærður

Bróðir skotárásarmannsins í Toulouse í Frakklandi verður hugsanlega ákærður fyrir þátttöku í morðunum og að skipuleggja hryðjuverkaárásir. Breska fréttastofan Sky greinir frá þessu. Mohammed Merah var skotinn til bana af frönskum leyniskyttum fyrr vikunni eftir umsátursástand við heimili hans. Hann er talinn hafa myrt sjö manns. Bróðir hans var í framhaldinu handtekinn og yfirheyrður. Lögreglan telur nú að hann hafi tekið þátt í að skipuleggja árásirnar.

Obama í Kóreu

Obama bandaríkjaforseti heimsótti landamæri Norður- og Suður Kóreu í gær, þrátt fyrir aukna spennu á milli ríkjana vegna fyrirhugaðra eldflaugaskota Norður Kóreu. Bandarísk stjórnvöld óttast að um einhvers konar vopnaprófun sé að ræða en Norður Kóresk stjórnvöld segjast vilja koma gervihnetti á sporbaug um jörðu.

Leituðu að manni í Reykjavíkurhöfn

Kafarar lögreglunnar og slökkviliðsins á höfuðborgarsvæðinu leituðu í nótt að manni sem talið var að hefði hent sér í sjóinn. Björgunarbátar frá Landsbjörgu leituðu sömuleiðis meðfram ströndinni. Félagi mannsins hafði samband við lögreglu og taldi manninn hafa steypt sér í sjóinn. Leitaraðgerðirnar stóðu í tæpa þrjá klukkutíma en þegar farsími mannsins var miðaður út kom í ljós að maðurinn var heima hjá sér, bæði þurr og heill á húfi.

Lést í umferðarslysi

Maðurinn sem lést í umferðarlysi í Hrútafirði á föstudag hét Knútur Trausti Hjálmarsson. Hann var fæddur 19. febrúar 1988 og var búsettur í Reykjavík. Knútur var ókvæntur og barnlaus. Bíll sem Knútur ók valt síðdegis á föstudaginn í Hrútafjarðarhálsi. Samkvæmt upplýsingum frá lögreglunni á Blönduósi kastaðist hann út úr bílnum. Akstursskilyrði voru góð þegar slysið varð. Þetta er fyrsta banaslysið í umferðinni á árinu.

Manni hótað með exi

Ráðist var að ungum manni í Kópavogi um áttaleytið í gærkvöld, honum hótað með exi og rændur. Árásarmannanna er nú leitað, eftir því sem fram kemur í samantekt lögreglunnar á höfuðborgarsvæðinu.

Nítján fórust í rútuslysi

Að minnsta kosti nítján fórust og yfir þrjátíu eru slasaðist eftir að rúta féll ofan í gljúfur í vesturhluta Alsír í morgun. Samkvæmt fréttastofunni APS missti bílstjórinn stjórn á rútunni í beygju með þeim afleiðingum að hún steyptist ofan í glúfrið. Slysið átti sér stað í grennd við bæinn Tiaret, um 250 kílómetrum frá höfuðborginni. Yfirvöld hafa undanfarið verið í sérstöku umferðarátaki en um fjögur þúsund manns látast árlega í umferðarslysum í landinu.

Tvöfaldur næst

Enginn var með allar fimm tölurnar réttar og verður 1. vinningur því tvöfaldur í næstu viku. Bónusvinningur gekk ekki heldur út og verður hann líka tvöfaldur í næstu viku.

Flugfreyjufélagi Íslands stefnt fyrir Félagsdóm

Samtök atvinnulífsins hafa fyrir hönd Iceland Express stefnt Flugfreyjufélagi Íslands fyrir Félagsdóm vegna ólögmætrar verkfallsboðunar af hálfu félagsins. Er gert ráð fyrir að niðurstaða Félagsdóms liggi fyrir eftir helgi og því verði engin röskun á starfsemi félagsins.

Vélsleðamaður fór niður um ís

Vélsleðamaður fór niður um ís á Svínavatni á Húnavöllum á fjórða tímanum í dag. Björgunarsveitirnar Blanda á Blönduósi og Strönd á Skagaströnd voru kallaðar út, þar sem óttast var um að maðurinn myndi kólna hratt niður í vatninu. Þó fór betur en á horfiðst og náði maðurinn í land og voru björgunarsveitirnar afturkallaðar um 15 mínútum síðar. Þær fóru þó á staðinn til að reyna að ná sleðanum upp úr vatninu.

Lenti með veikan farþega

Boeing 747 farþegaþota frá flugfélaginu Lufthansa lenti á Keflavíkurflugvelli upp úr klukkan hálf fjögur í dag með veikan farþega um borð. Vélin lagði af stað frá Frankfurt fyrr í dag en hún var á leið til Bandaríkjanna. Farþeganum var komið undir læknishendur í Reykjanesbæ en sjúkrabíll beið eftir honum á flugvellinum. Hann er ekki alvarlega veikur. Flugvélin er farin aftur í loftið og lendi í Bandaríkjunum í kvöld.

Veikindi ekki vegna mengunar

Veikindi hrossa á bænum Kúludalsá í Hvalfirði eru ekki af völdum mengunar iðjuveranna á Grundartanga, er niðurstaða rannsóknar Matvælastofnunar og Tilraunastöðvarinnar á Keldum. Veikindi hrossanna má rekja til efnaskiptaröskunar.

Undirbúa uppsetningu Svanavatnsins

Nemendur Listdansskóla Íslands leggja nú nótt við dag við undirbúning stórsýningarinnar Svanavatnið í Svartaskógi sem flutt verður í Borgarleikhúsinu á mánudag klukkan fimm og átta.

Stefnir í þriðja stjórnsýslustigið

Aukið hlutverk landshlutasamtaka sveitarfélaga í tengslum við yfirtöku verkefna frá ríkinu stefnir í að upp byggist þriðja stjórnsýslustigið á Íslandi, sagði Halldór Halldórsson, formaður Sambands íslenskra sveitarfélaga, á landsþingi sambandsins á föstudag.

Tveir af hverjum þremur vilja nýjan forseta

Tveir af hverjum þremur vilja nýjan forseta á Bessastaði, eða rúm 66 prósent landsmanna. Þetta er niðurstaða nýrrar könnunar Capacent Gallup. Tæplega 34 prósent þeirra sem tóku afstöðu í könnunni vildu helst sjá Ólaf Ragnar Grímsson gegna embætti forseta Íslands áfram.

Perlan verði Náttúruperlan

Hópur fjárfesta sem bauð hæst í Perluna í útboði Orkuveitunnar hefur óskað eftir afstöðu skipulagsráðs til tillögu sem felur í sér tvær viðbyggingar við húsið sem bera muni nafnið Náttúruperlan.

Þrettán ára piltur skotinn til bana í mótmælum

Þrettán ára gamall piltur var skotinn til bana í óeirðum í borginni Port Said í Egyptalandi í gærkvöldi og fjölmargir eru slasaðir. Ástæða óeirðanna er sú að nýlega var knattspyrnulið borgarinnar sett í keppnisbann til ársloka 2013 eftir að uppþot varð á heimaleik liðsins í febrúar síðastliðnum þar sem að minnsta kosti 74 létu lífið.

Vélsleðamaðurinn kominn í sjúkrabíl

Vélsleðamaðurinn sem slasaðist sunnan við Hrauneyjalón í Hrauneyjum er kominn í sjúkrabíl. Fimm björgunarsveitarmenn sóttu manninn rétt fyrir hádegi í dag. Hann kvartaði yfir eymslum í baki og samkvæmt upplýsingum frá flugbjörgunarsveitinni verður hann fluttur í bæinn til frekari skoðunar. Maðurinn var í hópi manna þegar snjór hrundi skyndilega undan sleðanum með þeim afleiðingum að hann féll af sleðanum.

Óljóst með makrílinn

Sátt er að nást um nýtt frumvarp um stjórn fiskveiða en frumvarp Steingríms J. Sigfússonar, sjávarútvegsráðherra, var rætt og samþykkt í ríkisstjórn í gær. Enn er togast á um einstök atriði milli stjórnarflokkanna; hlutfall afla í leigupotti og hvernig farið verður með aflaheimildir í nýjum tegundum eins og makríl.

Opinn fundur um ímynd bifhjólafólks

Opinn fundur um ímyndarmál bifhjólafólks verður haldinn á Grand hóteli í Reykjavík á þriðjudaginn næstkomandi. Á vefsíðu bifhjólasamtakanna Sniglanna, segir að tilurð fundarins sé sú umræða sem skapast hefur í samfélaginu að undanförnu og tengir bifhjól og bifhjólamenningu við skipulagða glæpastarfsemi.

Áður óþekkt tónverk eftir Mozart fundið

Áður óþekkt tónverk sem talið er vera eftir Mozart fannst í Austurríki fyrir skömmu. Fræðimenn við Mozart-stofnunina í Salzburg telja verkið hafa verið samið árið 1767 eða 1768, þegar Mozart var einungis tíu ára gamall.

Jóhanna um olíusamráðsdóminn: Þetta kom okkur á óvart

Forsætisráðherra segir ákvörðun Héraðsdóms um að fella úr gildi sektargreiðslur vegna olíusamráðsins koma sér á óvart. Íslenska ríkið þarf að greiða olíufélögunum einn og hálfan milljarð króna.