Íbúðarsamtökin Betri byggð á Álftanesi ósátt

Íbúðarsamtökin Betri byggð á Álftanesi segja vinnubrögð meiri hlutans í bæjarstjórn skammarleg um ný samþykkt deiliskipulag miðsvæðis bæjarinns. Í tilkynningu frá samtökunum segir að um helmingur kosningabærra íbúa Álftaness eða tæplega 700 manns skrifuðu á undirskriftalista í desember s.l. gegn miðbæjarskipulagi Álftaness sem þá var í auglýsingu. Krafan var að fá fram nýtt skipulag og að íbúar fengju að velja á milli ólíkra tillagna. Í kjölfarið lýsti bæjarstjóri því yfir að framkvæmdum á svæðinu yrði frestað fram yfir kosningar svo að íbúarnir gætu kosið um miðbæjarskipulag. Þrátt fyrir yfirlýsinguna lét meiri hlutinn vinna deiliskipulagið áfram og samþykkti það í bæjarstjórn en felldi tillögu minni hlutans að frestað yrði að senda Skipulagsstofnun hið umdeilda deiliskipulag til yfirferðar þar til fram yfir kosningar. Breytingarnar sem gerðar voru taka aðeins til mjög takmarkaðs hluta miðsvæðisins, þ.e. með nýjum aðkomuvegi frá Breiðumýri að skólasvæði. Skilaboð þeirra 700 íbúa sem skrifuðu undir undirskrifalistana voru einfaldlega þau að skipulagstillögunni var hafnað í heild sinni. Öllum að óvörum var kynningarefni, bæklingur á þykkum glanspappír og margmiðlunardiskur, nýlega borið í hús á Álftanesi á kosnað bæjarsjóðs og þeirra hundruða íbúa sem mótmæltu miðbæjarskipulaginu. Spurningin er hvaða tilgangi kynningarefnið þjónar nú og fyrir hvern það er hugsað? Hefði ekki verið eðlilegra að kynna íbúunum miðbæinn áður en deiliskipulagið var samþykkt? Eða er tilgangur kynningarefnisins að afla meiri hlutanum vinsælda á meðal kjósenda nú rétt fyrir kosningar? Íbúasamtökin betri byggð á Álftanesi lýsa undrun sinni og vonbrigðum með framgöngu meiri hlutans í bæjarstjórninni í vinnuferlinu öllu og því virðingarleysi sem megin þorra íbúa sveitarfélagsins Álftaness er sýnt.

Amnesty þrýstir á stjórnvöld

Amnesty International á Íslandi hefur sent bréf til íslenskra yfirvalda þar sem þess er farið á leit að við kosningu mannréttindaráðs Sameinuðu þjóðanna á þriðjudag í næstu viku, verði hagsmunir mannréttinda eingöngu hafðir að leiðarljósi, en ekki pólitísk hrossakaup.

200 milljóna tap hjá Ríkisútvarpinu

Ríkisútvarpið var rekið með tapi upp á tæpar tvö hundruð milljónir á síðasta ári. Eiginfjárstaða fyrirtækisins var rétt yfir núlli í ársbyrjun 2005 en var neikvætt um 186 milljónir í árslok. Þessar upplýsingar koma fram í ársuppgjöri Ríkisútvarpsins sem var gert opinbert í dag.

Þjóðleikhúsið og Icelandair undirrita samstarfssamning

Þjóðleikhúsið og Icelandair undirrituðu í dag samstarfssamning en arkmið hans er að auðvelda Þjóðleikhúsinu að fara til útlanda með íslenska leiklist segir í tilkynningu frá Þjóðleikhúsinu.

Uppgjör Marel undir væntingum

Marel skilaði uppgjöri fyrir fyrsta fjórðung ársins í dag. Í tilkynningu frá félaginu segir að tekjur félagsins voru aðeins hærri en spá Greiningardeildar gerði ráð fyrir. Tekjurnar námu samtals 32,7 m. evra en spá okkar hljóðaði upp á 28,5 m. evra.

Lögreglan finnur kókaín í bíl

Lögreglan í Hafnafirði lagði hald á 2 grömm af kókaíni sem var í eigu ökumanns sem var stöðvaður á Vífilstaðarvegi í dag. Ökumaðurinn sem er 22 ára játaði við yfirheyrslur að hann hafi nýverið keypt kókaínið á 26 þúsund krónur sem var ætlað til einkaneyslu.

Vestfirðir kynntir í Perlunni

Sýningin Perlan Vestfirðir verður sett í Perlunni í dag. Á sýningunni verða kynntir möguleikar á sviði ferðaþjónustu, atvinnu- og mannlífs á Vestfjörðum.

Starfsfólk Varnarliðsins boðað á fund með Geir H. Haarde

Árni Sigfússon bæjarstjóri Reykjanesbæjar hefur boðið starfsfólki Varnarliðsins til fundar í sal Fjölbrautaskóla Suðurnesja næstkomandi mánudag.

Verkamannaflokkurinn galt afhroð

Kosið var í 176 sveitastjórnum í gær og samkvæmt nýjustu tölum hlaut Verkamannaflokkurinn 1174 sæti í 26 stjórnum og tapaði 288 sætum og þar með 18 sveitastjórnum. Á sama tíma hlaut Íhaldsflokkurinn 68 stjórnir.

Mannfall í handsprengjuárás á Srí Lanka

Þrír öryggissveitarmenn féllu og fjórtán særðust, þar af tíu óbreyttir borgarar, í tveimur sprengingum og handsprengjuárás á norðurhluta Srí Lanka í dag. Talið er að uppreisnarmenn Tamíl tígra bergi ábyrgð á árásunum sem voru gerðar í bæ rúmum tvö hundruð kílómetrum norður af höfuðborginni Colombo.

Rafstuðsólar geta gert hunda árásargjarna og sálsjúka

Hundaólar með rafstuði, sem seldar eru í verslun í Reykjavík, geta gert hunda árásargjarna og sálsjúka, að sögn hundaatferlisfræðings. Hann vill að bannað verði með lögum að flytja ólarnar inn og selja þær.

Ríkissjóður á 50 milljarða króna

Ríkissjóður er orðinn svo vel stæður að hann á 50 milljarða króna á reikningi í Seðlabankanum, sem eru umfram það sem þarf til afborgana og vaxtagreiðslna. Bankinn á andvirði Símans þar að auki.

Breytingar á friðarsamningum í Súdan

Stjórnvöld í Súdan hafa samþykkt breytingar á friðarsamningum milli stríðandi fylkinga í Darfur-héraði. Þetta er haft eftir háttsettum sáttasemjara á vegum Afríkubandalagsins.

73 breytingar á bensínverði árið 2005

Talsmenn Atlantsolíu telja víst að lækkun stóru olíufélaganna á bensíni í gær megi rekja til þess að Atlantsolía hafi ekki hækkað sitt verð upp á síðkastið, eins og stóru félögin. Benda þeir á að áður en félagið kom inn á markaðinn hafi stóru félögin aðeins endurskoðað verðlagningu á mánaðar fresti, en sjötíu og þrjár verðbreytingar hafi orðið hjá þeim á síðasta ári.

Hálfur annar milljarður í nefndir

Nefndir ráðuneytanna kostuðu ríkissjóð nær einn og hálfan milljarð króna á síðasta ári. Rúmlega helmingur þeirrar upphæðar er vegna starfa einkavæðingarnefndar.

Segist ekki hafa verið við stýri

Jónas Garðarsson, formaður Sjómannafélags Reykjavíkur, segist ekki hafa verið við stýrið þegar skemmtibátur hans steytti á skeri á Viðeyjarsundi, sem leiddi til dauða karls og konu. Málflutningur hófst í Héraðsdómi Reykjavíkur í morgun.

Þrettán ráðnir fyrstir til starfa

Fyrstu starfsmennirnir sem Flugmálastjórn Keflavíkurflugvallar ræður til að vinna við rekstur flugvallarins verða þrettán starfsmenn snjóhreinsunar- og brautadeildar. Vinna við samningagerð og ráðningar fer fljótt í fullan gang.

Ráðherrabreytingar í bresku ríkisstjórninni

Charles Clarke, innanríkisráðherra í bresku ríkisstjórninni, lætur af embætti sínu og Jack Straw utanríkisráðherra verður forseti neðri deildar þingsins. John Prescott varaforsætisráðherra verður þó ekki látinn víkja en einhver verkefni tekin af honum.

Fimm ölvaðir við akstur

Lögreglan í Reykjavík stöðvaði 120 ökumenn upp úr miðnætti í nótt. Fimm þeirra reyndust vera undir áhrifum áfengis og þar af var einn réttindalaus. Auk þess voru tveir rétt undir leyfilegum mörkum og fengu ekki að halda áfram akstri í nótt, en verða hinsvegar ekki sektaðir.

Sagðir stelast inn í lögsögu

Skipstjórar á íslenskum frystitogurum halda því fram að erlendir togarar eigi það til að stelast inn fyrir 200 mílna fiskveiðilögsögumörk Íslands á Reykjaneshrygg þegar Landhelgisgæslan sér ekki til, en slíkt er landhelgisbrot.

Heldur í helstu landnemabyggðir

Ehud Olmert, forsætisráðherra Ísraels, hét því að halda í helstu landtökubyggðir Ísraela á Vesturbakkanum þegar ríkisstjórn hans sór embættiseið í gær. Fjórir flokkar eiga aðild að ísraelsku ríkisstjórninni en Olmert sagðist stefna að því að fá fleiri flokka til samstarfs.

Fasteignaskattar hafa lækkað um 25% í Árborg

Bæjarstjórn Árborgar hefur ákveðið að lækka fasteignaskatta úr núll komma 37 prósentum í núll komma þrjátíu. Þessi lækkun bætist ofan á lækkun sem ákveðin hafði verið í desember í fyrra. Samtals hafa fasteignaskattar því lækkað um 25 prósent í Árborg. Fasteignaskattar hafa lækkað víða á suðvesturhorninu í kjölfar gífurlegrar hækkunar á fasteignaverði enda eru skattarnir reiknaðir út frá fasteignamati.

Sagðir ætla að myrða teiknarana

Tólf öfgafullir múslimar eru sagðir á leið til Danmerkur til þess að myrða mennina, sem teiknuðu skopmyndirnar af Múhameð spámanni, sem birtar voru í Jótlandspóstinum.

Einn og hálfur milljarður í nefndastörf

Heildarkostnaður ríkissjóðs vegna nefndastarfa á vegum ráðuneyta nam nær einum og hálfum milljarði króna á síðasta ári. Tæplega helmingur þeirrar upphæðar er til kominn vegna starfa einkavæðingarnefndar.

Taka við Keflavíkurflugvelli 1. júlí

Íslendingar taka við rekstri Keflavíkurflugvallar 1. júlí næstkomandi. Lög í þessa veru voru samþykkt frá Alþingi í gærkvöldi. Það var þó ekki hægt fyrr en þingmenn voru þrisvar búnir að greiða atkvæði með afbrigðum svo hægt væri að flýta afgreiðslu frumvarpsins.

Færri bjóða í lóðir en áður

Boðnar voru tíu til fjórtán milljónir króna í hverja lóð í tíu lóða útboði Reykjavíkurborgar í lóðir í Úlfarsárdal, en tilboðin voru opnuð í gær. Alls bárust 143 tilboð í lóðirnar frá aðeins sautján bjóðendum.

Vilja gagnsæi í starfskjörum þingmanna og ráðherra

Samtök atvinnulífsins segja að ekki skapist sátt um starfskjör kjörinna fulltrúa ef þau verði áfram ógagnsæi og ákvörðuð á mörgum stöðum. Þau vilja að þingmenn og ráðherrar deili lífeyriskjörum með öðrum í landinu en miðað við núverandi stöðu geta lífeyriskjör ráðherra umfram almenna launþega eftir þrjú kjörtímabil verið ígildi yfir 100 milljóna króna starfslokagreiðslu.

Blair stokkar upp stjórn sína

Tony Blair, forsætisráðherra Bretlands, hóf uppstokkun í ríkisstjórn sinni nú í morgun eftir slæmt gengi Verkamannaflokksins í sveitastjórnarkosningum. Blair vill þó ekkert gefa upp um hvaða breytingar sé um að ræða að svo stöddu.

Deilt um skattbyrði í ljósi nýrra útreikninga

Síðustu þrír fjármálaráðherrar Sjálfstæðisflokksins eru mestu skattpíningarráðherra Íslandssögunnar fyrir fólk með lágar tekjur og meðaltekjur, sagði Jóhanna Sigurðardóttir, þingmaður Samfylkingarinnar í umræðum á þingi í kvöld um skattbyrði. Fjármálaráðherra sakaði Samfylkinguna um hentistefnu í skattaumræðum og sagði vitlausar fullyrðingar um skattbyrði ekki verða réttari þótt fleiri endurtækju þær.

Hugbúnaður til bjargar mannslífum

100 Íslendingar látast á íslenskum sjúkrahúsum árlega vegna óhappa við lyfjagjöf. Íslenskt fyrirtæki, TM Software, hefur hannað forrit sem tugir spítala víðs vegar um heim hafa keypt til að minnka líkurnar á mistökum.

Varúð: bjarnaeitur

Lögreglan í Frakklandi leitar nú bjarnahatara sem höfðu komið fyrir krukkum með hunangi blönduðu glerbrotum, sem ætlað var að drepa skógarbirni sem nýlega hafa verið fluttir til Pýreneafjallanna þegar tegundin var nær útdauð út þar. Krukkurnar voru merktar "Varúð: bjarnaeitur".

Þrettán sækja um brauðið í Odda

Þrettán prestar og guðfræðingar sóttu um stöðu sóknarprests í hinu sögufræga Oddaprestakalli í Rangárvallasýslu. Umsóknarfrestur rann út 2.maí síðastliðinn en dóms- og kirkjumálaráðherra skipar í embættið frá og með 1.júlí næstkomandi, að fenginni umsögn valnefndar.

Brá og stökk fyrir vaktstjórabílinn

Maður slasaðist á fæti við störf sín í verksmiðju Norðuráls á Grundartanga um hálfsjöleytið í kvöld. Hann var við vinnu við eitt af bræðslukerjum álversins þegar lítil sprenging varð. Ekki var sprengingin þó alvarleg sem slík, fyrir utan það að manninum brá svo mikið að hann stökk niður af kerinu og í veg fyrir vaktstjórabílinn sem kom þar aðvífandi.

Þingi frestað fram yfir sveitarstjórnarkosningar

Þingi var frestað á níunda tímanum í kvöld eftir að tvenn lög höfðu verið samþykkt. Önnur sneru að stofnun nýrrar Flugmálastjórnar á Keflavíkurflugvelli til bráðabirgða. Margs konar starfsemi á Keflavíkurflugvelli mun heyra undir hina nýju stofnun, meðal annars slökkvilið og rekstur flugbrauta. Þá var samþykkt að breyta lögum um framhaldsskóla á þann hátt að fella niður samræmd stúdentspróf.

Maóistar í Nepal samþykkja vopnahlésviðræður

Uppreisnarhópar maóista í Nepal hafa samþykkt boð stjórnvalda um vopnahlé og friðarviðræður. Maóistar tilkynntu í dag að þeir myndu sjálfir leggja niður vopn í þrjá mánuði meðan viðræður stæðu yfir.

Páfi bannfærir biskupa í Kína

Vatikanið hefur bannfært tvo biskupa sem settir voru inn í embætti í Kína í gær og á sunnudaginn án þess að haft væri samráð við Vatikanið. Innsetning biskupanna tveggja setja skarð í reikninginn í sáttaviðræðum Vatikansins og kaþólsku kirkjunnar sem sagði sig frá valdi páfa fyrir um fimmtíu árum síðan.

Bandaríkjamenn kynda undir borgarastyrjöld að sögn forseta Sómalíu

Forseti Sómalíu, Abdullahi Yusuf, segir Bandaríkjamenn styrkja hópa vígamanna og kynda með því undir borgarstyrjöld í landinu. Fylking vígamannahópa, sem hann segir að njóti stuðnings Bandaríkjamanna, hefur undanfarið átt í blóðugum átökum við hópa múslimskra öfgamanna.

Óbyggðahlaup á Vestfjörðum í sumar

Nýtt óbyggðahlaup verður háð á Vestfjörðum um miðjan júlí í sumar. Keppnin ber heitið Vesturgatan - víðavangshlaup Höfrungs og er hlaupið um 25 kílómetra leið. Frá þessu er sagt í vefriti Bæjarins besta. Leiðin liggur frá Stapadal í Arnarfirði, út í Lokinhamradal, fyrir Sléttanes og inn að Hrauni/Sveinseyri í Dýrafirði.

Gengi bréfa í Kauphöll Íslands hækkaði í dag

Úrvalsvísitalan hækkaði um tvö komma þrjú prósent í dag og virðist sem trú landans á markaðinum hafi aukist eftir annars miklar lækkanir að undanförnu.

Ástsælasti sálmurinn er Dag í senn

Söngmálastjóri þjóðkirkjunnar gerði nýverið könnun meðal presta og organista á því hver sálmanna í nýju sálmabókinni ætti skilið að kallast ástsælastur. Í efsta sæti á lista yfir tíu efstu trónir sálmurinn sem hefst svo: "Dag í senn, eitt andartak í einu", sem er ljóð eftir biskupinn fyrrverandi Sigurbjörn Einarsson við erlent lag.

Þyrlusveit gæslunnar varla tilbúin í haust

Nær útilokað er að Landhelgisgæslan hafi til reiðu fjögurra þyrlna fullmannaða sveit í haust, þegar áætlað er að herþyrlur fari af landi brott. Það tekur til að mynda lágmark fjóra til fimm mánuði að þjálfa nýjan flugmann.

Bankar bregðast seint við

Davíð Oddsson, seðlabankastjóri, gagnrýndi í dag viðskiptabankana fyrir að bregðast seint við í að draga úr útlánum sínum. Jafnframt sagði hann brýnt að breyta fyrirkomulagi opinbera íbúðalánakerfisins fyrir áramót.

Unga fólkið í framboð á Akureyri

Nýr framboðslisti verður kynntur á Fiðlaranum á Akureyri á opnum fundi klukkan 20:00. Listinn er í nafni Framfylkingarflokksins sem er þverpólitískt framboð ungs fólks á Akureyri sem telur að ekki hafi verið hlustað nægilega á rödd unga fólksins í bæjarfélaginu.

Gengi krónunnar hækkað um yfir 4% á 2 dögum

Krónan styrktist verulega í dag, annan daginn í röð, og hækkaði gengi hennar um tvö og hálft prósent í kjölfar eins komma sjö prósenta hækkunar í gær. Gengi bandaríkjadals er nú komið niður undir sjötíuogeina krónu og gengi evru er í nítíuogeinni krónu. Íslensk hlutabréf hækkuðu einnig í dag eftir lækkanir síðustu daga, og hækkaði úrvalsvísitalan um 2,3 prósent.

Samið um Héðinsfjarðargöng

Vegagerðin tilkynnti í dag að lægsta tilboði í Héðinsfjarðargöng hefði verið tekið. Skrifað verður undir 5,7 milljarða króna verksamning á Siglufirði eftir tvær vikur og er stefnt að því að framkvæmdir hefjist fyrir lok þessa mánaðar.