Sinueldur við Höfn

Þó nokkur eldur logaði í sinu í Óslandi nærri Höfn í Hornafirði í morgun. Allt tiltækt slökkvilið Hornafjarðar og var sent á svæðið en mikill eldur logaði beggja vegna við svo kallaðan Gónhól. Vegna vindáttar tókst vel að hefta útbreiðslu eldsins en hann teygði sig eftir þurri sinunni allt niður í fjöru.

Eldur á vinnusvæði Hringrásar

Skjót viðbrögð slökkviliðsins komu í veg fyrir að illa færi, þegar kviknaði í bát á vinnusvæði Hringrásar við Sundahöfn í morgun. Slökkviliðinu gekk greiðlega að ráða niðurlögum eldsins, en litlu mátti muna að illa færi enda mikill eldsmatur á svæðinu. Slökkviliðið var ekki nema um fimm mínútur á staðinn og tókst mjög fljótt að ráða við eldinn þótt hann hafi verið all nokkur og töluverðan reyk lagði upp af brunastað.

Bensínverð hærra en nokkurn tímann

Verð á bensínlítra er að nálgast 125 krónur og hefur aldrei orðið hærra í krónum talið. Það er orðið hátt í tveimur krónum hærra en þegar það rauk upp úr öllu valdi eftir fellibylinn Katrínu í ágúst í fyrra. Essó reið á vaðið með hækkun í gær, Olís hækkaði í morgun og fastelga er búist við að Skeljungur fylgi þeim, en áðurnenft verð er á stöðvum með fulla þjónustu.

57 létust

Minnst fimmtíu og sjö týndu lífi þegar farþegaskip fór á hvolf rétt utan við Bahrein í Persaflóa í gærkvöld.

Fjöldi þorpa rústir einar

Nokkur hundruð þorp eru í rúst eftir þrjá snarpa jarðskjálfta í vesturhluta Írans í morgun. Minnst fimmtíu létust í skjálftunum og 800 slösuðust.

Að minnsta kosti 50 létust og 800 slösuðust

Nokkur hundruð þorp eru í rúst eftir þrjá snarpa jarðskjálfta í vesturhluta Írans í morgun. Minnst fimmtíu létust í skjálftunum og 800 slösuðust. Upptök skjálftanna þriggja voru í fjalllendi á milli tveggja iðnaðarborga í vesturhluta Írans. Sá fyrsti var öflugastur og mældist sex á Richter. Strax á eftir komu tveir skjálftar upp á um það bil fimm.

Viðræður um varnarsamstarf hófust í morgun

Viðræður Bandaríkjamanna og Íslendinga um framtíð varnarsamstarfs ríkjanna hófust í utanríkisráðuneytinu í morgun. Bandaríkjamenn sendu tuttugu og sex manna sendinefnd á fundinn undir forystu sendiherra þeirra á Íslandi. Fyrirfram er ekki búist við að niðurstaða fáist á fundinum. Borðum skrýddir samningamenn Bandaríkjanna, alls 26 manns, streymdu inn í utanríkisráðuneytið við Rauðarárstíg klukkan hálf tíu í morgun.

Bætt hefur í sinueldinn í morgun

Slökkviliðsstjórinn í Borgarnesi býst við að slökkvistarf vegna sinueldanna á Mýrum í Borgarfirði muni standa alla helgina en bætt hefur í eldinn í morgun, eftir að hann virtist vera í rénun í nótt. Slökkviliðsmenn, bændur og lögreglumenn börðust við eldinn langt fram á nótt, en þegar vind lægði, tóku slökkviliðsmenn sér langþráða hvíld.

Bílvelta rétt utan við Hvolsvöll

Bílvelta varð í Ásgarði, í útjaðri Hvolsvallar snemma í morgun. Þrennt var í bílnum sem valt ofan í skurð og var einn fluttur með sjúkrabifreið til Reykjavíkur. Að sögn vakthafandi læknis á slysadeild er líðan mannsins þokkaleg en hann hefur verið lagður inn til eftirlits vegna höfuðáverka.

Átelja KR harðlega fyrir strippdans

Íþrótta- og tómstundaráð Reykjavíkur átelur harðlega að Knattspyrnufélag Reykjavíkur hafi keypt til sín skemmtiatriði sem gengur út á hlutgervingu og lítillækkun kvenna. Vísað er til karlakvölds KR á dögunum þar sem keypt var atriði frá Goldfinger sem fólst í því að bjóða upp föt af stúlkum sem stóðu loks uppi brjóstaberar frammi fyrir fullum sal af körlum í íþróttahúsi.

Hættir um jólin

Tony Blair, forsætisráðherra Bretlands, mun hætta í stjórnmálum um jólin. Þetta hefur breska blaðið Telegraph eftir nánum samstarfsmönnum forsætisráðherrans.

Eldur kom upp hjá Hringrás

Eldur kom upp í bát hjá Hringrás á ellefta tímanum í morgun. Verið var að rífa bátinn niður þegar eldurinn kom upp. Einn dælubíll frá slökkviliðinu í Reykjavík fór á staðinn og gengur slökkvistarf vel. Að sögn varðstjóra hjá slökkviliðinu er ekki talin hætta á að eldurinn breiðist út en fyrirtækið er á svokallaðri gjörgæslu þar sem á landi þeirra er mikið af eldfimum efnum.

Fagna að tekið sé á ofbeldi gagnvart lögreglu

Landssamband lögreglumanna fagnar niðurstöðum í tveimur nýföllnum dómum er varða ofbeldi gagnvart lögreglumönnum og segir að með þeim sé verið að gefa skýr skilaboð út í þjóðfélagið að ekki sé liðið að einstaklingar ráðist gegn lögreglu við skyldustörf. Dómarnir sem um ræðir eru annars vegar dómur Hæstaréttar í gær þar sem dómurinn tvöfaldaði refsingu hérðasdóms og dæmdi mann til þriggja ára fangelsisvistar fyrir líkamsárás

Reykjavíkurborg kærir Landsvirkjun

Reykjavíkurborg hefur kært Landsvirkjun til Samkeppniseftirlitsins fyrir að hafa ákveðið að taka Laxárvirkjun út úr Landsvirkjun á undirverði og færa hana í fyrirtæki í eigu ríkisvaldsins. Landsvirkjun ákvað þetta 13. janúar síðast liðinn en hvort tveggja borgarráð og borgarstjórn gerðu athugasemdir við að meirihlutaeigandi Landsvirkjunar, ríkisvaldið, hafi beitt afli sínu til að taka eigir út úr rekstri Landsvirkjunar.

Vilja ekki heita Hansen, Jensen eða Nielsen

Danir vilja ólmir skipta út nöfnunum Jensen, Nielsen og Hansen og taka upp sjaldgæfari eftirnöfn sem þykja flottari að því er fram kemur á vef Berlinske Tidene í morgun. Ný nafnalög taka gildi í Danmörku á morgun sem gerir Dönum það kleift að skipta út eftirnöfnum sínu og velja sér ný. Þegar hafa borist fjölmargar umsóknir um nafnabreytingu og eru flestar þeirra tengdar eftirnöfnunum Jensen, Nielsen og Hansen.

Halli á vöruskiptum við útlönd

Vöruskiptajöfnuður var 9,5 milljörðum lakari fyrstu tvo mánuði ársins en á sama tíma í fyrra og nam hallinn á vöruskiptum við útlönd nú 18,6 milljörðum. Fluttar voru út vörur að verðmæti tæplega 29 milljarða fyrstu tvo mánuði ársins og var langstærstur hluti þeirra sjávarafurðir sem námu 59 prósentum alls útflutnings.

Sundabraut verði fjórar akreinar

"Aldrei hefur annað verið í umræðunni en að Sundabraut verði fjórar akreinar" segir í yfirlýsingu sem íbúasamtök Grafarvogs hafa sent frá sér. Í yfirlýsingunni kemur enn fremur fram að öll vinna samtakanna hefur miðast við þetta og að þeirra mati eigi að hraða sem kostur er að leggja brautina alla leið upp á Kjalarnes.

Nokkuð um sinuelda

Lögreglan í Hafnarfirði hefur verið kölluð út þrisvar í kvöld vegna sinuelda. Eldarnir hafa þó allir verið með minna móti og hafa lögreglumenn getað slökkt eldinn með lítilli fyrirhöfn. Mikið hefur verið um að sinueldar hafi verið kveiktir síðustu daga.

Naomi Campbell handtekin fyrir barsmíðar

Ofurfyrirsætan Naomi Campbell var handtekin á heimili sínu í dag. Hún er sökuð um að hafa barið aðstoðarkonu sína eftir að þær lentu í rifrildi.

Úrskurði Samkeppniseftirlitsins líklega áfrýjað

Framkvæmdastjóri Flugþjónustunnar á Keflavíkurflugvelli, sem Samkeppniseftirlitið úrskurðaði í gær að hafi brotið samkeppnislög, býst við að úrskurðinum verði áfrýjað.

Hollvinasamtök skattgreiðenda stofnuð í dag

Hollvinasamtök skattgreiðenda voru stofnuð í dag en markmið þeirra er að standa vörð um hagsmuni skattgreiðenda. Hátt á þriðja tug manna höfðu skráð sig í samtökin nú síðdegis.

Fasteignagjöld hafa hækkað um allt að 64 prósent

Álögur stærstu sveitarfélaga landsins á íbúðarhúsnæði hafa hækkað langt umfram almennar verðlagsbreytingar síðustu þrjú árin segir í nýrri skýrslu ASÍ. Þetta gerist þrátt fyrir yfirlýsingar ráðamanna að um að álagningarprósenta fasteignagjalda lækki vegna hækkunar fasteignamats.

Umgengni um borgina ábótavant

Umhverfissvið Reykjavíkurborgar hefur hafið síðasta liðinn í átakinu Virkjum okkur en markmið þess er að fá fólk til að huga að umgengni um borgina sem víða er ábótavant. Árlega fara um 23 milljónir króna í hreinsun borgarinnar.

Atvinnulöggjöf stenst stjórnarskrá Frakka

Stjórnarskrárdómstóll í Frakklandi úrskurðaði í dag að ný atvinnulöggjöf sem valdið hefur miklum deilum stæðist stjórnarskrá. Þar með er allt útlit fyrir að löggjöfin nái fram að ganga, að því gefnu að Chirac Frakklandsforseti samþykki hana.

Dæmdur fyrir fjárdrátt í opinberu starfi

Hæstiréttur dæmdi í dag fyrrverandi framkvæmdastjóra Fjórðungssambands Vestfjarða í tólf mánaða fangelsi fyrir fjárdrátt.

Dæmdur í þriggja ára fangelsi

Tuttugu og sjö ára karlmaður var dæmdur í þriggja ára fangelsi í Hæstarétti í dag, fyrir hættulega líkamsárás, líflátshótanir við lögreglu og vörslu fíkniefna.

Lýst eftir vitni vegna mannráns

Lögreglan í Keflavík lýsir eftir ökumanni Land-Rover jeppa sem aðfaranótt síðasta sunnudags ók framhjá manninum rænt var af heimili sínu í Garðinum. Ökumaðurinn ók framhjá manninum á Biskupstungnabraut eða Laugarvatnsvegi á öðrum tímanum þá nótt og veitti honum athygli án þess þó að stöðva bifreið sína.

OR samþykkir að kanna orkusölu til Helguvíkur

R-listaflokkarnir klofnuðu innan stjórnar Orkuveitu Reykjavíkur nú síðdegis þegar stjórnin gaf grænt ljós á að stefna að raforkusölu til álvers í Helguvík. Fulltrúi vinstri grænna, sem var einn á móti, segir niðurstöðuna í andstöðu við samþykkt flokkanna í fyrra.

Hálka fyrir norðan, austan og vestan

Hálka er á Vestfjörðum, Norðurlandi og Norðausturlandi og éljagangur að auki á Vestfjörðum og Norðausturlandi samkvæmt upplýsingum frá Vegagerðinni.

Miklir sinueldar á Mýrum

Um fimmtán slökkviliðsmenn hafa barist við sinuelda á Mýrum í Borgarfirði síðan um klukkan 9 í morgun. Samkvæmt upplýsingum frá Slökkviliðinu í Borgarnesi er nú brunnið um 80 ferkílómetra svæði.

Ekið á tíu ára pilt

Ekið var á tíu ára pilt á reiðhjóli í Vestmannaeyjum á þriðja tímanum í dag. Pilturinn brákaðist en meiðsl hans voru talin minniháttar.

Leikskólagjöld lækka um 30 prósent

Bæjarráð Kópavogs samþykkti á fundi sínum í dag að lækka leikskólagjöld um 30 prósent. Í tilkynningu frá Kópavogsbæ um ákvörðunina segir að þessi ákvörðun sé tekin með hliðsjón af góðum rekstri bæjarsjóðs. Þar segir enn fremur að eftir þetta verði Kópavogur það stóru sveitarfélaganna þar sem verður ódýrast að búa fyrir barnafjölskyldur.

Ekki tímabært að afnema verðtryggingu lána

Stefna ber að því til lengri tíma litið að afnema verðtryggingu lána hér á landi en það er ekki hægt nú vegna þeirra sveiflna sem eru í þjóðfélaginu. Þetta sagði Halldór Ásgrímsson forsætisráðherra við utandagskrárumræðu um aukningu á skuldum þjóðarbúsins í dag.

Greiði 34 milljónir hvor um sig

Tveir menn voru í dag dæmdir fjögurra mánaða skilorðsbundinnar fangelsisvistar og til greiðslu 34 milljóna króna hvor um sig í sekt til ríkissjóðs. Mennirnir voru fundnir sekir um að hafa ekki staðið skil á greiðslu vörsluskatta og opinberra gjalda þegar þeir stýrðu fyrirtækinu Merkingu.

Dæmdur fyrir fjárdrátt

Fyrrum framkvæmdastjóri Fjórðungssambands Vestfirðinga var í dag dæmdur í Hæstarétti til eins árs fangelsisvistar fyrir að hafa dregið að sér samtals sautján milljónir króna úr sjóðum sambandsins. Níu mánuðir af tólf eru skilorðsbundnir.

Samningur Ríkiskaupa við Shell og Esso framlengdur

Ríkiskaup hafa ákveðið að framlengja samning sinn við Shell og ESSO um kaup á eldsneyti, olíu og öðrum rekstrarvörum fyrir ökutæki og vélar ríkisins. Að sögn Júlíusar Ólafssonar, forstjóra Ríkiskaupa, var sú ákvörðun tekin í gær, en um er að ræða seinna framlengingarár á samningi við olíufélaganna frá árinu 2003 sem gerður var eftir útboð.

Þrjú ár fyrir árás með hafnaboltakylfu

Hæstiréttur dæmdi Hákon Örn Atlason í dag til þriggja ára fangelsisvistar fyrir hættulega líkamsárás með hafnaboltakylfu, brot gegn valdstjórninni með því að hóta lögreglufulltrúa og fjölskyldu hans ofbeldi og lífláti og vörslu á 63 grömmum af hassi.

Dæmdur fyrir nauðgun

22 ára gamall karlmaður var í dag dæmdur til eins árs fangelsisvistar fyrir kynferðisbrot gegn nítján ára stúlku. Dómurinn komst að þeirri niðurstöðu að maðurinn hefði notfært sér ölvun stúlkunnar og svefndrunga til að hafa við hana samræði eða önnur kynferðismök.

Hafa ekki haft uppi á árásarmönnum

Enn hefur ekkert skýrst um hverjir það voru sem numu karlmann á sjötugsaldri af heimili sínu í Garðinum fyrir rúmri viku. Lögregla hefur rætt við vitni sem sá bílinn en það hefur ekki dugað til að finna hina seku.

Verða að afhenda skattstjóra upplýsingar

Viðskiptabankarnir þrír verða að afhenda skattstjórum sundurliðaðar upplýsingar um öll viðskipti bankanna með hlutabréf og og þá sem viðskiptunum tengdust á árinu 2003.

Samþykkt með þriggja atkvæða mun

Félagsráðgjafar hjá Reykjavíkurborg samþykktu nýgerðan kjarasamning sinn við borgina með aðeins þriggja atkvæða meirihluta. 32 af 63 sem greiddu atkvæði um samninginn sögðu já við honum en rétt tæplega helmingur, 29, greiddu atkvæði gegn honum.

Glitnir og Landsbankinn hækka vexti

Bankastjórn Landsbankans hefur ákveðið að hækka vexti íbúðalána um 0,25 prósentustig og verða þeir nú 4,7 prósent. Ákvörðunin er tekin eftir að Seðlabankinn tilkynnti um 0,75 prósenta hækkun stýrivaxta í morgun.

200 færri á biðlistum LSH

Tvö hundruð færri eru á biðlista eftir skurðaðgerðum á Landspítalanum nú en á sama tíma í fyrra. Þá sýnir bráðabirgðauppgjör fyrir fyrstu tvo mánuði ársins að rekstur spítalans er í jafnvægi.

Áfellisdómur yfir stjórnsýslu Póst- og fjarskiptastofnunar

Úrskurðarnefnd um fjarskipta- og póstmál hefur úrskurðað í ágreiningsmáli Símans og Póst- og fjarskiptastofnunar vegna rekstrargjalds sem stofnunin lagði á Símann. Úrskurðarnefndin komst að þeirri niðurstöðu að Póst- og fjarskiptastofnun hefði brotið gegn jafnræðisreglu Stjórnarskrár Íslands, helstu meginreglum stjórnsýslulaga og lögum sem gilda um Póst- og fjarskiptastofnun.

Búgarðabyggð í Árborg og Ölfusi

Tveir landeigendur í sveitarfélaginu Árborg og Ölfusi bjóða fólki að byggja búgarða, með aðstöðu fyrir útihús og skepnur. Þetta hentar vel fólki sem vill búa í sveit, en þó nálægt þéttbýli. Alls er boðið upp á um eitt hundrað lóðir á um þúsund hekturum.