Lífi dansks ráðherra ógnað

Ráðherra innflytjendamála í Danmörku segist vera bæði slegin og reið eftir að kveikt var í bíl hennar og íbúðarhúsi snemma í morgun. Óþekkt samtök segjast vera að refsa Dönum fyrir kynþáttahatur.

Fagnaðarefni að mati Læknafélags

"Þetta sýnir og sannar hversu lítill hluti læknastéttarinnar er þarna um að ræða og það er fagnaðarefni að Landlæknir geti tekið á málum tengdum þeim er ávísa ávanabindandi efnum í meira mæli en eðlilegt er," segir Sigurbjörn Sveinsson, formaður Læknafélagsins.

Kennurum settir afarkostir

Deilurnar í Landakotsskóla halda áfram að magnast. Stjórn skólans sendi sumum kennurum skólans bréf í gær þar sem sagt er að skriflegur stuðningur við stjórnina sé nauðsynlegt skilyrði fyrir því að þeir haldi starfi sínu við skólann. Foreldrar funda með stjórninni í kvöld þar sem afsagnar hennar verður krafist haldist staðan óbreytt.

Kjartan stopp í Reykjafirði í gær

Kjartan Jakob Hauksson ákvað að halda kyrru fyrir í Reykjafirði í fyrrinótt og í gær vegna hvassviðris. Í mestu hviðunum fór vindurinn upp í 20 m/s. "Veðrið er að detta niður," sagði Kjartan þegar Fréttablaðið náði tali af honum í gærkvöldi. Hann gerði ráð fyrir því að komast aftur af stað í nótt eða nú í morgunsárið. "Það spáir hæglætisveðri næstu daga."

Efla þarf menntun verslunarfólks

Aðeins um 40% starfsmanna í smásöluverslunum hér á landi hafa lokið framhaldsskólanámi og í sumum verslunum er hlutfallið mun lægra. Samtök verslunar og þjónustu spurðust fyrir í stærstu verslunarfyrirtækjunum og skoðuðu síðustu launakönnun VR og komust að þessari niðurstöðu.

Telur Skerjafjarðarveg óraunhæfan

Samgönguráðherra líst illa á hugmyndir Reykjavíkurlistans um hraðbraut yfir Skerjafjörðinn. Álftnesingar segja að borgaryfirvöld hafi ekkert rætt við þau um málið. Ekki er langt síðan hugað var að framkvæmdinni en þá þótti hún óhagkvæm.

Ólafur sakaður um málþóf

Ólafur F. Magnússon lagði í fyrradag til á borgarstjórnarfundi að heimildir til niðurrifs sjö gamalla húsa yrðu dregnar til baka. Húsin eru milli Smiðjustígs og Vatnsstígs og fimm þeirra eru frá 19. öld.

Dagný bendi á dæmi

Dagný Jónsdóttir, þingmaður Framsóknarflokksins, telur að Kristinn H. Gunnarsson flokksbróðir hennar á Alþingi, sé vandamál í Framsóknarflokknum og þingmaðurinn tæti niður mál sem séu flokknum góð og þörf. Þessu hélt Dagný fram í RÚVAK í gær í umræðum um fylgi flokksins og skoðanakannanir. Kristinn H. Gunnarsson segir að orð Dagnýjar þarfnist rökstuðnings.

Margir sækjast eftir efsta sætinu

Allt eins getur farið að þrír eða fleiri muni keppa um fyrsta sætið í prófkjöri sjálfstæðismanna í Reykjavík í haust. Enginn hefur þó lýst því opinberlega yfir að hann gefi kost á sér til forystu fyrir flokkinn í Reykjavík að undanskildum Vilhjálmi Þ. Vilhjálmssyni, oddvita borgarstjórnarflokksins.

Oddvitinn ekki hissa

"Ég veit ekki hvað á að segja um framkvæmd sem fer 150 prósent fram úr áætlun annað en að ég er ekki mjög hissa," segir Vilhjálmur Þ. Vilhjálmsson, oddviti Sjálfstæðisflokksins í borgarstjórn.

Tignarleg sveitahöll í Borgarfirði

Glöggir vegfarendur sem leið eiga um Borgarfjörð hafa efalítið tekið eftir sveitahöllinni að Skarðshömrum sem ekki á sinn líkan í sveitum landsins og þó víðar væri leitað. Hún hefur verið í byggingu síðan í byrjun árs 2003 en nú eru framkvæmdir á lokastigi.

Fjallar ekki frekar um bankasölu

Löngum fundi fjárlaganefndar með ríkisendurskoðanda og framkvæmdanefnd um einkavæðingu lauk í gær með samþykkt meirihlutans um að nefndin fjallaði ekki frekar um málið. "Það kom margt fram á fundinum sem kallaði á frekari útskýringar," sagði Lúðvík Bergvinsson þingmaður Samfylkingarinnar eftir fundinn.

Stefnan að hafa álverið á Húsavík

Iðnaðarráðuneytið hefur sett stefnuna á Húsavík við undirbúning álvers á Norðurlandi og miðast vinna við val virkjanakosta nú við þá staðsetningu. Gert er ráð fyrir að jarðgufuvirkjanir í innan við fimmtíu kílómetra fjarlægð frá Húsavík geti annað raforkuþörf meðalstórs álvers.

Kennedy leitaði lausnar

Nýbirt skjöl sýna að John F. Kennedy, forseti Bandaríkjanna, reyndi að finna diplómatíska lausn á Víetnamstríðinu með leynilegum samningaviðræðum við Rússa og Norður-Víetnama.

Helmingur nýrra hjóla ólöglegur

Nærri helmingur nýrra reiðhjóla hér á landi er ólöglegur þegar þau eru seld út úr búðum. Hvorki Umferðarstofa né lögregla segjast eiga að hafa eftirlit með því að reiðhjól séu fullbúin þegar þau eru seld.

Skerjafjarðarbraut þótti óhagkvæm

Sveitarfélögin á höfuðborgarsvæðinu höfnuðu tengingu miðborgar Reykjavíkur og Álftaness með Skerjafjarðarbraut fyrir þremur árum þar sem hún var talin óhagkvæm.

Ósætti í fjárlaganefnd

Meirihluti fjárlaganefndar samþykkti í dag, í trássi við vilja stjórnarandstöðunnar, að hætta athugun á einkavæðingu bankanna. Stjórnarandstaðan segir mörgum spurningum enn ósvarað. Lúðvík Bergvinsson alþingismaður segir að stjórnarandstaðan muni nú íhuga hvort þess verði krafist að þing verði kallað saman vegna málsins.

Síldin komin inn í lögsöguna

Íslensk og færeysk skip eru nú að veiðum skammt út af Austfjörðum en þar hefur norsk-íslenska síldin veiðst vel frá því íslensku skipin héldu til veiða eftir sjómannadag.

Örnum vex ásmegin

Arnarstofninn á Íslandi telur nú yfir 60 varppör og telja starfsmenn Náttúrufræðistofnunar Íslands að stofninn hafi ekki verið stærri í um hálfa öld eða frá því að farið var að fylgjast reglulega með arnarstofninum.

Snjóframleiðsla hefst næsta haust

Skíðafélag Dalvíkur stefnir á að hefja snjóframleiðslu í Böggvisstaðafjalli í haust. Kostnaðurinn er talinn vera um 21 milljón króna og segir Óskar Óskarsson, formaður félagsins, að fjármögnun gangi vonum framar.

Kennurunum settir afarkostir

Skólastjórn Landakotsskóla sendi nokkrum kennurum skólans bréf í gær þar sem sagt er að skriflegur stuðningur við stjórnina sé skilyrði fyrir því að þeir haldi starfi sínu við skólann. Foreldrar funda með stjórninni í kvöld þar sem afsagnar hennar verður krafist lagist staðan ekki.

Krabbameinssjúklingar selja lyfin

Algengt er að fíklar útivegi sér morfín og önnur ávanabindandi efni með því að falsa lyfseðla, að sögn Matthíasar Halldórssonar aðstoðarlandlæknis.

Kalt í Evrópu

Þótt júní sé genginn í garð þá er kalt í Evrópu. Þegar íbúar í austurrísku Ölpunum vöknuðu í gærmorgun blasti við þeim fjörtíu sentímetra jafnfallinn snjór.

Menningarsetur í Svarfaðardal

Sparisjóður Svarfdæla og Kaupfélag Eyfirðinga hafa ákveðið, í samstarfi við Dalvíkurbyggð, að hafa forystu um stofnun menningar- og náttúrufræðaseturs á Húsabakka í Svarfaðardal. Verið er að skipa starfshóp þessara aðila til að fylgja verkefninu eftir. Rekstur setursins verður í höndum sérstaks félags.

Aukin framlög vegna neyðar

Búist er við að George Bush Bandaríkjaforseti tilkynni í dag um ríflega 43 milljarða króna framlag til neyðaraðstoðar í Afríkuríkjum eftir að hafa blásið á hugmyndir breska stjórnvalda um að afskrifa skuldir ríkjanna.

Fimm ákærðir vegna banaslyss

Ríkissaksóknari hefur ákært fimm menn fyrir vanrækslu þegar banaslys varð við Kárahnjúka í mars á síðasta ári. Málið var þingfest í Héraðsdómi Austurlands í morgun.

Rækjan nærri hruni fyrir vestan

Rækjustofninn veiðist vart lengur á Íslandsmiðum og er nánast hruninn í Ísafjarðardjúpi. Hafrannsóknarstofnunin leggur til að upphafsafli úthafsrækju verði minnkaður um þriðjung á næsta fiskveiðiári.

Nítján látnir í árásum í Írak

Ekkert lát er á ofbeldisverkum uppreisnarmanna í Írak sem þó er svarað af fullri hörku af herflota bandamanna í landinu. Á fáeinum mínútum létust að minnsta kosti nítján í fjórum árásum uppreisnarmanna í norðurhluta landsins í morgun. Sjálfsmorðssprengjuárás var gerð við herstöð Bandaríkjamanna, við írakska herstöð, við markað og við landamærastöð.

Séra Hjalti verði ráðinn aftur

Foreldrar barna í Landakotsskóla skora á stjórn skólans að ráða séra Hjalta Þorkelsson aftur sem skólastjóra og veita honum fullt og óskorað umboð til að stjórna skólanum. Foreldrar lýsa yfir þungum áhyggjum af ástandinu í skólanum.

Kanna jarðhita á Grænlandi

Iðnaðarráðherra kynnti á ríkisstjórnarfundi í morgun samstarfssamning sem gerður hefur verið við Grænland um orkumál. Samningurinn fylgir í kjölfar þess að sveitarfélag á Diskó-eyju á Grænlandi óskaði eftir samstarfi um það hvort og hvernig væri hægt að nýta 19 gráðna heitt vatn sem fundist hefur á eynni. Iðnaðarráðuneytið hefur falið Íslenskum orkurannsóknum að kanna jarðhitann og hefjast jarðfræðirannsóknir í ágúst næstkomandi.

Stífla brast í Sandá í gær

Verulegt tjón varð þegar stífla brast í Sandá við Eyvindartungu, skammt frá Laugarvatni, í gærkvöldi. Tvær rafmagnsvirkjanir í ánni, sem eru í einkaeigu, urðu óvirkar vegna óhappsins og þótti mildi að ekki urðu slys á fólki. Efri virkjunin var tekin í notkun í mars síðastliðnum en neðri stöðin árið 2003.

Ræða þrískiptingu ríkisvalds

Hvernig á að tryggja þrískiptingu ríkisvaldsins? Það er spurningin sem Þjóðarhreyfingin veltir upp á fundi í kvöld að gefnu tilefni og á fundarstað sem ekki er valinn af handahófi.

Hálshöggnir fyrir morð

Tveir Jemenar voru í dag teknir af lífi í Sádi-Arabíu fyrir að hafa drepið konu. Mennirnir voru hálshöggnir í Asir-héraði í suðurhluta landsins en þeir voru sakfelldir fyrir að hafa bundið konuna og kyrkt hana í ránsferð inn á heimili hennar. Alls hafa 44 verið teknir af lífi í arabaríkinu það sem af er árinu, fjórum fleiri en allt árið í fyrra.

Lúxemborgarar tekjuhæstir í Evrópu

Lúxemborgarar eru tekjuhæstir Evrópubúa og gnæfa yfir önnur Evrópulönd þegar þjóðarframleiðsla á mann er metin. Samkvæmt tölum evrópsku hagstofunnar var þjóðarframleiðsla á hvern íbúa Lúxemborgar árið 2004 ríflega tvöfalt meiri en að jafnaði í ríkjum Evrópusambandsins.

Prófkjör síðla hausts

Prófkjör vegna uppstillingar á lista Sjálfstæðisflokksins við borgarstjórnarkosningarnar 27. maí 2006 verður haldið mánaðamótin október nóvember næstkomandi. Þetta var ákveðið á fundi stjórnar Varðar fulltrúaráðs Sjálfstæðisflokksins sem haldinn var í dag og verður prófkjörið lagt til við fulltrúaráðsfund í byrjun september.

Varað við símasölu netfyrirtækis

Tölvu- og netþjónustan Snerpa varar fólk við símasölu frá erlendu netfyrirtæki. Í tilkynningu frá Snerpu segir að fyrirtækið hafi síðustu daga fengið ábendingar um símasöluherferð netfyrirtækisins þar sem hringjandinn segist vera að aðstoða við skráningu á nafni viðkomandi í lénaskrá.

Norðmenn fagna sambandsslitum

Norðmenn fagna því í dag, 7. júní, að nákvæmlega hundrað ár eru liðin frá því norska Stórþingið samþykkti formlega sambandsslitin við Svíþjóð. Mikið er um hátíðarhöld í Osló, höfuðborg Noregs, í tilefni af tímamótunum og fara meðal annars fram stórtónleikar helstu hljómsveita og listamanna landsins á torginu fyrir framan ráðhús borgarinnar.

Eimskip semur um smíði skipa

Eimskipafélag Íslands hefur gert samninga um smíði tveggja fullkominna frystiskipa og hefur félagið auk þess möguleika á fjórum skipum til viðbótar. Kaupverð skipanna tveggja er um 2,6 milljarðar íslenskra króna. Forráðamenn Eimskipafélagsins segja að samningarnir séu liður í áætlunum félagsins um að verða leiðandi flutningafyrirtæki á sviði frysti- og kæliflutninga á Norður-Atlantshafi.

Fjölbýlishús hrynur í Egyptalandi

Lítið barn lét lífið þegar íbúðarblokk hrundi til grunna í borginni Alexandríu í Egyptalandi í dag. Óttast er að fleiri hafi farist og séu grafnir undir húsarústunum, en sextán manns slösuðust. Byggingin sem hrundi var upprunalega þriggja hæða en að sögn lögerglunnar í Alexandríu hafði aukahæðum verið bætt við hana án tilskilinna byggingaleyfa.

Sýknaðir af ákæru um pyntingar

Líbískur dómstóll sýknaði í dag níu lögreglumenn og lækni sem sakaðir voru um að þvinga fimm búlgarskar hjúkrunarkonur til þess að játa að hafa að þær hefðu viljandi smitað á fimmta hundrað barna af HIV-veirunni á sjúkrahúsi í Líbíu. Hjúkrunarkonurnar hafa ásamt palestínskum lækni verið dæmd til dauða fyrir verknaðinn en þau hafa setið í fangelsi í Líbíu í sex ár vegna hans.

Læknar átaldir fyrir morfínávísun

Landlæknisembættið hefur að undanförnu átalið hóp lækna fyrir óeðlilegar ávísanir á morfínlyf og önnur ávanabindandi lyf. Sumir hafa fengið áminningu. Sérstaklega er tekið í lurginn á þeim sem hagnast með þessum hætti. Nytsemi nýs lyfjagagnagrunns er farin að skila sér.

Hálft ár fyrir skjalafals

45 ára karlmaður var í Héraðsdómi Reykjavíkur í dag dæmdur í sex mánaða fangelsi fyrir skjalafals. Maðurinn seldi Íslandsbanka skuldabréf þann 27. ágúst í fyrra fyrir tvær og hálfa milljón króna en hann gaf bréfið út sama dag og hafði jafnframt falsað áritun á nafni konu í reit fyrir samþykki sjálfskuldarábyrgðarmanns. Ákærði játaði brot sitt fyrir dóminum.

Segir aðgerðir munu skila árangri

Stjórn Landakotsskóla telur að þær aðgerðir sem gripið hafi verið til til lausnar fjárhags- og stjórnunarvanda skólans eigi eftir að skila árangri og tryggja grundvöll starfseminnar til framtíðar. Þetta kemur fram í yfirlýsingu sem stjórn skólans sendi frá sér í dag, en undir hana skrifar Gunnar Örn Ólafsson, formaður stjórnar Landakotsskóla.

Mikið spurt eftir líknarskrá

Mikið er spurt eftir líknarskrá, sem er í vinnslu hjá landlæknisembættinu, að sögn Sigurðar Guðmundssonar landlæknis.

Reyni að hylma yfir fjöldamorð

Bandarísku mannréttindasamtökin Human Rights Watch sökuðu í dag úsbeksk stjórnvöld um að reyna að hylma yfir fjöldamorð í bænum Andijan í síðasta mánuði, en þar er talið er að mörg hundruð manns hafi fallið fyrir byssukúlum stjórnarhersins í kjölfar mótmæla. Samtökin birtu í dag skýrslu um atburðina Andijan 13. maí síðastliðinn en hún byggist á viðtölum við vitni sem mörg hver flýðu til nágrannaríkisins Kirgisistans í kjölfar uppþotanna.