Reyni að hylma yfir fjöldamorð

Bandarísku mannréttindasamtökin Human Rights Watch sökuðu í dag úsbeksk stjórnvöld um að reyna að hylma yfir fjöldamorð í bænum Andijan í síðasta mánuði, en þar er talið er að mörg hundruð manns hafi fallið fyrir byssukúlum stjórnarhersins í kjölfar mótmæla. Samtökin birtu í dag skýrslu um atburðina Andijan 13. maí síðastliðinn en hún byggist á viðtölum við vitni sem mörg hver flýðu til nágrannaríkisins Kirgisistans í kjölfar uppþotanna. Í skýrslunni segja vitnin að úsbekskir hermenn hafi skotið á mannfjöldann sem safnast hafi saman á aðaltorginu í Andijan til að mótmæla stjórnvöldum og að meðal hinna föllnu hafi verið konur og börn. Þá hafi hinum særðu ekki verið sinnt í margar klukkustundir og að herinn hafi tekið suma þeirra af lífi. Stjórnvöld í Taskent halda því fram að 173 hafi látist í átökunum, aðallega íslamskir uppreisnarmenn, en vitni segja töluna nær fimm hundruð. Human Rights Watch segir að ekki sé ljóst hversu margir hafi látist en þörf sé á alþjóðlegri rannsókn til þess að komast til botns í málinu. Því hafa úsbeksk stjórnvöld hins vegar hafnað hingað til og segjast sjálf vera að rannsaka málið.