Helmingur nýrra hjóla ólöglegur

Nærri helmingur nýrra reiðhjóla hér á landi er ólöglegur þegar þau eru seld út úr búðum. Hvorki Umferðarstofa né lögregla segjast eiga að hafa eftirlit með því að reiðhjól séu fullbúin þegar þau eru seld. Í athugun sem Bindindisfélag ökumanna gerði nýverið á búnaði allra reiðhjóla í stærstu reiðhjólaverslunum landsins kom fram að ekki eitt einasta hjól var búið öllum þeim búnaði sem reglugerð um búnað reiðhjóla kveður á um. Sé litið fram hjá lásum og bjöllum sem hefð hefur skapast fyrir að kaupandinn kaupi sérstaklega er samt nærri helmingur allra nýrra  hjóla seldur á götuna án tilskilins útbúnaðar. Algengast er að keðjuhlífar og glitmerki vanti en einnig er algengt að hemla vanti að framan sem getur skapað mikla hættu, að sögn Einars Guðmundssonar, framkvæmdastjóra Brautar. Hann segir það minnka hemlunargetuna um 60-70%. Einar segir ástandið nokkuð misjafnt á milli verslana en í flestum tilfellum vanti á það að seljendur hjólanna upplýsi viðskiptavininn um það hvað þurfi að kaupa á hjólið svo að það sé löglegt þegar það er tekið til notkunar. Þá segist hann telja að innflytjendur reiðhjóla séu á hálum ís ef svo færi að rekja mætti slys til ófullnægjandi búnaðar á reiðhjóli. Ekki sé ólíklegt að þeir yrðu gerðir ábyrgir. Og allir vísa frá sér ábyrgðinni á eftirliti með reiðhjólaverslunum. Einar segir að haft hafi verið samband við Umferðarstofu, Löggildingarstofu og lögreglu en þau hafi öll firrað sig ábyrgð á eftirlitinu.  Samkvæmt reglugerð um reiðhjól er bannað að hjóla á þeim í myrkri án þess að hafa lukt eða ljósker bæði að framan og aftan. Slíkur búnaður fylgir aldrei nýjum hjólum hér á landi og verður því alltaf að kaupa hann sérstaklega.