Aukin framlög vegna neyðar

Búist er við að George Bush Bandaríkjaforseti tilkynni í dag um ríflega 43 milljarða króna framlag til neyðaraðstoðar í Afríkuríkjum eftir að hafa blásið á hugmyndir breska stjórnvalda um að afskrifa skuldir ríkjanna. Tony Blair, forsætisráðherra Bretlands, fundar með Bush Bandaríkjaforseta í Washington í dag. Aðaláhersla verður lögð á að ræða neyðarhjálp til Afríkuríkja og sameiginlegar aðgerðir iðnríkja gegn gróðurhúsaáhrifum fyrir fund átta helstu iðnríkja heims sem fram fer í Geneagles í Skotlandi í næsta mánuði. Fyrir fundinn dró talsmaður Blairs úr þeim væntingum að samkomulag myndi nást á fundinum þegar hann ræddi við breska fjölmiðla. Bush Bandaríkjaforseti er lítt hrifinn af þeim hugmyndum sem fjármálaráðherra Bretlands, Gordon Brown, hefur sett fram um að afskrifa allar skuldir Afríkuríkja við alþjóðlega sjóði. Hann segir Bandaríkin ekki geta staðið undir slíkum kostnaði. Þá hugnast Bandaríkjamönnum ekki heldur þær hugmyndir sem miða að því að draga úr losun gróðurhúsalofttegunda og vilja fremur bregðast við þeim vanda sem sagður er yfirvofandi með tæknilegum útfærslum. Þrátt fyrir augljósan ágreining eru vonir bundnar við að þeir Bush og Blair samþykki að auka bein fjárframlög til Afríkuríkja og jafnvel að Bandaríkjaforseti noti tækifærið og tilkynni um 674 milljóna dollara framlag, eða jafnvirði um 43 milljarða íslendrka króna, sem notað verður til að berjast gegn hungursneyð í álfunni.