Óbreytt mjólkurverð

Verðlag á mjólk og mjólkurvörum verður óbreytt, þriðja árið í röð. Þetta er niðurstaða verðlagsnefndar búvara, sem landbúnaðarráðherra mun kynna á blaðamannafundi í hádeginu. Verðmyndun á mjólkurvörum heyrir ekki undir samkeppnislög heldur búvörulög

Aðeins verið að skila fjórðungi

Útgjöld ríkisins vegna vaxtabóta lækka um þrjúhundruð milljónir á næsta ári vegna breytinga á vaxtabótakerfinu sem lýst er í skattafrumvarpi ríkisstjórnarinnar. Jóhanna Sigurðardóttir, alþingismaður Samfylkingarinnar, segir að útgjöld ríkisins vegna barnabóta hafi lækkað um tíu milljarða á níu árum. Fjórðungi þess verði skilað samkvæmt frumvarpinu nú.

Vísitalan hækkar

Vísitala launa hefur hækkað um 0,3% frá því í október. Síðastliðna tólf mánuði hefur hún hækkað um 5,3 prósent. Vísitala neysluverðs hækkaði um 0,21% á sama tímabili og er því 3,8% síðustu tólf mánuði.

Meira en 50 handteknir

Fleiri en fimmtíu voru handteknir í rassíu lögreglunnar gegn mafíunni í suðurhluta Ítalíu í morgun. Meðal þeirra sem eru í haldi eru þingmaður og fjöldi annarra stjórnmálamanna. Nokkur fjöldi kaupsýslumanna er einnig í haldi, en mennirnir eru allir grunaðir um tengsl við skipulagða glæpastarfemi, peningaþvætti og fjárkúgun.

Lækka niður í 4,15%

Vextir af húsnæðislánum Íbúðalánasjóðs lækka í dag úr 4,3% niður í 4,15%. Þar með eru vextirnir komnir niður fyrir það sem bankarnir bjóða, að sögn Halls Magnússonar sviðsstjóra hjá Íbúðalánasjóði. Hann segir að ávöxtunarkrafa hafi lækkað á föstudaginn og það hafi þýtt að hægt yrði að lækka vexti niður í 4,15%.

Mótmæli í Kænugarði

Forsætisráðherra Úkraínu eru nú sagður hafa verið kosinn næsti forseti landsins, en hann hefur þriggja prósenta forskot á meginkeppinaut sinn sem naut þó mun meira fylgis í útgönguspám í gær. Stuðningsmenn stjórnarandstöðunnar segja greinilegt að maðkur sé í mysunni og eru þúsundum saman á megintorginu í Kænugarði.

Hefja afskipti á ný

Bandaríkjamenn hafa hafið afskipti af friðarferlinu fyrir botni Miðjarðarhafs á ný. Powell, utanríkisráðherra, er kominn til Ísraels til viðræðna við Ísraela og Palestínumenn.

Eykur varla eftirspurnina

Guðbjörg Erlingsdóttir, dagskrárstjóri hjá Götusmiðjunnni, segir að tíu bíði eftir meðferð vegna vímuefnavanda þar. Hún á ekki von á því að niðurskurður á sjúkrahúsinu Vogi auki eftirspurnina.

Bretar halla sér að flöskunni

Nærri fjórðungur allra fullorðinna Breta notar áfengi til að minnka þunglyndi eða auka sjálfstraust. Þetta kemur fram í nýlegri rannsókn lækna í Bretlandi. Þannig drekka 23% Breta áfengi þegar þeim líður illa og tveir af hverjum fimm fá sér í tána áður en þeir njóta ásta. Þá fá heil 14 prósent sér snafs áður en gengið er til vinnu.

Börn til sölu

Ungabörn ganga kaupum og sölu í austur-Evrópu og verðið er frá rúmum 40 þúsund íslenskum krónum. Sky-fréttastofan greinir frá því að það hafi aðeins tekið fréttamann stöðvarinnar nokkrar mínútur að finna foreldra í Búkarest, höfuðborg Rúmeníu, sem voru reiðubúin að selja krílið sitt fyrir nokkra tugi þúsunda.

10 mánaða fangelsi fyrir rán

Rúmlega tvítugur maður var dæmdur í tíu mánaða fangelsi skilorðsbundið og til að greiða tvöhundruð þúsund krónur í miskabætur fyrir að hafa í mars 2002 ógnað starfsstúlku í söluturni við Holtsgötu með hnífi og haldið henni fastri meðan félagi hans lét greipar sópa um peningakassa söluturnsins.

Skjálfti við Eyjafjörð

Jarðskjálfti um 3,4 á Richter varð úti fyrir mynni Eyjafjarðar klukkan hálf eitt. Samkvæmt upplýsingum frá Veðurstofunni varð skjálftinn á svokölluðu Húsavíkur-Flateyjarmisgengi en skjálftar þar eru tíðir. Einhverjir kunna að hafa fundið fyrir skjálftanum Ólafsfirði eða Siglufirði, en Veðurstofan hafði ekki spurnir að því.

ESB vill að kosið verði að nýju

Evrópusambandið fer fram á að forsetakosningarnar í Úkraínu verði endurteknar, þar sem þær hafi ekki uppfyllt lýðræðisleg skilyrði. Talsmenn allra aðildarríkja ESB hyggjast senda Úkraínumönnum orðsendingu, þar sem hvatt verður til þess að kosningarnar verði endurteknar og farið verði að ítrustu skilyrðum um lýðræðislega framkvæmd þeirra.

Þingið hafni kosningúrslitum

Stjórnvöld í Kænugarði, höfuðborg Úkraínu, hafa hvatt úkraínska þingið til þess að samþykkja ekki úrslit nýafstaðinna forsetakosninga. Í yfirlýsingu frá borgarráði Kænugarðs segir að miklar efasemdir séu uppi um að rétt hafi verið staðið að kosningunum og því sé eðlilegt að þingið neiti að samþykkja úrslitin.

5 létust í skotbardaga veiðimanna

Fimm létu lífið og þrír eru í lífshættþegar til skotbardaga kom milli dádýraveiðimanna í skóglendi nærri litlu þorpi í Wisconsin í gærkvöld. Bardaginn varð einungis sólarhring eftir að veiðitíminn hófst. Einn maður hóf að skjóta á þrjá veiðimenn eftir að þeir vísuðu honum burt af merktu veiðisvæði.

Ánægja á Ísafirði

Bæjarstjórn Ísafjarðar samþykkti samhljóða tillögu þar sem ánægju er lýst með að samninganefndir hafi loks náð samkomulagi og þakkaði kennurum fyrir þá ábyrgð sem þeir hefðu sýnt í launadeilu liðinna vikna. Ísfirskir kennarar mættu til starfa að lokinni lagasetningu, annað en margir kollegar þeirra annars staðar á landinu.

10-15 þúsund með breytilega vexti

Tíu til fimmtán þúsund einstaklingar tóku íbúðalán með breytilegum vöxtum hjá Íbúðalánasjóði, árið 1986. Lánin voru upphaflega með 3,5% vöxtum en þeir voru fljótlega hækkaðir í 4,9%. Breytilegir vextir eiga að laga sig að markaðsvöxtum á hverjum tíma.

Ekki eitrað fyrir Arafat

Dánarorsök Jassirs Arafats kemur ekki fram í læknaskýrslum hans að sögn frænda hans sem hefur fengið skýrslurnar afhentar. Eiturefnapróf sýndu þó að engin dularfull eiturefni fundust í blóðrás Arafats og því ólíklegt að honum hafi verið byrlað eitur.

Hagamelsmálið þingfest

Mál móður sem varð dóttur sinni að bana og særði son sinn á heimili þeirra við Hagamel í vor, var þingfest í Héraðsdómi Reykjavíkur í morgun. Dómari tekur síðar afstöðu til þess hvort að konan er sakhæf. Móðirin, sem er á fimmtugsaldri varð 12 ára dóttur sinni að bana á heimili þeirra á meðan dóttirin svaf og hún særði eldri bróður hennar með hnífi.

Brögð í tafli?

Viðtæk kosningasvik voru framin í Úkraínu, að mati kosningaeftirlitsmanna. Forsætisráðherra landsins var í dag lýstur sigurvegari forsetakosninga, en tugir þúsunda mótmælenda sætta sig ekki við niðurstöðurnar.

Sagt upp fyrir að losa úrgang

Starfsmanni ítalska fyrirtækisins Impregilo við Kárahnjúkavirkjun hefur verið sagt upp störfum fyrir að hafa losað spilliefnaúrgang með hætti sem ekki samræmist umhverfisreglum fyrirtækisins. Í tilkynningu frá Impregilo segir að þegar hafi verið gripið til ráðstafana til þess að útiloka að umhverfistjón hlytist af verknaðinum.

Halldór í Svíþjóð

Halldór Ásgrímsson forsætisráðherra og Sigurjóna Sigurðardóttir eiginkona hans verða í opinberri heimsókn í Svíþjóð dagana 25 og 26 nóvember. Í heimsókninni mun Halldór Ásgrímsson meðal annars hitta Göran Person forsætisráðherra Svíþjóðar.

Eldsvoði á Grensásvegi

Allt tiltækt slökkvilið í Reykjavík hefur verið kallað á Grensásveg 12, þar sem eldur braust út fyrir skömmu. Eldurinn kviknaði innandyra, en ekki er meira vitað um tildrög eldsvoðans að svo stöddu.

Engin viðbrögð frá bönkunum

Engin viðbrögð hafa komið frá stóru viðskiptabönkunum vegna vaxtalækkunar Íbúðalánasjóðs. Vextir sjóðsins eru nú 4,15%, en bankarnir bjóða 4,2%. Útboð húsbréfa fór fram á föstdaginn, en alls tók Íbúðalánasjóður við tilboðum fyrir 8 milljarða króna að nafnvirði.

Umburðarlyndið á undanhaldi

Margt bendir til að gjá sé að myndast á Vesturlöndum á milli múslimskra innflytjenda og þeirra sem aðhyllast önnur trúarbrögð. Formaður Félags múslima á Íslandi hefur áhyggjur af þróuninni.

Hóf fíl á loft með hugarorkunni

Sri Chinmoy hugleiðslumeistari hefur með lyftum sínum sýnt að andinn er efninu yfirsterkari. Nýlega lyfti hann yfir 130 tonnum á friðarhátíð í Bandaríkjunum.

Eldur í Grensáskaffi

Eldur kom upp í Grensáskaffi í Reykjavík rétt fyrir klukkan sex í kvöld. Allar stöðvar slökkviliðs höfuðborgarsvæðisins voru kallaðar út. Lítið mál reyndist að slökkva eldinn sem virðist hafa komið upp nálægt uppþvottavél í eldhúsi kaffihússins. Húsið var mannlaust og því var enginn í hættu.

Fallist á fyrsta hlutann

Skipulagsstofnun hefur fallist á fyrsta hluta Sundabrautar, með skilyrðum. Fyrsti áfangi er frá Sæbraut yfir Kleppsvík að Hallsvegi og Strandvegi. Það voru þrjár leiðir sem rætt var um, hábrú eða botngöng um leið 1, sem er frá Holtagörðum og yfir og síðan eyjaleið, sem liggur á uppfyllingu frá Elliðavogi.

Kosningasvindl í Úkraínu

Forsetakosningarnar í Úkraínu voru ólýðræðislegar. Viktor Janukovitsj er sakaður um kosningasvindl. Forseti Rússlands óskaði honum samt til hamingju með sigurinn en Evrópusambandið gerði það ekki. Málið verður rætt á fundi fastafulltrúa Natóríkjanna í dag.

Læknir SÞ handtekinn

Tíu manns voru handteknir í Kabúl í gær í tengslum við mannrán á þremur starfsmönnum Sameinuðu þjóðanna.

Sistani fordæmir árás á mosku

Æðsti sjíaklerkur Íraks, Ali Husseini al Sistani, fordæmir árás bandarískra hermanna á moskuna Abu Hanifa í Bagdad.

Verkfalli rútubílstjóra lokið

Verkfalli rútubílstjóra í Finnlandi er lokið. Það stóð í tvær vikur. Samgöngur voru að komast í samt horf í gær en einhverjir hnökrar voru þó á þeim.

Vilja selja úran til Kína

Ástralska námafyrirtækið WMC á nú í viðræðum við kínversk stjórnvöld um sölu á úran. Ástralskar reglur um útflutning á úrani eru mjög strangar.  

Engar reglur um tölvuleiki

Móðir segir verslunina BT hafa selt þrettán ára syni hennar tölvuleik sem ekki sé ætlaður börnum að átján ára aldri. Þórhildur Líndal, umboðsmaður barna, segir margítrekaðar beiðnir til menntamálaráðuneytisins um að reglur séu settar um tölvuleiki ekki hafa borið árangur.

Lágreist brú besti kosturinn

Skipulagsstofnun hefur úrskurðað um umhverfisáhrif Sundabrautar. Lágreist brú yfir Kleppsvíkina er besti kosturinn. Talið er að hábrú yrði lokuð í 50 klukkustundir á ári vegna veðurs. Botngöng geta haft verulega neikvæð áhrif á lífríkið.

Færri stefna á kennslu

Færri stúdentar Kennaraháskóla Íslands huga að kennslu við útskrift næsta haust en fyrir verkfall grunnskólakennara, segir Sigurður Grétar Ólafsson formaður stúdentaráðs KHÍ.

Senda eftirlitsnefnd til Palestínu

Evrópusambandið mun senda eftirlitsnefnd til Palestínu til að fylgjast með forsetakosningunum þegar kosið verður um eftirmann Jassers Arafat sem lést á sjúkrahúsi í París 11. nóvember.

Áhyggjufullir yfir prófunum í HÍ

Helmingur stúdenta sem eiga börn á grunnskólaaldri segja að verkfall kennara hafi haft áhrif á nám þeirra. Jarþrúður Ásmundsdóttir, formaður stúdentaráðs, segir ráðið hafa gert óformlega athugun á Netinu á aðstæðum foreldra í Háskólanum en 28 prósent stúdenta séu foreldrar.

Tunnur með spilliefnum grafnar

Starfsmaður Impregilo á Kárahnjúkum hefur verið rekinn eftir að hafa grafið í jörðu tvær 200 lítra tunnur með tuskum sem notaðar höfðu verið til þess að hreinsa olíu.

Strax hneyksli

Hneyksli skyggði á fyrsta starfsdag nýs forseta framkvæmdastjórnar Evrópusambandsins. Jose Manuel Barroso mætti í dag til vinnu í fyrsta sinn og þurfti þegar í stað að taka á uppljóstrunum um aðild samgöngustjóra sambandsins að fjármálahneyksli í Frakklandi fyrir nokkrum árum.

Frjálslyndi í öndvegi

Frjálslyndir straumar virðast gera vart við sig í Bandaríkjunum, miðað við þá sem almenningur gæti helst hugsað sér sem forsetaframbjóðendur árið 2008. Könnun Gallups leiðir í ljós, að Bandaríkjamenn vilja helst sjá þau Hillary Clinton og Rudy Guiliani berjast um forsetaembættið eftir fjögur ár.

Undirstaða lífsins

Mjólk er undirstaða lífsins segir Guðni Ágústsson landbúnaðarráðherra sem í dag tilkynnti um óbreytt mjólkurverð, þriðja árið í röð. Guðni eru reiðubúinn að skoða opinbera niðurgreiðslu mjólkur og annarra matvæla til skólabarna og segir alla Íslendinga eiga að hafa efni á góðum mat.

Enn frekari undanþágur í vændum

Íslensk stjórnvöld ætla að fara fram á frekari undanþágur frá Kyoto-bókuninni sem gerir þeim kleift að draga hægar úr losun gróðurhúsategunda en öðrum iðnríkjum. Halldór Ásgrímsson, forsætisráðherra, upplýsti þetta á Alþingi í dag. Hann sagði þingmenn Vinstri grænna vera á móti bættum lífskjörum landsmanna og fékk þau svör á móti að málflutningur hans væri ósmekklegur.

Gervihné ein besta uppfinningin

Gervihné með gervigreind frá Össuri er ein athyglisverðasta uppfinning ársins, að mati Time Magazine, en slíkt hné gjörbyltir göngulagi og möguleikum þeirra sem þurfa að nota gervifót. Ungur verktaki, sem missti fótinn eftir að hafa klemmst á milli bíla, segist geta unnið öll verk á slíkum fæti. Þá er Össur byrjaður að þróa nokkurs konar gervivöðva.

Hefðu farið öðruvísi að

Formaður Samfylkingarinnar segir skattalækkanir ríkisstjórnarinnar vera ranglátar og að tímasetning þeirra sé slæm. Sjálfur lofaði hann 16 milljarða skattalækkunum fyrir síðustu kosningar. Hann segist mundu hafa staðið við þau loforð en fara aðrar leiðir.