Þjálfari Daníels og Arnórs rekinn

Auk tveggja Svíþjóðarmeistaratitla vann Malmö sænska bikarinn í fyrra og komst í úrslitaleikinn í ár, undir stjórn Rydström.

Liðið er hins vegar aðeins í 6. sæti sænsku úrvalsdeildarinnar í ár, án sigurs í síðustu fjórum leikjum, og heilum átján stigum á eftir toppliði Mjällby þegar sex umferðir eru eftir.

Mikil hætta er á að liðið missi af Evrópukeppni á næstu leiktíð en liðið er núna í Evrópudeildinni og tapaði þar fyrsta leik fyrir Ludogorets frá Búlgaríu á heimavelli, 2-1 í fyrakvöld. Eftir tapið var ekki að heyra að Rydström hefði neinn áhuga á að hætta:

„Ég hef ótrúlega mikinn metnað og áhuga á því að vera hluti af liðinu þegar við náum að snúa þessu gengi við,“ sagði Rydström.

Fyrsti þjálfari Daníels í meistaraflokki

Aðstoðarmaður Rydström var einnig rekinn og það er ljóst að þeir Daníel Tristan Guðjohnsen og Arnór Sigurðsson munu fá nýjan þjálfara á næstunni. Samkvæmt tilkynningu Malmö er vinnan við það hafin.

Daníel, sem er 19 ára og nýorðinn A-landsliðsmaður, lék sína fyrstu leiki í meistaraflokki 2023, undir stjórn Rydström sem hafði tekið við Malmö eftir að íslenski ríkisborgarinn Milos Milojevic var rekinn. 

Rydström fékk svo Arnór í sitt lið í febrúar síðastliðnum eftir að Arnór hafði fengið samningi sínum við Blackburn rift.